GI TROWPAAR
4: Gi pardon
SAN A WANI TAKI
Fu gi wan sma pardon wani taki dati wi no e tan mandi tapu a sma aladi a meki wan fowtu. Disi no wani taki dati yu e du leki a fowtu na wan pikin sani noso leki a no pasa noiti.
BIJBELTEKST: „Tan frudrage makandra èn gi makandra pardon nanga un heri ati, srefi te wan sma feni taki wan trawan du wan hati sani nanga en.”—Kolosesma 3:13.
„Te yu lobi wan sma, dan yu no e tan prakseri den fowtu fu en. Ma yu e luku den muiti di a sma e meki fu tron wan moro bun sma.”—Aaron.
FU SAN EDE A PRENSPARI
Efu yu e tan mandi, dan disi no bun gi yu gosontu èn yu no o de koloku. A sani disi kan pori yu trowlibi tu.
„Wan leisi mi masra aksi mi pardon fu wan hati sani di a ben du nanga mi. A ben muilek gi mi fu gi en pardon. Ma bakaten mi du dati. Ma a ben hati mi taki mi no ben du dati moro esi. Na a sani disi ben meki wi kisi furu trobi.”—Julia.
SAN YU KAN DU
AKSI YUSREFI
Efu yu trowpatna taki noso du wan sani san hati yu firi, dan aksi yusrefi:
’A sani disi erg so?’
’A sani di a du erg so taki a abi fu aksi mi fu gi en pardon of mi kan libi a tori so?’
TAKI NANGA YU PATNA FU DEN SANI DISI
O langa a e teki fosi wi gi makandra pardon?
San wi kan du fu gi makandra pardon moro snel?
SAN YU KAN DU
Efu yu patna du wan sani di hati yu, dan no si leki na takru prakseri a abi.
Pruberi fu no tan luku den fowtu fu yu patna èn hori na prakseri taki „wi alamala e sondu furu tron.”—Yakobus 3:2.
„A no muilek so fu gi pardon te wi sabi taki wi ala tu fout. Ma te na wan sma nomo a fout de, dan a moro muilek. Yu musu abi trutru sakafasi fu man gi a trawan pardon.”—Kimberly.
BIJBELTEKST: „No draidrai fu lusu a problema.”—Mateyus 5:25.
Efu yu e tan mandi, dan disi no bun gi yu gosontu èn yu no o de koloku. A sani disi kan pori yu trowlibi tu.
