Për Marinë, Raulin, Arnin e për shumë të tjerë, lutja është një dhuratë unike. Ata mendojnë se nëpërmjet lutjes, mund të flasin me Perëndinë, ta falënderojnë dhe t’i kërkojnë ndihmë. E besojnë me gjithë shpirt premtimin e Zotit për lutjen: «Kjo është siguria që kemi tek ai: ai na dëgjon për çdo gjë që i kërkojmë sipas vullnetit të tij.»—1 Gjonit 5:14.

Nga ana tjetër shumë njerëz e kanë të vështirë ta besojnë çfarë tregon ky shkrim për lutjen. Ja çfarë thotë Stivi: «Kur mbusha 17 vjeç, tre shokë të mi humbën jetën në dy aksidente të ndryshme. Njëri pësoi aksident me makinë dhe dy shoqe u mbytën në det.» Çfarë bëri Stivi? «Iu luta Zotit pse ndodhën të gjitha  këto, por nuk mora përgjigje. Prandaj thashë me vete: ‘E pse të lutem?!’» Kur duket sikur lutjet nuk marrin përgjigje, shumë fillojnë të dyshojnë nëse ia vlen të lutesh.

Ka edhe arsye të tjera pse njerëzit dyshojnë te vlera e lutjes. Disa thonë se, përderisa Perëndia i di të gjitha, tashmë e di çfarë po heqim dhe për çfarë kemi nevojë, prandaj s’ka kuptim të flasim me të për gjëra si këto.

Të tjerë besojnë se Perëndia i mbyll veshët që të mos i dëgjojë lutjet e tyre, si pasojë e gabimeve të së shkuarës. Xheni thotë: «Rrënja e problemit tim janë ndjenjat e pavlefshmërisë. Kam bërë shumë gabime, prandaj i them vetes se nuk e meritoj që Zoti të më dëgjojë.»

Po ti, çfarë mendimi ke për lutjen? Nëse edhe ti ke pasur dyshime për lutjen, mund të të ngushëllojnë përgjigjet që jep Bibla. Mund ta besosh atë që thotë Bibla për lutjen. * Në të mund të gjesh përgjigje për pyetje si këto:

• A i dëgjon vërtet Zoti lutjet?

• Pse disa lutje nuk marrin përgjigje?

• Si të lutesh që Zoti të të dëgjojë?

• Si mund të të ndihmojnë lutjet?