Tanba teknolojia neʼebé avansadu, Ita-nia patraun, kolega serbisu, ka kliente bele kontaktu Ita iha tempu naran deʼit no fatin naran deʼit. Maibé ida-neʼe bele halo susar ba Ita atu iha moris neʼebé balansu no tau uluk buat neʼebé importante liu iha Ita-nia moris, inklui iha Ita-nia moris kaben nian.

•  Buat neʼebé Ita presiza hatene

•  Oinsá atu bele balansu

•  Buat neʼebé kaben-naʼin sira hatete

•  Oinsá atu koʼalia hamutuk

•   Teknolojia bele halo Ita gasta tempu barak demais atu halo serbisu toʼo ladún fó atensaun ba Ita-nia kaben. Rezultadu mak Ita sente katak Ita presiza atende kedas telefone, e-mail ka mensajen kona-ba serbisu neʼebé tama maski laʼós iha ita-nia oras serbisu.

   “Uluk depois fila serbisu, baibain ema bele uza sira-nia tempu hamutuk ho família. Maibé agora neʼe susar tebes atu halo tanba kuandu Ita simu telefone ka e-mail kona-ba serbisu, neʼe dada kedas Ita-nia atensaun ba serbisu duké ba Ita-nia pár.”—Jeanette.

•   Atu bele fahe tempu ba família no serbisu, Ita mak presiza iha inisiativu. Halo planu ho didiʼak atu nuneʼe Ita-nia serbisu la hadau fali tempu neʼebé Ita presiza uza hamutuk ho Ita-nia kaben.

   “Bainhira ita sai okupadu liu ho serbisu, baibain ita sei ladún tau atensaun ba ita-nia kaben, tanba Ita hanoin katak ‘Nia sei komprende. Nia sei perdua haʼu. Depois mak haʼu gasta tempu ho nia’.”—Holly.

•   Tau uluk Ita-nia moris kaben nian. Bíblia dehan: “Buat neʼebé Maromak tau hamutuk, ema keta haketak.” (Mateus 19:6) Klaru katak Ita lakohi buat naran deʼit atu “haketak” Ita ho Ita-nia kaben. Tan neʼe, Ita mós lakohi Ita-nia serbisu haketak Ita husi Ita-nia kaben.

   “Kliente balu sente katak sira bele bolu ita iha tempu naran deʼit neʼebé sira presiza tanba sira selu ita. Haʼu rekoñese katak haʼu-nia moris kaben nian mak importante liu, tan neʼe haʼu fó-hatene ba haʼu-nia kliente sira katak haʼu labele atende sira iha loron neʼebé haʼu la serbisu, maibé haʼu sei kontaktu fali sira.”—Mark.

   Husu ba Ita-nia an: ‘Haʼu-nia hahalok hatudu katak haʼu hafolin haʼu-nia moris kaben nian liu fali serbisu ka lae?’

•   Dala ruma, Ita presiza dehan ‘Lae’. Bíblia dehan: “Matenek sei hamutuk ho ema neʼebé haraik an.” (Provérbios 11:2) Ema neʼebé haraik an hatene bainhira mak nia presiza la simu serbisu ka entrega fali ida-neʼe ba ema seluk.

   “Haʼu serbisu atu monta kanu sira. Tan neʼe kuandu derrepente mosu situasaun emerjénsia, baibain ema telefone haʼu no hakarak haʼu atende lalais. Se haʼu hanoin katak haʼu rasik labele halo hotu serbisu neʼe tuir tempu neʼebé nia hakarak, haʼu entrega serbisu neʼe ba ema seluk.”—Christopher.

   Husu ba Ita-nia an: ‘Haʼu prontu atu la simu serbisu estra se ida-neʼe hanetik haʼu atu uza tempu hamutuk ho haʼu-nia kaben ka lae? Haʼu-nia kaben hanoin oinsá kona-ba neʼe?’

•   Halo planu atu gasta tempu hamutuk. Bíblia dehan: “Iha tempu neʼebé loos ba buat hotu.” (Eclesiastes 3:1) Bainhira Ita okupadu ho serbisu, Ita presiza hakaʼas an atu halo planu hodi gasta tempu hamutuk ho Ita-nia kaben no kumpre Ita-nia planu neʼe.

   “Bainhira ami okupadu tebes, baibain ami halo planu atu halo buat ruma hamutuk, maski atividade simples deʼit hanesan han-kalan hamutuk ka laʼo halimar iha tasi-ibun. Buat neʼebé importante mak ami rua bele gasta tempu hamutuk no la husik buat ruma atrapalla ami.”—Deborah.

   Husu ba Ita-nia an: ‘Haʼu halo planu atu gasta tempu mesamesak hamutuk ho haʼu-nia kaben ka lae? Haʼu-nia kaben hanoin oinsá kona-ba neʼe?’

•   Hamate Ita-nia sasán eletróniku. Bíblia dehan: “Buka-hatene loloos buat sira neʼebé importante liu.” (Filipe 1:10) Dala ruma, diʼak atu hamate Ita-nia telemovel ka tablet atu nuneʼe mensajen ka telefone kona-ba serbisu la atrapalla Ita.

   “Haʼu hakaʼas an atu la halo serbisu liu oras serbisu nian. No kuandu oras serbisu hotu, haʼu hamate telemovel nia lian.”—Jeremy.

   Husu ba Ita-nia an: ‘Haʼu sente katak haʼu presiza haree beibeik haʼu-nia telefone atu bele atende lalais se patraun ka kliente telefone ka lae? Haʼu-nia kaben hanoin oinsá kona-ba neʼe?’

•   Adapta tuir situasaun. Bíblia dehan: “Halo ema hotu haree katak imi la ulun-toos.” (Filipe 4:5) Klaru katak dala ruma, iha duni serbisu neʼebé Ita presiza halo duké gasta tempu hamutuk ho Ita-nia kaben. Porezemplu, karik Ita-nia kaben nia serbisu, envolve atende ema lalais maski neʼe laʼós ninia oras serbisu. Se nuneʼe, ita labele ulun-toos no labele ezije demais Ita-nia kaben.

   “Haʼu-nia laʼen halaʼo negósiu kiʼik ida, no dala barak nia presiza atende situasaun emerjénsia ruma depois ninia oras serbisu. Dala ruma, haʼu hirus uitoan, maibé ami nafatin gasta tempu barak hamutuk, tan neʼe la problema.”—Beverly.

   Husu ba Ita-nia an: ‘Haʼu koko atu komprende haʼu-nia kaben nia serbisu no la ezije demais ninia atensaun ka lae? Haʼu-nia kaben hanoin oinsá kona-ba neʼe?’

 Primeiru, feen no laʼen bele hatán pergunta sira tuirmai neʼe ketaketak. Tuirmai, koʼalia hamutuk kona-ba dalan neʼebé Ita hatán pergunta sira-neʼe.

•   Uluk, Ita-nia kaben la kontente no muramura bainhira Ita serbisu nafatin maski oras serbisu liu ona? Se nuneʼe, Ita rasik hanoin oinsá?

•   Tuir Ita-nia hanoin, saida deʼit mak Ita bele halo atu bele fahe didiʼak tempu ba família no halo serbisu?

•   Ita sente katak Ita-nia kaben sempre hanoin hela deʼit kona-ba serbisu ka lae? Se sin, konta toʼok situasaun ida nuʼudar ezemplu.

•   Tuir Ita-nia hanoin, Ita-nia kaben presiza halo mudansa saida deʼit atu bele balansu?