„Iniwan sani di unu e aksi a Tata, a o gi unu na ini mi nen.”​—Yohanes 16:23.

Den wortu fu Yesus e sori krin taki Yehovah no wani taki wi begi en nanga yepi fu popki, santa sma, engel, noso den afo fu wi di dede. Ma a wani taki wi begi en na ini a nen fu Yesus Krestes. Te wi e begi Gado na ini Yesus nen, dan wi e sori taki wi e frustan sortu prenspari sani Yesus du gi wi. Yesus ben taki: „Nowan sma kan kon na a Tata sondro mi.”​—Yohanes 14:6.

„Fruteri en ala san de na tapu un ati.”​—Psalm 62:8.

Te wi e begi Yehovah, dan wi musu taki nanga en leki fa wi ben o taki nanga wi papa di lobi wi. Na presi fu leisi wan begi na ini wan buku noso fu taki a srefi sani ibri tron baka, wi musu taki nanga Gado na wan lespeki fasi èn wi musu taki san de na tapu wi ati.

„Awansi san wi e aksi en, a e yere wi, solanga a e kruderi nanga a wani fu en.”​—1 Yohanes 5:14.

Na ini Bijbel, Yehovah Gado e taigi wi san a o du gi wi èn san a wani wi du gi en. Efu wi wani taki Gado feni den begi fu wi bun, dan den begi fu wi musu „kruderi nanga a wani fu en”. Dati meki wi musu studeri Bijbel so taki wi kan kon sabi en bun. Disi o yepi wi fu begi na wan fasi di a feni bun.

Begi gi den sani di yu abi fanowdu. Wi kan begi Gado fu gi wi den sani di wi abi fanowdu ibri dei, sani soleki nyanyan, krosi, èn wan presi fu tan. Wi kan aksi en tu fu gi wi koni so taki wi kan teki bun bosroiti èn fu gi wi krakti fu horidoro te wi e kisi tesi. Wi kan begi Gado fu kisi bribi, fu gi wi pardon èn fu yepi wi.​—Lukas 11:3, 4, 13; Yakobus 1:5, 17.

Begi gi trawan. Papa nanga mama di lobi den pikin, breiti te den pikin lobi makandra tu. Yehovah wani tu taki den pikin fu en na grontapu e broko den ede nanga makandra èn e yepi makandra. A bun te wi e begi gi wi masra noso wefi, gi den pikin fu wi, den famiriman fu wi, èn gi den mati fu wi. A disipel Yakobus ben skrifi: „Begi gi makandra.”​—Yakobus 5:16.

Taki Gado tangi. Bijbel e taki fu a Mekiman fu wi: „A du bun sani gi unu. A e gi unu alen komoto fu hemel èn bun ten di e meki taki unu abi bun furu nyanyan èn taki unu e firi prisiri” (Tori fu den apostel 14:17). Te wi e denki ala den sani di Gado du gi wi, dan wi o wani taki en tangi. Boiti dati, wi musu sori Gado tu taki wi de nanga tangi èn wi kan du dati te wi e gi yesi na en.​—Kolosesma 3:15.

Son leisi wi kan lasi-ati te wi no e kisi piki wantewante tapu den begi fu wi. Disi wani taki dati Gado no e broko en ede nanga wi? Nôno! Den eksempre di e kon now o sori krin taki wi musu tan begi.

Steve, di kari na ini a fosi artikel, e taki: „Efu mi no ben tan begi, mi no sabi efu oiti mi ben o de koloku baka.” San yepi Steve? A bigin studeri Bijbel èn a kon sabi o prenspari a de fu begi èn fu tan du dati. A e taki: „Mi e taki Gado tangi gi a lobi nanga a yepi di mi kisi fu den mati fu mi. Noiti ete mi ben firi so koloku.”

Fa a de nanga Jenny, di ben firi leki a no warti taki Gado arki den begi fu en? A e taki: „Di mi ben e firi leki mi no warti notinoti, mi begi Gado fu yepi mi fu frustan fu san ede mi ben e firi so.” Fa dati yepi en? „Di mi taki nanga Gado, dan dati yepi mi fu si misrefi soleki fa en e si mi. Mi kon si taki srefi efu mi ati e krutu mi, toku Gado no e du dati. Begi yepi mi tu fu horidoro.” Fa Jenny e firi now? „Begi yepi mi fu si Yehovah leki wan lobi-ati Gado, Papa, èn Mati di de trutru èn a e broko en ede nanga mi. Ala ten a o yepi mi solanga mi e pruberi fu du san a wani.”

Luku na eksempre tu fu Isabel. Di a ben kon de nanga bere, datra taigi en taki a ben o kisi wan siki pikin. A ben e sari srefisrefi. Son sma taigi en srefi fu puru a bere. „Mi ben e sari so te taki mi ben e firi leki mi ben o dede.” San Isabel du? A e taki: „Mi begi Gado, mi begi Gado tê fu yepi mi.” Bakaten a meki wan boi, di a kari Gerard, ma a boi ben siki. Isabel feni taki Gado piki den begi fu en? Iya, Gado piki den begi. Na sortu fasi? Isabel e taki: „Te mi e luku fa a boi fu mi di abi 14 yari now e prisiri na ini a libi aladi a siki, dan mi e frustan taki en na a moro bun piki tapu den begi fu mi. A boi fu mi na a moro bigi blesi di Yehovah Gado gi mi.”

Den moi sani di den sma disi taki e meki wi prakseri den wortu fu a psalm skrifiman: „Yehovah, mi sabi taki yu o arki a begi fu den safri-ati sma. Yu o sreka den ati. Yu o poti yesi arki den” (Psalm 10:17). Disi na moi reide fu tan begi Gado, a no so?

Na ini Bijbel wi kan feni furu fu den begi fu Yesus. A wan di furu sma sabi, na a begi di a leri den disipel fu en. San wi kan leri fu a begi dati?