DOREEN wetfuka kakhulu ngesikhatsi umyeni wakhe Wesley lobekaneminyaka lengu-54 kutfolakala kutsi unesimila ebuchosheni. * Bodokotela batsi usalelwe tinyanga letimbalwa aphila. Doreen uyakhumbula: “Bengingakukholelwa loko lebengisandza kukuva. Kwaphela emaviki solo ngetfukile. Bekungatsi loku kwenteka kulomumye umuntfu hhayi kitsi. Bengingakasilungeli lesimo.”

Kuyadzabukisa kutsi bantfu bavame kutiva ngendlela Doreen labetiva ngayo. Sifo lesingelapheki singahlasela nome ngubani futsi nome nini. Kuyajabulisa kutsi ngekutitsandzela, bantfu labanyenti bayawemukela umsebenti wekunakekela umuntfu labamtsandzako lonesifo lesingelapheki. Noma kunjalo kunakekela umuntfu logulako kungumsebenti lomatima. Yini lengentiwa ngemalunga emndeni kuze advudvute futsi anakekele umuntfu lamtsandzako lonesifo lesingelapheki? Yini lengasita banakekeli kutsi babhekane nekushintjashintja kwemiva yesigulane? Njengobe kufa kusondzela, yini labangayilindzela? Asesicale ngekuhlola kutsi yini leyenta kube matima kunakekela umuntfu lonesifo lesingelapheki lamuhla.

Temphilo tiyitfutfukisile imphilo yebantfu. Eminyakeni lecishe ibe likhulu leyendlulile, bantfu bebaphila sikhatsi lesifishane ngisho nasemaveni latfutfukile. Bantfu bebasheshe bafe ngenca yetifo letitsatselwanako noma tingoti. Bekumatima kuya etibhedlela, ngako bantfu labanyenti bebanakekelwa yimindeni yabo futsi bebafela emakhaya.

Lamuhla, kutfutfuka kwetemphilo kwente bodokotela bakhona kwelapha tifo kuze bantfu baphile sikhatsi lesidze. Nyalo bantfu sebaphila iminyaka leminyenti banetifo lebetingasheshe tibabulale esikhatsini lesengcile. Noma kunjalo, loku kungahle kungabi likhambi. Bantfu labagulako bavame  kuba butsakatsaka kakhulu baze bangakhoni nekutinakekela. Kumatima kakhulu kunakekela bantfu labanjalo.

Umphumela waloku ube kutsi bantfu labanyenti sebafela etibhedlela hhayi emakhaya. Bantfu labanyenti lamuhla abakwati lokwenteka kumuntfu nakafa, futsi labambalwa abakase babone umuntfu afa. Ngako kwesaba loko lokutawenteka kungaphatamisa imetamo yalonakekela lilunga lemndeni leligulako. Yini lengasita lonakekela logulako?

Njengobe sibonile kulokwenteka kuDoreen, bantfu labanyenti baphelelwa ngemandla nangabe kutfolakala kutsi umuntfu labamtsandzako unesifo lesingelapheki. Njengobe ukhatsateke kakhulu, wesaba futsi uselusizini, yini lengakusita kutsi ukulungele loko lokutawenteka? Inceku yaNkulunkulu leyetsembekile yathantaza yatsi: “Sifundzise kutsi sikwati kubala emalanga etfu, kuze sibe nenhlitiyo lehlakaniphile.” (Tihlabelelo 90:12) Thantaza ngalokusuka enhlitiyweni, ucele Nkulunkulu Jehova akukhombise indlela ‘yekubala emalanga akho’ kute ukwati kusebentisa kahle emalanga lasele ukanye nalomtsandzako logulako.

Loku kudzinga uhlele kahle. Nangabe logulako asakhona kukhuluma futsi atimisele kucoca ngalendzaba, kungaba kuhlakanipha kumbuta kutsi ngubani langatsandza amentele tincumo nangabe yena angasakhoni kutenta. Kucoca ngekukhululeka mayelana nekutsi uyafisa yini kufakwa umoya nakangasakhoni kuphefumula, kulaliswa esibhedlela, kanye nangetindlela tekwelashwa letitsite kunganciphisa kungevani kanye nekutisola kwemalunga emndeni laphocelelekile kutsi atsatsele sigulane tincumo letitsite. Kukhulumisana ngekukhululeka futsi kusenesikhatsi kwenta emalunga emndeni akhone kunakisisa kutsi angamnakekela njani lona logulako. LiBhayibheli litsi: “Tinhloso atiphumeleli ngaphandle kweteluleko.”​—Taga 15:22.

Umsebenti loyinhloko walonakekela umuntfu logulako, kutsi amdvudvute. Nangabe umuntfu sekatawufa, udzinga kucinisekiswa kutsi uyatsandvwa futsi nivelana naye. Kungentiwa njani loko? Mfundzele tincwadzi letitamakha futsi umhlabelele tingoma latitsandzako. Bantfu labanyenti bayadvudvuteka nangabe lilunga lemndeni libabamba ngesandla futsi likhuluma nabo ngemusa.

Kuvamise kuba lusito nekumtjela kutsi bobani labatomhlola. Lomunye umbiko utsi: “Umuntfu logulako uyakhona kuva etindlebeni ngisho noma letinye titfo takhe temtimba tingasasebenti.  Uyakhona kuva kahle ngisho noma abonakala alele, ngako ungatisho tintfo lobewungeke utisho nangabe abevukile.”

Nakungenteka, thantaza naye. LiBhayibheli lisitjela kutsi umphostoli Pawula kanye nebangani bakhe bake bacindzeteleka kakhulu futsi bebesaba kutsi batawubulawa. Yini labayenta kuze basitakale? Pawula wancenga bazalwane bakhe watsi: “Nani ningasita ngekutsi nisincusele.” (2 Khorinte 1:8-11) Umthantazo losuka enhlitiyweni ulusito lolukhulu nangabe ucindzetelekile noma ugula kakhulu.

Kwati kutsi umuntfu lomtsandzako utawufa kuyacindzetela. Loku akumangalisi ngobe asidalelwanga kufa. Besingakadalelwa kutsi semukele kufa njengentfo levamile ekuphileni. (Roma 5:12) Kungako liVi laNkulunkulu litsi kufa ‘kusitsa.’ (1 Khorinte 15:26) Ngako kuyintfo levamile kungafuni kucabanga kutsi umuntfu lomtsandzako utakufa, futsi siyevakala sizatfu saloko.

Noma kunjalo, kukulungela loko lokungenteka kungasita emalunga emndeni kutsi anciphise kwesaba futsi anake kakhulu tindlela tekwenta lesimo sibe ncono. Letinye tintfo letingenteka tisebhokisini lelitsi “ Tintfo Letingenteka Kumuntfu Nasekatawushona.” Kuliciniso kutsi letinye taletintfo letibaliwe kulelibhokisi atenteki kuletinye tigulane, futsi akusho kutsi tenteka ngekulandzelana kwato. Noma kunjalo, letinye taletintfo tiyenteka etigulaneni letinyenti.

Ngemuva kwekufa kwemuntfu lomtsandzako, kungaba kuhlakanipha kutsi utsintse umngani wakho lohlale akusita. Labanakekela logulako kanye nemalunga emndeni badzinga kucinisekiswa kutsi lomuntfu loshonile akasabuva buhlungu futsi akahlupheki. UMdali wetfu lositsandzako uyasicinisekisa kutsi “labafile abati lutfo.”​—Umshumayeli 9:5.

Kubalulekile kwetsembela kuJehova nakugula lilunga lemndeni, ngisho nangesikhatsi selishonile kuze ukhone kubhekana nalolo sizi. Angakusita asebentisa labanye bantfu kute bakukhutsate ngemavi nangetento. Doreen utsi: “Ngafundza kwemukela lonkhe lusito lebengilutfola. Ecinisweni samangala ngelusito lolukhulu lesalutfola. Mine nemyeni wami bekusicacela kutsi Jehova utsi: ‘Nginani kute nginisite nikhone kubhekana nalesimo,’ futsi angeke ngize ngilukhohlwe lolusito.”

Jehova Nkulunkulu unguMnakekeli wetfu lomkhulu. Njengobe anguMdali wetfu, ubucondza kahle buhlungu nelusizi lesibhekana nalo. Angakhona kusinika lusito lesiludzingako kanye nesikhutsato kute sikhone kubhekana nesimo lesimatima, futsi uyafisa kwenta njalo. Uphindze etsembise kutsi madvutane utawucedza kufa ngalokuphelele aphindze akhumbule tigidzi tebantfu labafile futsi abavuse. (Johane 5:28, 29; Sembulo 21:3, 4) Ngaleso sikhatsi sitawukhona kuvumelana nemavi emphostoli Pawula latsi: “Kufa, kuphi kuncoba kwakho? Kufa, luphi ludvonsi lwakho?”​—1 Khorinte 15:55.