GI YONGUWAN
9: Sabi yusrefi
SAN A WANI TAKI
Fu sabi yusrefi wani taki moro leki yu nen nanga a fasi fa yu de fu dorosei. A abi fu du nanga yu maniri, den sani di yu e bribi èn a fasi fa yu de. A abi fu du nanga ala sani fu yu di meki taki yu de a sma di yu de trutru.
FU SAN EDE A PRENSPARI
Te yu sabi suma na yu, yu o de kabakaba fu opo taki gi san yu e bribi. Yu no o meki den speri fu yu bosroiti gi yu suma yu musu de.
„Furu sma de leki den popki na ini den wenkri. Den no man bosroiti gi densrefi san den o weri, na tra sma e du dati gi den.”—Adrian.
„Mi leri fu opo taki gi san bun, awinsi a no makelek fu du dati alaten. Mi man de misrefi na mindri sma di de trutru mati fu mi, fu di den e lespeki a fasi fa mi e denki.”—Courtney.
BIJBELTEKST: „No libi moro leki den sma fu a grontapu disi, ma kenki un denki, so taki unu kan kenki un libi.”—Romesma 12:2.
SAN YU KAN DU
Kon sabi fa yu de nownow èn fa yu wani kon de. Luku san na den bun fasi fu yu, san na den swakifasi fu yu èn san yu e bribi. Wan fasi fa yu kan bigin du dati, na fu piki den aksi disi.
Den bun fasi fu yu: Sortu sani mi man du bun? Sortu bun maniri mi abi? (Fu eksempre: Mi lobi de biten? Mi man dwengi misrefi? Mi e wroko tranga? Mi lobi fu gi sani?) Sortu bun sani mi e du?
SAN YU KAN DU: A muilek gi yu fu sabi san na den bun sani di yu man du? Aksi yu papa, mama noso wan bun mati, fu taigi yu sortu bun fasi a e si ini yu èn fu san ede a taki dati.
BIJBELTEKST: „Meki ibri sma ondrosuku san na den sani di ensrefi e du. Dan dati sa meki taki a e prisiri nanga san ensrefi e du èn a no musu teki ensrefi gersi nanga tra sma.”—Galasiasma 6:4.
Den swakifasi fu yu: San mi musu kenki na den fasi fu mi? O ten a moro muilek gi mi fu dwengi misrefi fu no du sani di no bun? Na ini sortu situwâsi mi musu leri fu dwengi misrefi moro?
BIJBELTEKST: „Efu wi e taki: „Wi no abi sondu,” dan wi e kori wisrefi.”—1 Yohanes 1:8.
Den sani di mi e bribi: Fa mi e tyari misrefi èn fu san ede? Mi e bribi ini Gado? Sortu krin buweisi mi abi taki a de trutru? Sortu fasi fu libi mi no e feni bun èn fu san ede? Fa mi denki taki a libi o de na ini a ten di e kon?
BIJBELTEKST: „A frustan di yu abi, o de leki wan waktiman gi yu èn a koni di yu abi fu si sani krin, o kibri yu.”—Odo 2:11.
Kande yu lobi den tori disi tu
PIKI TAPU 10 AKSI DI YONGUSMA ABI
Suma na mi?
Te yu sabi sortu sani yu lobi du, san yu man du bun, san yu no man du bun èn san yu wani du nanga yu libi, dan dati o yepi yu fu sabi san yu o du te sma wani dwengi yu fu du wan sani.
