Tenne xaˈmo xaˈmannohu batinyu manni baasa gawajjaminoho; kuni manni xaˈmonsara dawaro afiˈra calla ikkikkinni shesho hasiˈrannoho. Wolootu kayinni, Naazi gashshooti assinori mannu bunshe ma deerra martara dandiitannoro leellishshanno ikkitooti yee hedanno; hakko daafira insara Magano ammana qarra ikkitinonsa.

 Soˈrote hedo: ‘Maganu Naazi gashshooti manna gudanna sammi yiinohu mayiraati?’ yee xaˈma digaraho.

 Halaale: Jawaata ammana noonsa manni Maganu bunshe heedhara fajjinohu mayiraatiro xaˈmino woyiti no. Lawishshaho, masaalaanchu Imbaaqoomi Magano togo yee xaˈmino: “Tenne beebba assinanna mayira sammi yite laˈˈatto? Kuneeti lowo geeshsha batidhino baonna beebba gaangeessite nooe. Base baalate gibbonna yekkeerama no.” (Imbaaqoomi 1:3) Imbaaqoomi tenne xaˈmo xaˈmino daafira Maganu dihanqinosi; hatteentenni isi xaˈmino xaˈmo ninke baalunku nabbambeemmo gede Qullaawu Maxaafi giddo borreessiisino.

 Soˈrote hedo: Mannu qarri Maganoho didhiwannosi.

 Halaale: Maganu bunshenna bunshe abbitanno gawajjo giwanno. (Lawishsha 6:16-19) Nohi waro mannu bunshe baattote aana batidhino daafira Maganu ‘wodanisinni dadillino.’ (Kalaqama 6:5, 6) Naazi gashshooti lowo manna gudi woyiteno Maganu lowo geeshsha dadillinoti dihuluullissannote.—Milkiyaasi 3:6.

 Soˈrote hedo: Naazi gashshooti assinori Maganu Ayihudete manna qorichishate abbinoreeti.

 Halaale: Maganu umi xibbi diro Roomu daga Yerusaalame huntara fajjinoti egennantinote. (Maatewoosi 23:37–24:2) Ikkollana hakkuyi kawa, Maganu mitte gosa bade didoodhino; qoleno mitte daga bade diqorichishanno. Maganu albaanni “Ayihudetenna dagate mereero badooshshu dino.”—Roomu Sokka 10:12.

 Soˈrote hedo: Baxillaanchunna wolqaataamu Magani nooha ikkoommero, Naazi gashshooti manna gudannota hoolanno.

 Halaale: Maganu qarra abbannokkiha ikkirono, qarru mito geeshsha heeˈrara fajjanno woyiti no.—Yaiqoobi 1:13; 5:11.

 Maganu, Naazi gashshooti manna gudannota hoolinokkihu hattono mannu baalunkura qarru iillara fajjinohu, lowo diri albaanni kaˈino xaˈmora dawaro qolateeti. Qullaawu Maxaafi, tenne alame gashshe noohu Magano ikkikkinni Daawuloosi ikkinota xawise kulanno. (Luqaasi 4:1, 2, 6; Yohaannisi 12:31) Hanni, Maganu Naazi gashshooti manna gudannota hoolinokkihu mayiraatiro afate kaaˈlannonkeha, Qullaawu Maxaafi giddo kulloonniha lame halaale laˈno.

1.   Maganu manna doodhate dandoo oye kalaqinonsa. Maganu umo kalaqino mannira Addaamiranna Heewanira maa assa hasiissannonsaro kulinonsaha ikkirono, hajajantanno gede dimurrisino. Insa danchanna busha uminsa doodha hasiˈrino; insano ikko gedensaanni heeˈrinohu batinyu manni doodhinohu bushu coyi mannu ooso baalantera qarranna shetto abbino. (Kalaqama 2:17; 3:6; Roomu Sokka 5:12) Isteetimenti ovi Pirinsipilis ovi Konservaativ Judayzimi yaanno maxaafi yiinoti garankolla: “Alamete aana noohu rooru qarri kalaqaminohu doodhate dandoonke doogimale horoonsiˈnoommo daafiraati.” Maganu doodhate dandoonke haaˈre hoolantenni, mannu ooso isi kaaˈlo nookkiha uminsanni heeshshonsa biddi assidhara yanna uyino.

2.   Maganu Naazi gashshooti abbino gawajjo baala dhaawanno. Maganu, Naazi gashshooti shiino mannino gatikkinni reyinoha lowo miliyoone ikkanno manna kayiseemmo yee qaale eino. Qoleno, Maganu Naazi gashshooti shaanna gatino manni hakkawarire qaaganni xissiisiˈranno xissono hoolanno. (Isayaasi 65:17; Soqqamaasinete Looso 24:15) Maganu manna baxanno daafira coyiˈrino qaale wonshannota addaxxa dandiineemmo.—Yohaannisi 3:16.

 Naazi gashshooti gawajjinohu batinyu manni, Maganu bunshe heedhara fajjinohu mayiraatironna tini abbitino gawajjo dhaawannohu hiittoonniitiro afansa, ammanansa kaajjitanno gedenna hagiirru noo heeshsho heeˈranno gede kaaˈlitinonsa.