FEBRUARI 13, 2024
URUSI

Wanakazia Fikira Heshima ya Kumtumikia Yehova

CHEZA

Mahakama ya Wilaya ya Vyselkovskiy iliyo katika Eneo la Krasnodar itatangaza uamuzi wake hivi karibuni katika kesi inayowahusu Ndugu Yevgeniy Bochko, Ndugu Vladimir Kolesnikov, Ndugu Aleksey Shubnikov, Ndugu Vitaliy Ushakov, na Ndugu Valeriy Vechkayev. Mwendesha-mashtaka bado hajatoa ombi la hukumu anayopendekeza.

Maelezo Mafupi Kuwahusu

Yevgeniy Bochko

Alizaliwa: 1975 (Novoberezansky, Eneo la Krasnodar)

Maisha Yake: Alifanya kazi akiwa injinia wa udumishaji

Alisali kwa Mungu ili amsaidie kuitambua dini ya kweli. Alibatizwa mwaka wa 1998 na kuwa mmoja wa Mashahidi wa Yehova

Alifunga ndoa na Anna mwaka wa 2009

Aligunduliwa kuwa na ugonjwa wa mfumo wa neva

Maelezo ya Kibinafsi

Ulikuwa ukifikiria nini ulipokuwa ukihojiwa kuhusu kesi hii ya uhalifu?

Wakati huo wote mimi na mke wangu tulikuwa tunasali Yehova atusaidie kulitukuza jina lake. Tulipata nafasi ya kufanya hivyo. Mmoja wa wapelelezi alipokuwa akipitia hati za kesi ya uhalifu, alituuliza maswali mbalimbali kuhusu Mashahidi wa Yehova. Kulikuwa na mabuku 17 yenye maelezo yanayohusiana na kesi yetu yaliyo na kurasa kati ya 100 na 350. Jina Yehova linapatikana katika karibu kila ukurasa. Ni heshima kubwa sana kushiriki kulitangaza jina lake.

Vladimir Kolesnikov

Alizaliwa: 1946 (Ukrainia)

Maisha Yake: Alistaafu kutoka jeshini. Baadaye, alifanya kazi katika kiwanda cha madini

Alifunga ndoa na Zinaida mwaka wa 1979. Wana mabinti wawili na mwana mmoja. Zinaida alikufa mwaka wa 2020

Yeye na mke wake walijifunza Biblia na Mashahidi wa Yehova. Wote walibatizwa mwaka wa 1995

Maelezo ya Kibinafsi

Ni nini kimekusaidia kudumisha mtazamo mzuri licha ya majaribu?

Haikuwa rahisi mara zote kukabiliana na changamoto. Nimejifunza kukabiliana na hisia za kuvunjika moyo. Ninasali na kusoma machapisho niliyo nayo ili kujiimarisha kiroho. Uthamini wangu kuelekea Neno la Mungu umeongezeka, na nimejifunza umuhimu wa kumweleza Yehova kila kitu kupitia sala. Ninapofikiria nyuma ninatambua kwamba nilijaribu kushughulikia changamoto zangu kwa kutegemea uwezo wangu mwenyewe. Lakini sasa ninapozungumza na Yehova kuhusu hisia zangu, woga wangu, na shangwe yangu, hilo hunipa amani.

Vitaliy Ushakov

Alizaliwa: 1980 (Khatukay, Jamhuri ya Adygeya)

Maisha Yake: Alifanya kazi akiwa fundi wa magari. Alijifunza kweli kutoka kwa mama yake. Alithamini sana ahadi ya Biblia ya wakati ujao wenye furaha. Alibatizwa mwaka wa 1995

Alifunga ndoa na Irina mwaka wa 2006. Wana wana wawili

Maelezo ya Kibinafsi

Ni nini kilichokusaidia kuvumilia ulipokuwa mahabusu?

Mwanzoni nilikaa mahabusu kwa muda wa mwezi mmoja na nusu hivi bila kuwa na Biblia. Kwa hiyo, niliandika mistari ya Biblia ambayo nilikumbuka kwenye daftari pamoja na mambo niliyofikiria kuhusu kila mstari. Hilo lilinisaidia sana nilipofungwa nikiwa peke yangu kwenye chumba cha gereza. Kufanya hivyo pia, kulinisaidia kuchanganua hisia zangu. Sasa niko karibu zaidi na Yehova, na nimeazimia hata zaidi kufuata viwango vyake.

Valeriy Vechkayev

Alizaliwa: 1973 (Vyselki, Eneo la Krasnodar)

Maisha Yake: Ni mjenzi anayeshughulikia hatua za mwisho za ujenzi ndani ya nyumba. Alivutiwa na viwango vya juu vya maadili vinavyopatikana katika Biblia na jinsi Mashahidi wa Yehova wanavyoishi kupatana na viwango hivyo. Alibatizwa mwaka wa 1999

Alifunga ndoa na Irina mwaka wa 1996. Wana watoto wawili kiume na mmoja wa kike

Maelezo ya Kibinafsi

Yehova amekusaidiaje kukabiliana na jaribu hili?

Yehova amenisaidia katika njia nyingi. Ndugu na dada zangu walisali kwa ajili yangu na wakanisaidia kimwili na kihisia. Na kupitia utimizo wa unabii wa Biblia, Yehova anaonyesha wazi kwamba ulimwengu mpya uko karibu sana. Hilo limenisaidia kuona majaribu yangu ya sasa kama ukungu. Yanakuja katika mwonekano na ukubwa tofauti, lakini yatafikia mwisho wake. Ninamshukuru sana Yehova kwa sababu ananipa nguvu za kuvumilia katika kipindi hiki kifupi cha wakati.

Tuna uhakika kwamba Yehova ataendelea kuwapa nguvu na shangwe ndugu hao na wale wote wanaoendelea kumtegemea ili kupata msaada.—Zaburi 141:8.

Mfuatano wa Matukio

Februari 11, 2022

Kesi ya uhalifu ilifunguliwa dhidi ya Yevgeniy, Aleksey, Vitaliy, na Valeriy
Februari 13, 2022

Nyumba zilifanyiwa msako. Yevgeniy, Aleksey, na Vitaliy walihojiwa. Vitaliy aliwekwa kizuizini
Februari 15, 2022

Vitaliy alipelekwa mahabusu
Februari 16, 2022

Yevgeniy na Aleksey waliwekewa vizuizi vya kusafiri
Februari 18, 2022

Valeriy aliwekewa vizuizi vya kusafiri
Februari 21, 2022

Kesi ya uhalifu ilianzishwa dhidi ya Vladimir
Machi 15, 2022

Vladimir aliwekewa vizuizi vya kusafiri. Kesi za uhalifu ziliunganishwa na kuwa kesi moja
Septemba 8, 2022

Vitaliy aliachiliwa kutoka mahabusu na kuwekwa katika kifungo cha nyumbani
Oktoba 10, 2022

Vitaliy aliachiliwa kutoka katika kifungo cha nyumbani na kuwekewa vizuizi vya kusafiri
Mei 31, 2023

Kesi ya uhalifu ilianza

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI