Disoorramino. Qullaawu Maxaafi lowo kume diro galchinanna heeˈrinoha ikkirono, angatenni galchinoonnite hundi borro ledo heewisiinsiro qara hedosi soorrantinokkita huwata dandiinanni.

 Angatenni galchinoonnita hundita batinye Qullaawu Maxaafi borro anfoonni. Kuri giddo mite badooshshe afidhino; hakko daafira galchini woyite kalaqantino soˈro no yaate. Kuri badooshshi giddo rooru hakkeeshshi geeshsha gariha woy borrote sokka soorrannoha diˈˈikkino. Ikkollana, mitu badooshshi baxxe leellannohonna lowo diri albaanni anfanni heeˈnenni Qullaawu Maxaafi sokka soorrate assinoonniho. Hanni lame lawishsha laˈno:

1.   Keeshshitinoti mite Qullaawu Maxaafi tiro 1 Yohaannisi 5:7 aana togo yitanno: “Iima Annu, Beettunna Qullaawu Ayyaani no; kuri sasunku mittoho.” Ikkollana, angatenni galchinoonniti hunditi halaalaancho borro, kuni qaali umo borreessinoonni borrora nookkita buuxissanno. Kuni qaali gedensoonni lendoonniho. a Hakko daafira, dirinkera noote halaalaancho Qullaawu Maxaafi tiro giddo kuni qaali dino.

2.   Maganu suˈmi angatenni galchinoonnite hundite Qullaawu Maxaafi borro giddo lowo kume ikkanno bayicho no. Ikkirono batinye Qullaawu Maxaafi tiro konne suˈma hoolte “Mooticha” woy “Magano” yaannoha suusu suˈma eessitino.

 Xaa yannara, angatenni borreessinoonnita hundita batinye borro anfoonni daafira, soˈro bade afa roore shota ikkitino. b Tenne hundi borro heewisiisa yannankera noohu Qullaawu Maxaafi halaalaanchimma lainohunni maa buunxanni gede assitino?

•   Wiiliyami Henirii Giriini yinanni fullahaanchi Ibiraawootu Afiita Qullaawa Borro (mitu manni yaanno garinni “Akkala Gondooro”) lainohunni togo yiino: “Togo taashshine galchinoonniti wole hundi borro dino yaa dandiinanni.”

•   Firederiki Fayivii Biruusi yinannihu Qullaawu Maxaafi fullahaanchi Giriikete Afiita Qullaawa Borro woy “Haaro Gondooro” lainohunni togo yee borreessino: “Hundi waro heedhino borreessaano qixxeessitino borro taje hendiro, Haaru Gondoori taje lowo geeshsha roortanno; ikkirono tenne [hundi borreessaano qixxeessitino] borro halaale ikkase huluullamannohu dino.”

•   Hundite Qullaawu Maxaafi borro aana xiinxallo assinohu egennamino fullahaanchi Seri Firederiki Keniyoni togo yiino: “[Aye manchino] Qullaawa Maxaafa anga amade, woˈmu Qullaawu Maxaafi halaalaancho Maganu Qaale amadinotanna ilamatenni ilama saˈˈanni dayi yannara gari coyi soorraminokkita mittoreno huluullamikkinni coyiˈra dandaanno.”

•   Qullaawa Maxaafa galchinohu hundihu Ayihudete mannino ikko Kiristaanu, Maganu manni loosinota jawa soˈro mittoreno gatisikkinni galchino. c (Kiiro 20:12; 2 Saamueeli 11:2-4; Galatiyu Sokka 2: 11-14) Qoleno insa, Ayihudete manni hajajama giwino garanna mannu wodho aana xintamino rosiwiinni xeertiˈnanni gede kultanno hedo noo gedeenni galchino. (Hoosei 4:2; Milkiyaasi 2:8, 9; Maatewoosi 23:8, 9; 1 Yohaannisi 5:21) Kuri borro galchituri, togoo xagge noo gedeenni galchansa ammanantinore ikkitinotanna qullaawa Maganu Qaale lowo geeshsha ayirrissannota leellishshanno.

•   Qullaawa Maxaafa umo ayyaanisinni borreessinanni gede assino Magani, konni Maxaafi hedo soorrantannota hoolanno yaa gara dilabbannohe? d (Isayaasi 40:8; 1 Pheexiroosi 1:24, 25) Qoleno isi Qullaawa Maxaafa qixxeessinohu, hundi waro heeˈrino mannira calla ikkikkinni yannankerano kaaˈlannonke gede hedeeti. (1 Qorontoosi 10:11) Isinni, “Umo assine Qullaawa Maxaaffa giddo borreessinoonnire baala rosiisankera borreessinoonni. Qullaawa Maxaaffa widoonni afiˈneemmo cincanna jawaante hexxo uyitannonke.”—Roomu Sokka 15:4.

•   Yesuusinna rosaanosi mittoreno huluullantukki hundite Ibiraawootu Afiite Qullaawa Borro giddonni qummi assite coyidhino.—Luqaasi 4:16-21; Soqqamaasinete Looso 17:1-3.