PIKËPAMJA E BIBLËS
Natyra e Perëndisë
Ç’lloj trupi ka Perëndia?
«Perëndia është Frymë.»
—Gjoni 4:24.
ÇFARË THOTË BIBLA:
Bibla tregon se Perëndia është person frymor. (2 Korintasve 3:17) Si i tillë, ai qëndron ku e ku më lart se ne dhe është i pakapshëm nga shqisat tona. Te 1 Timoteut 1:17 lexojmë se ai është ‘Mbreti i përjetësisë, i paprishshëm e i padukshëm’. Gjithashtu, Bibla thotë: «Askush nuk e ka parë Perëndinë kurrë.»
Krijuesi qëndron aq më lart se ne, sa as nuk arrijmë ta përfytyrojmë ç’pamje ka. Tek Isaia 40:18 thuhet: «Me kë mund ta përngjasoni Perëndinë dhe ç’gjë të ngjashme mund t’i vini përbri?» Edhe qiejt mahnitës duken të papërfillshëm në krahasim me të Plotfuqishmin.
Megjithatë, ekzistojnë disa krijesa me aftësi për të arsyetuar që mund ta shohin Perëndinë e madje të flasin me të ballë për ballë. Si është e mundur kjo? Sepse edhe ato janë krijesa frymore dhe jetojnë në qiell, në botën frymore. (1 Mbretërve 22:21; Hebrenjve 1:7) Jezu Krishti tha për këto krijesa mbinjerëzore, që quhen edhe engjëj: «[Ata] shohin gjithnjë fytyrën e Atit tim që është në qiell.»
A është i kudondodhur Perëndia?
«Ju lutuni në këtë mënyrë: ‘Ati ynë që je në qiej, u shenjtëroftë emri yt.’»
—Mateu 6:9.
ÇFARË THOTË BIBLA:
Bibla nuk mëson se Perëndia është i kudondodhur, pra nuk ndodhet kudo në çdo çast, si një forcë abstrakte. Përkundrazi, siç tregojnë fjalët e Jezuit te Mateu 6:9 dhe 18:10, Perëndia është një person
Nga fundi i jetës së tij, Jezui tha: «Po e lë botën dhe po shkoj tek Ati.» (Gjoni 16:28) Pasi vdiq si njeri dhe u ringjall si krijesë frymore, Krishti u ngjit «në vetë qiellin, që të paraqitet . . . përpara personit të Perëndisë».
Këto fakte rreth Perëndisë kanë rëndësi. Përse? Në radhë të parë, përderisa Perëndia është person, mund ta njohim dhe t’i afrohemi. (Jakovi 4:8) Veç kësaj, e vërteta për Perëndinë na mbron nga adhurimi i rremë, si adhurimi i objekteve dhe ikonave të pajeta. «Fëmijë të vegjël, ruhuni nga idhujt»,—thuhet te 1 Gjonit 5:21.
Në ç’kuptim njerëzit u bënë sipas shëmbëlltyrës së Perëndisë?
«Perëndia e krijoi njeriun sipas shëmbëlltyrës së vet, po, e krijoi sipas shëmbëlltyrës së Perëndisë. Ai i krijoi ata mashkull dhe femër.»
—Zanafilla 1:27.
ÇFARË THOTË BIBLA:
Si njerëz, kemi potencialin të pasqyrojmë veçoritë e personalitetit të Perëndisë, si dashurinë, drejtësinë dhe mençurinë e tij. Bibla thotë: «Bëhuni, pra, imitues të Perëndisë, si bij të dashur dhe vazhdoni të ecni në dashuri.»
Gjithashtu, Perëndia na krijoi me vullnet të lirë. Kjo na jep mundësi të zgjedhim të drejtën e jo të gabuarën dhe ta shprehim dashurinë për të tjerët në lloj-lloj mënyrash. (1 Korintasve 13:4-7) Kemi edhe aftësinë të jemi krijues, të shijojmë të bukurën dhe të admirojmë botën e mrekullueshme përreth nesh. Mbi të gjitha, kemi një botë shpirtërore, pra një dëshirë të lindur që të njohim Krijuesin dhe vullnetin e tij për ne.
Si mund të të ndihmojë e vërteta e Biblës: Sa më shumë mësojmë për Perëndinë dhe e imitojmë, aq më shumë jetojmë ashtu siç donte ai. Si rrjedhojë, provojmë më shumë gëzim në jetë, kënaqësi të vërtetë dhe paqe të brendshme. (Isaia 48:17, 18) Perëndia e di se cilësitë e tij tërheqëse ia ngrohin zemrën njeriut, e kështu ata me zemër të çiltër afrohen me të dhe futen në rrugën drejt jetës së përhershme.
Mund të të pëlqejë edhe . . .
PËRGJIGJE PËR PYETJE RRETH BIBLËS
A është Perëndia një forcë abstrakte?
Bibla thotë se Perëndia krijoi gjithçka, por a interesohet për ne?
PËRGJIGJE PËR PYETJE RRETH BIBLËS
A është Zoti kudo ose i kudondodhur?
A mëson Bibla se Zoti është i kudondodhur? Pse mund të jesh i sigurt se ai banon në një vend specifik, por prapë të njeh si individ?
PËRGJIGJE PËR PYETJE RRETH BIBLËS
A e ka parë njeri Zotin?
A e kundërshton Bibla veten kur në një vend thotë se ‘askush s’e ka parë Perëndinë’ dhe në një tjetër se Moisiu ‘pa Perëndinë e Izraelit’?
