Yihowa Farciˈraasine mannu kassasannonsa kisse baalate woy qacifantinsa kiiro dawaro qoltannokkihu Qullaawu Maxaafi amaale harunsitanno daafiraati. Lawishshaho Maganu Qaali, “Boonaleessa mancho seejjannohu xono adhanno; busha mancho rufannohura gawajjo iillitannosi” yaanno. (Lawishsha 9:7, 8; 26:4) Mannu beebba suˈmanke hunanno woyite hatteera xissiisiˈne yekkeeramantenni, Magano hagiirsiisate aana illachinsheemmo.—Faarso 119:69.

 Hige “sammi yaate yanna no; [hasaawateno] yanna no.” (Rosiisaancho 3:7) Suwashshu wodani noosihu halaale afa hasiˈranno manchi ledo hasaambeemmo; ikkirono, hasiissannokki heewo giddora dieˈneemmo. Konni garinni Yesuusinna hundi Kiristaani rosonna lawishsha harunsineemmo.

•   Yesuusi, mannu Philaaxoosi albaanni beebba kassasisi yannara sammi yiino. (Maatewoosi 27:11-14; 1 Pheexiroosi 2:21-23) Qoleno ‘Itonna ago baxannoho’ yinisi woyiteno dawaro diqolino. Hatteentenni, “Egennote halaalaanchimma gumisenni leeltanno” yaanno seeri garinni, mannu loososi lae ayimmasi huwatanno gede assino. (Maatewoosi 11:19) Hasiisanno woyite kayinni, Yesuusi beebbate suˈmasi hunture mittoreno waajjikki coyishiishino.—Maatewoosi 15:1-3; Maarqoosi 3:22-30.

   Yesuusi rosaanosi mannu beebba kassasinonsa daafira hexxo mudhitannokki gede amaalinonsa. Togo yiino: “Ane daafira mannu [xoniˈnero], xiiwiˈneronna kaphunni suˈma huniˈnero tashshi yooˈne.” (Maatewoosi 5:11, 12) Ikkirono, rosaanosi kassansoonninsa widoonni halaalu daafira farciˈrate faro afidhuro, Yesuusi aante noo hexxo wonshannonsata coyiˈrino: “Ani, baarigaarraˈne gartaˈnera dandiitannokki hayyonna egenno eemmoˈne.”—Luqaasi 21:12-15.

•   Soqqamaasinchu Phaawuloosi, Kiristaanu gibbannonsari ledo hasiissannokki yekkeero giddora eannokki gede amaalino; isi hattoo yekkeeronna heewo ‘guma diafidhino; kaaˈlitannorino dino’ yiino.—Tiito 3:9; Roomu Sokka 16:17, 18.

•   Soqqamaasinchu Pheexiroosi, Kiristaanu dandaaminsaro ammanansa daafira farciˈranno gede jawaachishino. (1 Pheexiroosi 3:15) Ikkollana, konne assa dandiinanniti woyyitino doogo afuunni coyiˈra ikkitukkinni loosunni leellisha ikkitinota xawisino. Isi togo yiino: “Danchumma assatenni balala coye coyiˈrannoha hawanya manna coyiˈra hooltinanni.”—1 Pheexiroosi 2:12-15.