Gado e arki den begi fu wi?
Oiti yu aksi yusrefi efu Gado e arki yu te yu e begi? Furu sma e aksi densrefi a sani dati. Furu sma begi Gado fu yepi den nanga den problema fu den, ma toku den problema no lusu. Disi wani taki dati Gado no e arki den begi fu wi? Nôno! Bijbel e sori wi krin taki Gado e arki wi te wi e begi na wan fasi di fiti. Meki wi go luku san Bijbel e taki.
GADO E ARKI.
„Yu na a sma di e arki begi. Na yu ala sortu sma o kon suku yepi.”—Psalm 65:2.
Son sma e begi fu di den feni taki a e meki den firi moro bun, aladi den no e bribi taki wan sma e arki den. Ma begi a no wan sani di wi e du soso fu man firi bun te wi abi problema. Bijbel e sori krin taki „Yehovah * de krosibei fu ala den wan di e kari en. A de krosibei fu ala den wan di e bari kari en nanga wan krin ati. . . . Te den e bari suku yepi na en, a o yere den.”—Psalm 145:18, 19.
Sobun, wi kan de seiker taki Yehovah Gado e arki den begi fu den anbegiman fu en. Fu di a lobi wi, meki a e taki: „Un musu kari mi, un musu kon na mi, èn un musu begi mi, dan mi o arki unu.”—Yeremia 29:12.
GADO WANI TAKI YU BEGI EN.
„Tan begi.”—Romesma 12:12.
Bijbel e gi wi deki-ati fu „begi doronomo” èn fu „begi fayafaya na ibri okasi”. A de krin taki Yehovah Gado wani taki wi begi en.—Mateyus 26:41; Efeisesma 6:18.
Fu san ede Gado wani taki wi begi en? Luku a tori disi: Sortu papa no ben o wani taki en pikin aksi en: „Papa, yu kan yepi mi?” A no de fu taki dati wan papa kan sabi kaba san en pikin abi fanowdu noso fa a e firi. Ma te a papa e yere en pikin aksi en wan sani, dan dati e sori en taki a pikin e frutrow en èn taki a lobi en. Na so a de tu taki te wi e begi Yehovah Gado, wi e sori en taki wi e frutrow en èn taki wi wani de en mati.—Odo 15:8; Yakobus 4:8.
GADO E BROKO EN EDE NANGA YU.
„Trowe ala un hebi na en tapu, bika a e broko en ede nanga unu.”—1 Petrus 5:7.
Gado wani taki wi begi en fu di a lobi wi èn a e broko en ede nanga wi. A sabi heri bun sortu problema noso broko-ede wi abi èn a wani yepi wi.
Kownu David ben abi a gwenti fu begi Yehovah Gado fu yepi en èn a ben fruteri en fa a ben e firi èn fa a ben e denki (Psalm 23:1-6). Fa Gado ben si David? Gado ben lobi David èn a ben e arki ala den begi fu en (Tori fu den apostel 13:22). Na so Gado e arki den begi fu wi fu di a e broko en ede nanga wi.
„MI LOBI YEHOVAH, BIKA A E ARKI MI STEN”
Na dati a skrifiman fu wan fu den psalm na ini Bijbel ben taki. A ben sabi taki Gado ben e arki den begi fu en èn a sani dati yepi en trutru. A ben e firi taki Gado lobi en èn a sani disi gi en krakti di a ben kisi problema èn di a ben sari.—Psalm 116:1-9.
Te wi de seiker taki Gado e arki den begi fu wi, dan wi o tan begi en. Luku san miti Pedro di e libi na ini Spanyorokondre. A boi fu en di ben abi 19 yari, dede di wagi naki en. Pedro ben e sari srefisrefi. Dati meki a fruteri Gado fa a ben e firi èn a tan begi en fu trowstu en èn fu yepi en. San pasa? Pedro e taki: „Mi firi taki Yehovah piki den begi fu mi, fu di mi Kresten brada nanga sisa trowstu èn yepi mi nanga mi wefi na ini a muilek ten dati.”
Nofo tron a trowstu nanga a yepi di wi e kisi fu mati di lobi wi, na wan piki tapu den begi fu wi
Aladi begi no meki taki Pedro kisi en boi baka, toku dati yepi en nanga en famiri trutru. En wefi María Carmen e taki: „Begi yepi mi fu horidoro di mi ben e sari. Mi ben sabi taki Yehovah Gado ben frustan mi, fu di te mi ben e begi mi ben e firi taki mi ben kon rustig èn mi no ben e broko mi ede so furu moro.”
Bijbel nanga den sani di furu sma ondrofeni na ini den libi e sori krin taki Gado e arki begi trutru. Ma a de krin tu taki Gado no e piki ala begi. Fu san ede Gado no e piki ala begi?
^ paragraaf 5 Yehovah na a nen fu Gado.—Psalm 83:18.
