Na Batho Bohle ba Lokileng ba ea Leholimong?

KA MOR’A lijo tsa ho qetela le baapostola ba hae, bosiung ba pele a bolaoa, Jesu o ile a tšepisa hore o tla ba putsa ka ho ba fa sebaka leholimong. O ile a re: “Ka tlung ea Ntate ho na le libaka tse ngata tsa bolulo. Ho seng joalo, nka be ke le boleletse, hobane ke il’o le lokisetsa sebaka.” (Johanne 14:2) Ke hobane’ng ha Jesu a tla ba fa sebaka leholimong? Ba tla etsa’ng teng?

Jesu o ne a nahanne ka mosebetsi oa bohlokoa oo barutuoa ba hae ba neng ba tla o etsa. Bosiung bona boo o ile a re: “Ke lōna ba nkhomaretseng litekong tsa ka; ’me ke etsa selekane le lōna, feela joalokaha Ntate a entse selekane le ’na, bakeng sa ’muso.” (Luka 22:28, 29) Molimo o ne a tšepisitse Jesu hore e tla ba Morena ea tla fana ka seo batho ba hlileng ba se hlokang—e leng puso e khotsofatsang. Jesu o tla pholosa batho mahlomoleng a be a silakanye ba ba etsetsang bolotsana. Le hoja Jesu a tla ba le bafo “ho ea lipheletsong tsa lefatše,” o tla busa a le leholimong.—Pesaleme ea 72:4, 8; Daniele 7:13, 14.

Leha ho le joalo, Jesu a ke ke a busa a le mong. Ke kahoo a ileng a tšepisa baapostola ba hae ho ba fa sebaka leholimong. Ke bona ba pele ba ileng ba khetheloa ho “busa e le marena holim’a lefatše.”—Tšenolo 5:10.

Ke ba bakae ba eang leholimong? Ho tšoana le mebuso e meng kaofela, babusi ba ’Muso oa Molimo oa leholimo ba ’maloa ha ba bapisoa le bafo bohle ba puso eo. Jesu o ile a re ho bohle ba tla busa le eena: “Le se ke la tšaba, mohlatsoana, hobane Ntat’a lōna o amohetse ho le fa ’muso.” (Luka 12:32) Qetellong “mohlatsoana” oo o tla etsa palo ea ba 144 000. (Tšenolo 14:1) Palo eo ea fokola ha e bapisoa le batho ba limilione ba tla thabela bophelo bo sa feleng lefatšeng e le bafo ba tšepahalang ba ’Muso oo.—Tšenolo 21:4.

Ka hona, hase batho bohle ba lokileng ba eang leholimong. Ka tsela e hlakileng, moapostola Petrose o ile a re ka Morena Davida ea lokileng: “Davida ha aa ka a nyolohela maholimong.” (Liketso 2:34) Johanne Mokolobetsi e ne e le motho ea lokileng. Leha ho le joalo, Jesu o ile a re a ke ke a phahamisoa ho ea busa e le morena leholimong. Jesu o ile a re: “Har’a ba tsoetsoeng ke basali ha ho e-s’o hlahisoe e moholo ho Johanne Mokolobetsi; empa motho e monyenyane ’musong oa maholimo o moholo ho eena.”—Matheu 11:11.

Na U Tla Fumana Moputso oa Batho ba Lokileng?

Motho o lokela ho etsa’ng e le hore a fumane moputso oa ho phela ka ho sa feleng lefatšeng? Jesu o ile a re: “Molimo o ratile lefatše haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.” (Johanne 3:16) Hlokomela hore lerato leo Molimo a ratang lefatše ka lona le etsa hore a fe bohle monyetla oa ho fumana bophelo bo sa feleng, empa ha e le hantle ke ba “bontšang tumelo” feela ba tla fumana moputso oo.

Tumelo e lokela ho thehoa tsebong e nepahetseng. (Johanne 17:3) U ka bontša hore u motho ea lokileng ka ho ithuta ho eketsehileng ka seo Jehova a se rerileng ka batho. Bontša ka liketso hore u na le tumelo ho seo u ithutang sona, u be u kholisehe hore u hlile u na le monyetla oa ho phela ka ho sa feleng.

 [Lebokose le leqepheng la 7]

Bibele e Ruta’ng?

Potso:

Ho etsahala’ng ha batho ba lokileng ba e-shoa?

Karabo:

“Ha e le ba shoeleng, ho hang ha ba tsebe letho.”—MOEKLESIA 9:5.

Potso:

Batho ba lokileng ba na le tšepo efe ka bokamoso?

Karabo:

“Hora ea tla eo ka eona bohle ba mabitleng a khopotso ba tla utloa lentsoe la [Jesu] ’me ba tsoe.”—JOHANNE 5:28, 29.

Potso:

Batho ba bangata ba lokileng ba tla phela hokae?

Karabo:

“Ba lokileng ba tla rua lefatše, ba tla lula ho lona ka ho sa feleng.”—PESALEME EA 37:29.