Jo, Mbretëria e Perëndisë nuk është një gjendje në zemrën e të krishterëve. a Bibla identifikon vendndodhjen e saj të vërtetë kur e quan «mbretëria e qiejve». (Mateu 4:17, Diodati i Ri) Shqyrto si e tregon Bibla se ajo është një qeveri reale që po sundon nga qielli.

•   Mbretëria e Perëndisë ka sundimtarë, nënshtetas, ligje dhe një mandat me qëllim që vullneti i Perëndisë të bëhet në qiell dhe në tokë.​—Mateu 6:10; Zbulesa 5:10.

•   Qeveria ose Mbretëria e Perëndisë do të sundojë mbi gjithë «popujt, kombet dhe gjuhët» e tokës. (Danieli 7:13, 14) Autoritetin për të sunduar nuk ia japin nënshtetasit, por vetë Perëndia.​—Psalmi 2:4-6; Isaia 9:7.

•   Jezui u tha apostujve besnikë se do të ishin me të në Mbretërinë e qiejve që ‘të uleshin në frone’.​—Luka 22:28, 30.

•   Kjo Mbretëri ka armiq, të cilët do t’i shkatërrojë.​—Psalmi 2:1, 2, 8, 9; 110:1, 2; 1 Korintasve 15:25, 26.

 Bibla nuk mëson se Mbretëria e qiejve është në zemrën tënde në kuptimin që sundon përmes zemrës së një personi. Gjithsesi, ajo tregon se ‘fjala e mbretërisë’ ose ‘lajmi i mirë për mbretërinë’ mund dhe duhet të na prekë zemrën.​—Mateu 13:19; 24:14.

Çfarë do të thotë shprehja «mbretëria e Perëndisë është përbrenda jush»?

 Disa janë pështjelluar për vendndodhjen e Mbretërisë nga përkthimi i Lukës 17:21 në disa versione të Biblës. Për shembull, përkthimi Diodati i Ri thotë se «mbretëria e Perëndisë është përbrenda jush». Për ta kuptuar siç duhet këtë varg, duhet të shqyrtojmë kontekstin.

 Jezui po fliste me farisenjtë, një grup krerësh fetarë që iu kundërvunë dhe morën pjesë në komplotin e vrasjes së tij. (Mateu 12:14; Luka 17:20) A ka kuptim të mendojmë që Mbretëria ishte një gjendje në zemrën e tyre kryeneçe? Jezui u tha: «Përbrenda jeni plot me hipokrizi dhe paligjshmëri.»​—Mateu 23:27, 28.

 Përkthime të tjera i qartësojnë mirë fjalët e Jezuit te Luka 17:21: «Mbretëria e Hyjit është mes jush!» (Kursivi është yni; Bibla Simon Filipaj) «Mbretëria e Perëndisë është mes jush.» (Përkthimi Bota e Re) Mbretëria e qiejve ishte «mes» farisenjve në kuptimin që Jezui, ai që ishte caktuar nga Perëndia për të sunduar si Mbret, ndodhej para tyre.​—Luka 1:​32, 33.