“LEBHASI seyingahamba kepha lelijaha lelingumShayina aliyi ndzawo!” Lawa ngemavi Alexandra laweva nakasehleti ebhasini, amele kwewela umncele walelinye live leliseNingizimu yeMelika. Alexandra wase uyehla ayobuka kutsi kwentekani, nakefika wakhandza lijaha lelingumShayina letama kukhuluma Spanish lesingevakali njengobe letama kuchazela logadzi wasegedeni inkinga yalo. Njengobe Alexandra abesebandleni laBoFakazi BaJehova lelikhuluma siShayina, wase uvolontiya kulihumushela.

Lelijaha latsi belisakhamuti lesisemtsetfweni kodvwa tigebengu betilibambe inkunzi tatsatsa emaphepha alo kanye nemali. Logadzi wacale wangayiva lendzaba yalelijaha waze wasola na-Alexandra kutsi ushushumbisa bantfu. Kodvwa wagcine ayivile lendzaba, wase utsi lelijaha bekufanele libhadale ngenca yekutsi belite emaphepha lafanele. Njengoba belite imali Alexandra watsi utalinika $20 (lokuyimali lecishe ibengu-R280.00). Lelijaha belingati kutsi lingambonga ngani, ngako lase litsi litambhadala imali lengetulu kwalena lamboleke yona. Alexandra walichazela kutsi abengakalindzeli kubhadalwa ngalesento lasentile kunaloko ujatjuliswa kutsi ukhonile kumsita, lobekuyintfo lenhle. Wase unika lelijaha tincwadzi letisekelwe eBhayibhelini futsi walicela kutsi lifundze liBhayibheli naBoFakazi BaJehova.

Kuyajabulisa kuva kutsi bonkhe bantfu bayawubonisa umusa kubantfu labangabati. Loku kwentiwa bantfu labakholwako kanye nalabangakholwa. Bewungatsandza yini wena kuba lusito ngalendlela? Lona ngumbuto lobalulekile ngoba Jesu watsi: “Kunenjabulo lenyenti ekupheni kunasekwemukeleni.” (Imisebenti 20:35) Ngisho nabososayensi bayakuvuma loku ngobe sebabonile kutsi kupha kungakwenta uphile imphilo lejabulisako. Ake sibone kutsi loku kwenteka kanjani.

Kunebufakazi lobukhombisa kutsi kupha nenjabulo kuyahambisana. Umphostoli Pawula wabhala kutsi “Nkulunkulu utsandza umuntfu lopha ajabulile.” Abekhuluma ngemaKhristu labenikela ngekutitsandzela kute asite labanye bazalwane lababhekene netimo letimatima. (2 Khorinte 8:4; 9:7) Pawula abengasho kutsi bebapha ngobe bajabulile. Kodvwa bebajabula ngobe bebapha.

Ngekusho kwalolunye lucwaningo, kupha “kwenta umuntfu ajabule, ative atsandvwa futsi etsenjwa, umphumela waloku kutsi ative enetisekile.” Lolunye luhlolo luveta kutsi “kupha lomunye imali kungakwenta ujabule kakhulu kwendlula ngesikhatsi uyisebentisele kwenetisa tidzingo takho.”

Uke wacabanga yini kutsi kuncane longakwenta ngenca yesimo lokuso? Liciniso likutsi sonkhe singakhona kutfola injabulo ‘yekupha ujabulile.’ Akudzingeki uphe ngetintfo letinkhulu, kodvwa lokubalulekile kutsi uphe ngetisusa letinhle. Lomunye waBoFakazi BaJehova watfumela umlayeto lohambisana  nemnikelo kubashicileli balomagazini. Lomlayeto bewutsi: “Kuyo yonkhe leminyaka bengikhona kunikela ngemali lencane eHholweni LeMbuso.” Wachubeka watsi: “Jehova Nkulunkulu ungiphe lokunyenti kakhulu kunaloko lenginikele ngako. . . . Ngiyajabula ngekutsi ngininike lesipho—loku nje kuyangidvudvuta.”

Akusiyo imali kuphela lesingayipha labanye, kunaloko tinyenti tindlela tekupha.

LiBhayibheli litsi: “Umuntfu lonemusa kulabanye utisita ye—na; kodvwa umuntfu lote sihe utilimata yena.” (Taga 11:17) Bantfu labanemusa bayephana, batimisele kunaka labanye, kunikela ngesikhatsi sabo, emandla abo kanye nalokunye lokunyenti. Kwenta kwabo kanjalo kubasita ngetindlela letinyenti, kantsi futsi kwephana kubenta babe nemphilo lenhle.

Lucwaningo luphindze luvete kutsi bantfu labasita labanye ngekutitsandzela abavami kugula kakhulu noma kucindzeteleka kakhulu. Kunaloko baba nemphilo lenhle. Kupha kuphindze kusite ngisho nalabo labanetifo letingelapheki, njengesifo lesihlasela umgogodla nemitsambo yebucopho lokutsiwa yi-multiple sclerosis kanye neligciwane lembulalave kutsi bative bancono. Kungaphindze kusite nebantfu labayekele tidzakamiva kutsi bangacindzeteleki kakhulu bese baphindze babuyela kuto.

Kutsiwa loku kubangelwa kutsi, “kuba neluvelo, bubele kanye nemusa, kuyawanciphisa ematfuba ekutiva ucindzetelekile.” Kupha kungaphindze kunciphise ematfuba ekukhuphukelwa ngushukela. Kantsi nebantfu labafelwa balingani babo basheshe babencono nangabe basita labanye.

Kusebaleni kutsi kupha kungakusita ube nemphilo lenhle.

Jesu wancenga balandzeli bakhe watsi: “Phanini labanye, nani nitawuphiwa. Batawunipha lokunyenti kakhulu, lokungagcishwa kugcwale konkhe leningaphatsa ngako. Ngobe ngendlela lenibaphatsa ngayo labanye nani nitawuphatfwa ngayo.” (Lukha 6:38) Nangabe wephana, manyenti ematfuba ekutsi nalabanye bakhombise kubonga futsi nabo baphe labanye. Ngako kupha kucinisa bungani futsi kukhutsate nekubambisana.

Bantfu labacwaninga ngebudlelwane bebantfu batfole kutsi “nangabe umuntfu anemoya wekupha labanye, nabo babese baba nemoya wekupha.” Ecinisweni kufundza ngetento letinhle temusa “kwenta bantfu babe nemoya wekupha.” Kungako lolunye lucwaningo lutsi: “Umuntfu munye angakhutsata emakhulu ebantfu, lokuhlanganisa nebantfu langabati nome langazange sekahlangane nabo.” Ngalamanye emagama, sento sinye semusa singaba nemphumela lomuhle kubantfu labanyenti ngisho nasemmangweni wonkhe. Angeke yini sotsandze kuhlala endzaweni lenjalo? Tinyenti tinzuzo letingabakhona nangabe bantfu banemoya wekwephana.

Nasi sibonelo lesikhombisa imiphumela lemihle yekwephana.  EFlorida e-U.S.A kwaba nesiphepho lesikhulu. Licembu laBoFakazi BaJehova lavolontiya kuya khona kute liyosita. Njengobe bebamele kufika kwetintfo lebebatatisebentisa nabalungisa lendlu, babona kutsi fenisi wamakhelwane wabo uwile base bayawuvusa. Ngekuhamba kwesikhatsi lomakhelwane wabhalela endlunkhulu yaBoFakazi BaJehova, watsi: “Ngiyohlale nginibonga ngalenangentela kona. Ninemusa kakhulu kwendlula bonkhe bantfu lengibatiko.” Kute akhombise kubonga, watfumela umnikelo wekusekela umsebenti lomuhle waBoFakazi.

Lucwaningo lolwentiwe bososayensi luveta kutsi “kunalokutsite lokubalulekile lokukhutsata bantfu kutsi basite labanye.” Lolucwaningo luphindze luvete kutsi bantfwana “bayakhona kucabangela labanye ngisho basengakakhoni nekukhuluma.” Kubangelwa yini loku? LiBhayibheli liyasiveta sizatfu saloko nalitsi Nkulunkulu wadala bantfu baba “ngumfanekiso wakhe.” Loku kusho kutsi bantfu banebuntfu lobufana nebaNkulunkulu.—Genesisi 1:27.

Lobunye buntfu lobuhle beMdali wetfu Jehova kutsi uyephana. Usiphe kuphila nato tonkhe tintfo lesitidzingako kute sijabule. (Imisebenti 14:17; 17:26-28) Nangabe sifundza liVi laNkulunkulu liBhayibheli singakhona kumati kahle Babe wetfu losezulwini kanye netinjongo takhe letinhle ngatsi. LiBhayibheli liphindze lisicinisekise kutsi kukhona Nkulunkulu lakwentile kute sibe nelikusasa lelijabulisako. * (1 Johane 4:9, 10) Njengobe Jehova Nkulunkulu angumtfombo wekupha futsi sentiwe ngemfanekiso wakhe, akumangalisi kutsi nangabe simlingisa ngekupha labanye, loko kusita tsine futsi kusenta semukeleke kuye.—Hebheru 13:16.

Usayikhumbula yini indzaba ya-Alexandra, lokukhulunywe ngayo ekucaleni kwalesihloko? Kwagcina kwentekeni kulelijaha lalisita? Ngisho noma lomunye labegibele naye ebhasini atsi Alexandra abedlale ngemali yakhe, lelijaha labese lishayela bangani balo lapho lebhasi beyiya khona, lase liyasibhadala lesikweledi sa $-20. Ngetulu kwaloko lelijaha lakwenta loko bekucelwe ngu-Alexandra, lafundza liBhayibheli naBoFakazi BaJehova. Ngemuva kwetinyanga letintsatfu Alexandra wajabula kuphindze abone lelijaha emhlanganweni waBoFakazi BaJehova wesiShayina lobewusePeru. Kute limbonge ngako konkhe labelentele kona, lelijaha labese limema Alexandra nalabo abehamba nabo kutsi baye e-restaurant.

Kupha labanye kanye nekubasita kusenta sijabule. Kodvwa lokubaluleke kakhulu kutsi ungakhona kusita bantfu bamati kahle Jehova Nkulunkulu, longuMuphi wato tonkhe tipho letinhle. (Jakobe 1:17) Wena uyayitfola yini injabulo letfolakala ngaloluhlobo lwekupha?