GAFA MITE
“Baˈinore Haseemmo”
Geˈrechote ragu bainose. Qanchoho hayisso xinqidhanni wolu geˈreewiwiinni baxxite baˈu. Xa hoshshano allaalaanchuno dileellannose. Qoleno gobba tunsitanni no. Tini geˈrecho noohu moyichu fule haˈramanno baseraati; hakko daafira itantannota hoolannosehu dino. Gedensaanni tini geˈrecho allaalaanchise huuro macciishshitu; isi dodanni daye hanqafe uddanosi diwe haare haˈrise.
YIHOWA duucha hige isonooto hattoo allaalaanchi ledo lawisiisino. Isi Qaalisi giddo togo yiinonke: “Ani umiˈya geeˈreewoˈya hasiˈreemmo, qoleno towaateemmonsa.”—Hiziqeeli 34:11, 12.
“Towaaxxeemmo Geˈreewo”
Yihowa geˈreewi ayeooti? Yihowa geˈreewi iso baxannonna magansiˈranno mannaati. Qullaawu Maxaafi togo yaanno: “Amme magansiˈnona, hattono isira kumbuullo; Kalaqaanchinke Yihowa albaanni guluphino. Korkaatuno isi Maganonkeeti; ninke kayinni qanchisi giddo heeˈnoommo mannaati, hattono isi towaatannonke geˈreewooti.” (Faarso 95:6, 7) Geˈreewu allaalaanchinsara hajajamannonte gede, Yihowa magansidhannorino Allaalaanchinsara hajajama baxxanno. Insa disodhannoreeti? Deeˈni. Maganu soqqamaano “billaallino geˈreewi gede,” “baino geˈreewi” gedenna “ballehino geˈreewi” gede ikkitino woti no. (Hiziqeeli 34:12; Maatewoosi 15:24; 1 Pheexiroosi 2:25) Ikkollana, mittu manchi halaaluwiinni xeertiˈre bairo nafa, Yihowa kuni manchi horo dihiganno yee facci asse diaguranno.
Yihowa xaano atera allaalaanchokki ikkinohu gede assite hedatto? Yannankera Yihowa Allaalaancho ikkinota leellishannohu hiittoonniiti? Hanni sase doogga laˈno:
Ayyaanaamittete sagale itisannonke. Yihowa togo yiino: “Danchu qanchira allaaleemmonsa. Insa danchu qanchira gadhanno, hattono doorantino kalo giddo bobbakkanno.” (Hiziqeeli 34:14) Yihowa kiˈannota ayyaanaamittete sagale hasiissanno yannara shiqishinkekki saino yanna dino. Kaaˈlo hasidhe huucciˈrootto huuccattora borro nabbabbe, lallawo macciishshite, woy viidiyo laˈe dawaro afiˈrootto yanna qulli yitannohe? Tini Yihowa ate daafira hedannota buuxatto gede diassitinohe?
Isi agarannonke hattono irkisannonke. Yihowa togo yee qaale eino: “Ballehinoha wirro abbeemmo, gawajjaminoha hoccunni usureemmo, hattono daafurinoha jawaachisheemmo.” (Hiziqeeli 34:16) Yihowa daafurtinorenna yaaddo amaddinonsare jawaachishanno. Isi geˈreewisi ammanate roduuwinsa assitinorinni gawajjantinoha ikkiro nafa sisse dhaawannonsa. Qoleno, isi ballekke baˈinore qolanno; hattono uminsa laanfe ledo sharrantannore jawaachishanno.
Isi ninke towaata hasiissannoe yee hedanno. Yihowa togo yiino: “Billaallite hadhino base baalantenni gamba asseemmo. Bainoha haseemmo.” (Hiziqeeli 34:12, 16) Yihowa baino geˈreewi bae gatanno yee dihedanno. Isi hoshshate giddonni mitte geˈrecho xeˈanno wote afanno, hakkunni gedensaanni hasanno hattono hase afiˈriro lowo geeshsha hagiidhanno. (Maatewoosi 18:12-14) Hakkiinni saeno isi halaalunni magansidhannosire “geˈreewoˈya, ani towaateemmo geˈreewo” yaannonsa. (Hiziqeeli 34:31) Konni geˈreewi giddo mittu ateeti.
Yihowa baˈino geˈrechosi baˈe gatanno yee dihedanno. Isi hattee geˈrecho hase afiˈranno wote baasa hagiidhanno
“Dironke Albihu Gedeeha Assite Haaroonsinke”
Yihowa ate hasanni noohehunna higatto gede koyisinohehu mayiraati? Hagiirraamo ikkattora hasiˈranno daafiraati. Isi geˈreewisira ‘atoote xeenimma dirrisannota’ coyiˈrino. (Hiziqeeli 34:26) Tini haafa hexxo diˈˈikkitino. Tini adda ikkitinota umikki heeshshonni laootto.
Hanni Yihowa daafira rositto yanna qaagi. Lawishshaho, Maganu suˈmirenna mannaho noosi alaamire kulannoha maalaˈlinanni halaale rositto wote mayi macciishshaminohe? Ammanate roduuwikki ledo jajjabbu gambooshshiwa gamba yaa mageeshshi geeshsha hagiirsiissannoro qulli yaannohe? Mittu manchira dancha duduwo kulteenna dancha gede macciishsheenna hagiidhitanni qaera higootto yanna dino?
Hattoo hagiirre xaano afiˈra dandaatto. Hunditi Maganu soqqamaano togo yite huuccidhino: “Yihowa, atewa qolinke ballo; ninkeno atewa ranke hingeemmo. Dironke albihu gedeeha assite haaroonsinke.” (Ermiyaasi Qurto 5:21) Yihowa mannisi galagale hige isira hagiirrunni soqqamanno gede asse huuccattonsara dawaro qolino. (Nehimiya 8:17) Yihowa aterano hatto assannohe.
Hige Yihowawa higa coyiˈni gede shota diˈˈikkitino. Hanni wirro higa shota ikkitannokki gede assannoha mito coyenna konne coye qeela dandaatto gara laˈno.
