Kulukhuni kutfola sipho lesikahle longasipha lomunye umuntfu. Ngetulu kwaloko, ngulolophiwako loncumako kutsi lesipho lomupha sona sikahle yini noma cha. Futsi loko lokutsandvwa ngulomunye kungenteka lomunye angakutsandzi.

Sibonelo saloku, umuntfu lomusha angacabanga kutsi tintfo tebucwephesha takamuva tingaba sipho lesikahle kuye. Ngakulolunye luhlangotsi, umuntfu lomdzala angajabulela kutfo sipho lesinemlandvo wemndeni wakubo nobe lesinelifa lakubo. Kulamanye emasiko, sipho lesikahle kubantfu labasha nobe labadzala yimali, ngobe bayakhona kutsenga loko labakufunako.

Nobe kulukhuni kutfola sipho lesikahle, kodvwa bantfu bayachubeka bafuna sipho lesingalungela umuntfu labamtsandzako. Ngisho nobe kungasimelula kutfola sipho lesikahle, kodvwa kucabanga ngetintfo letitsite letibalulekile kungenta kube melula kupha umuntfu sipho lesikahle. Asesicoce ngetintfo letine letingasisita kutsi siphe umuntfu sipho lesitamjabulisa.

Tati tifiso taloyo lofuna kumupha. Lenye indvodza yase-Belfast, eNyakatfo ne-Ireland, yatsi sidududu semjako leyaphiwa sona nayineminyaka lengu-10 kuya ku-11 budzala, saba sipho lesikhulu kutendlula tonkhe. Kungani? Utsi: “Bengisifuna kakhulu.” Loku kukhombisa kutsi sifiso semuntfu ngiso lesincumako kutsi utasijabulela yini lesipho nobe cha. Ngako cabanga ngalomuntfu lofuna kumupha sipho. Yetama kutfola langase akutsandze ngobe intfo umuntfu layitsandzako ngalokuvamile ihambisana nesifiso sakhe. Nasi sibonelo, bantfu labadzala ngalokuvamile bajabulela kuba nemindeni yabo. Bangase bafise kuba nebantfwana babo kanye nebatukulu ngaso sonkhe sikhatsi. Ngako kuvakasha nabo kungaba sipho lesikhulu kakhulu kubo.

Indlela leyinhloko yekwati loko lokufiswa ngumuntfu, kuba silaleli lesihle. LiBhayibheli lisikhutsata kutsi ‘sisheshe kulalela, sephute kukhuluma.’ (Jakobe 1:19) Nangabe nicoca nemngani wakho nobe nesihlobo sakho, lalelisisa kute utfole loko lakutsandzako naloko langakutsandzi. Nawenta njalo utawukhona kubapha tipho labatawutijabulela.

Tati tidzingo taloyo lofuna kumupha. Umuntfu lophiwako angajabulela ngisho nesipho lesincane nangabe singuloko lakudzingako. Kodvwa nguyiphi  indlela longakwati ngayo loko lokudzingwa ngumuntfu?

Kungase kubonakale kuyindlela lelula kutsi umbute ngaloko lakudzingako nobe lakufunako. Nobe kunjalo, loko kwenta bantfu labanyenti labaphako bangajabuli ngalendlela lebebangajabula ngayo nangabe leso sipho sivele sakhetfwa ngibo. Ngetulu kwaloko, labanye bantfu bangase bative bakhululelikile kukhuluma ngaloko labakutsandzako naloko labangakutsandzi, kodvwa kungasabi njalo nabakhuluma ngetidzingo tabo.

Ngako-ke, hlala ugadzile futsi unakisise timo taloyo muntfu. Naka kutsi ngumuntfu lomncane yini nobe ngumuntfu lomdzala, ushadile nobe akashadi, udivosile nobe ufelwe nguloyo bekashade naye, uyasebenta nobe sewutsetse umhlala phansi? Ngako cabanga ngetipho letingahlangabetana netidzingo taloyo lofuna kumupha.

Kute ukwati kucondzisisa loko lokudzingwa nguloyo muntfu buta labanye labasesimeni lesifana nesakhe. Bangase bakutjele ngetidzingo letikhetsekile temuntfu losesimeni lesinjalo letingatiwa ngulabanye bantfu. Loku kungakusita kutsi utfole sipho lesikahle lesitohambelana nesidzingo saloyo muntfu labanye labangasati.

Khetsa sikhatsi lesikahle. LiBhayibheli litsi: “Kuhle kunika imphendvulo lefanele ngesikhatsi lesifanele!” (Taga 15:23) LomBhalo ukhombisa kutsi emavi lakhulunywe ngesikhatsi lesikahle angafeza indzima lenkhulu. Loku kuyintfo lefanako nangetento tetfu lesitentela labanye. Njengobe emavi lakhulunywe ngesikhatsi lesikahle amjabulisa loyo lowalalele, kanjalo nesipho lesefike ngesikhatsi lesifanele singamjabulisa kakhulu loyo lophiwako.

Mhlawumbe umngani wakho ulungiselela kushada. Umuntfu losemusha sewutawucendza esikolweni. Kungenteka bantfu labashadene batawuba nemtfwana. Laba ngulabanye labavamise kuphiwa tipho. Labanye bakukhandze kuncono kubhala luhla lwemicimbi lenjengalena letawubakhona emnyakeni lolandzelako. Loku kubenta bakhone kuhlela kusengaphambili kutsi ngusiphi sipho lesikahle labangasitsenga lesihambelana naloyo mcimbi. *

Kuliciniso kutsi akukafanele siphe bantfu tipho ngemalanga lakhetsekile nje kuphela. Ungakujabulela kupha labanye tipho nobe nini nawufuna. Nobe kunjalo, kufanele wente tintfo ngekuhlakanipha. Sibonelo saloku kutsi nangabe umuntfu wesilisa apha umuntfu wesifazane sipho ngaphandle kwesizatfu, lomuntfu wesifazane angaphetsa ngekutsi umupha lesipho ngoba ufuna bagcine sebatsandzana. Nangabe lomuntfu wesilisa akahlosi loko, lesipho singabanga kudideka kanye netinkinga kulowesifazane. Loku kuholela kulesinye sizatfu lesibalulekile lokufanele sicatjangelwe—tinhloso talona lophako.

Bani netinhloso letinhle. Njengobe sibonile kulesibonelo lesisuka kuso, kukuhlakanipha kucabanga ngaloko lokungase kucatjangwe nguloyo lophiwako ngetinhloso talona lophako. Ngesikhatsi lesifanako, naloyo lophako kufanele acabangisise ngetinhloso takhe. Nanobe bantfu labanyenti bacabanga kutsi basuke banetinhloso letinhle nabapha labanye, kodvwa labanyenti babo bakwenta loko ngekucindzetelwa ngobe kusuke kusikhatsi sekuphana tipho. Kantsi labanye bapha labanye ngenjongo yekutsi baphatfwe ngendlela lekhetsekile nobe batfole lokutsite ngemuva kwaloko.

Yini longayenta kute sipho sakho sibonakale kutsi sinetisusa letinhle? LiBhayibheli litsi: “Konkhe lenikwentako kwenteni ngelutsandvo.” (1 Khorinte 16:14) Nangabe uphe lomunye ngenca yelutsandvo nangekucabangela loyo lomphako, sipho sakho sitawemukelwa ngenjabulo futsi nawe utawujabula kakhulu ngenca yekutsi ukhombise umusa. Nangabe upha labanye ngalokusuka enhlitiyweni naBabe wetfu losezulwini uyajabula. Umphostoli Pawula wadvumisa emaKhristu aseKhorinte ngemusa lebekanawo kanye nangekusita lamanye emaKhristu  lebekaseJudiya ngalokusuka enhlitiyweni. Pawula wabatjela watsi “Nkulunkulu utsandza umuntfu lopha ajabulile.”​—2 Khorinte 9:7.

Kucabangisisa ngaloko lesesicoce ngako kungaletsa injabulo lenkhulu kulabo lobapha tipho. Letintfo lesesicoce ngato kanye naletinye tibe nendzima lenkhulu elungiselweni laNkulunkulu ekupheni bantfu sipho lesikhulu kakhulu. Sikumema kutsi ucabangisise ngalesipho lesikhulu ngekutsi ufundze lesihloko lesilandzelako.