Sé mak sei bá lalehan?

LOKE

Bíblia nia resposta

Maromak hili ema Kristaun balu neʼebé laran-metin atu hetan moris-hiʼas ba lalehan. (1 Pedro 1:3, 4) Bainhira Maromak hili ona sira, sira tenke kontinua hatudu fiar neʼebé metin nuʼudar ema Kristaun no hatudu hahalok moos nafatin atu sira bele hetan kolen iha lalehan.—Éfeso 5:5; Filipe 3:12-14.

Ema neʼebé bá lalehan sei halo saida iha neʼebá?

Sira sei serbí hamutuk ho Jesus nuʼudar liurai no amlulik durante tinan 1.000. (Apokalipse 5:9, 10; 20:6) Sira sei sai parte ba “lalehan foun”, ka governu iha lalehan neʼebé sei ukun “rai foun”, ka ema iha rai. Sira neʼebé ukun iha lalehan sei ajuda ema atu sai perfeitu fali iha dalan fíziku, mentál no espirituál tuir Maromak nia hakarak.—Isaias 65:17; 2 Pedro 3:13.

Ema naʼin-hira mak sei moris hiʼas ba lalehan?

Bíblia fó sai katak ema naʼin-144.000 mak sei hetan moris-hiʼas ba lalehan. (Apokalipse 7:4) Iha vizaun neʼebé hakerek iha Apokalipse 14:1-3, apóstolu João “haree Bibi-Oan hamriik iha Foho Siaun hamutuk ho ema naʼin-144.000”. Iha vizaun neʼe, “Bibi-Oan” reprezenta Jesus Kristu neʼebé moris hiʼas ona. (João 1:29; 1 Pedro 1:19) “Foho Siaun” reprezenta pozisaun aas neʼebé Jesus no ema naʼin-144.000 iha.—Salmo 2:6; Ebreu 12:22.

Bíblia hanaran ema sira neʼebé “Maromak bolu no hili ona” atu ukun hamutuk ho Kristu iha Maromak nia Ukun nuʼudar “bibi-lubun kiʼik”. (Apokalipse 17:14; Lucas 12:32) Neʼe hatudu katak sira mak ema uitoan deʼit se kompara ho Jesus nia bibi hotu.—João 10:16.

Hanoin neʼebé sala kona-ba ema neʼebé sei bá lalehan

Hanoin neʼebé sala: Ema diʼak hotu sei bá lalehan.

Hanoin neʼebé loos: Maromak promete katak ema diʼak bele moris ba nafatin iha rai.—Salmo 37:11, 29, 34.

Jesus hatete: “La iha ema ida neʼebé saʼe ona ba lalehan.” (João 3:13) Ninia liafuan sira-neʼe hatudu katak ema diʼak neʼebé moris antes nia hanesan Abraão, Moisés, Job no David la bá lalehan. (Apóstolu 2:29, 34) Maibé sira iha esperansa atu hetan moris-hiʼas iha rai.—Job 14:13-15.
Bíblia bolu moris-hiʼas ba lalehan nuʼudar “moris-hiʼas primeiru”. (Apokalipse 20:6) Ida-neʼe katak sei iha moris-hiʼas ida tan. Moris-hiʼas neʼe sei akontese iha rai.
Bíblia hanorin katak iha Maromak nia Ukun okos “mate sei la iha tan”. (Apokalipse 21:3, 4) Promesa neʼe tenke aplika ba mundu tanba mate nunka akontese iha lalehan.

Hanoin neʼebé sala: Ema ida-idak mak deside se nia hakarak hetan moris-hiʼas ba lalehan ka iha rai.

Hanoin neʼebé loos: Maromak mak deside ema Kristaun laran-metin neʼebé sei simu kolen atu moris-hiʼas ba lalehan. (Filipe 3:14) Ema ida nia hakarak ka hakaʼas an atu bá lalehan labele afeta Maromak nia desizaun neʼe.—Mateus 20:20-23.

Hanoin neʼebé sala: Esperansa atu moris ba nafatin iha rai ladún iha folin se kompara ho esperansa atu bá lalehan. Só ema neʼebé la merese atu bá lalehan mak simu kolen atu moris iha rai.

Hanoin neʼebé loos: Maromak bolu ema neʼebé sei simu moris ba nafatin iha rai nuʼudar “haʼu-nia povu”, “sira neʼebé haʼu hili ona” no ema neʼebé “Jeová fó ona bensaun”. (Isaias 65:21-23) Sira sei hetan priviléjiu atu kumpre Maromak nia planu ba ema iha rai, katak moris perfeitu ba nafatin.—Génesis 1:28; Salmo 115:16; Isaias 45:18.

Hanoin neʼebé sala: Númeru 144.000 neʼebé temi iha livru Apokalipse mak simbóliku deʼit.

Hanoin neʼebé loos: Maski dala ruma, livru Apokalipse uza númeru sira iha dalan simbóliku, maibé númeru balu neʼebé temi iha livru Apokalipse laʼós simbóliku. Porezemplu, livru Apokalipse temi kona-ba “Bibi-Oan nia apóstolu naʼin-12 nia naran”. (Apokalipse 21:14) Haree toʼok evidénsia tanbasá ita bele fiar katak númeru 144.000 laʼós simbóliku deʼit.

Apokalipse 7:4 hatete katak “númeru husi sira neʼebé hetan sinál, [ka deside ona katak sei moris iha lalehan] sira hamutuk naʼin-144.000”. Kontestu husi versíkulu neʼe mós kompara grupu neʼe ho grupu ida tan. Grupu neʼe mak “ema-lubun boot neʼebé sura labele”. Ema neʼebé sai parte ba “ema-lubun boot” neʼe mós simu salvasaun husi Maromak. (Apokalipse 7:9, 10) Se númeru 144.000 mak simbóliku deʼit no refere deʼit grupu ida neʼebé ita la hatene iha ema naʼin-hira, entaun neʼe katak Bíblia la presiza hakerek komparasaun entre grupu rua neʼe. a

Liután neʼe, Bíblia dehan katak ema naʼin-144.000 “sosa ona husi ema nia leet nuʼudar ai-fuan primeiru”. (Apokalipse 14:4) Liafuan “ai-fuan primeiru” hatudu katak sira mak ema uitoan deʼit. Liafuan neʼe diʼak atu refere ba sira neʼebé sei ukun hamutuk ho Kristu iha lalehan no sira sei ukun ema barak iha mundu neʼebé labele sura.—Apokalipse 5:10.

a Profesór Robert L. Thomas mós hakerek kona-ba númeru 144.000 neʼebé temi iha Apokalipse 7:4 hodi dehan: “Bíblia temi 144.000 atu kompara duni ho númeru neʼebé temi iha Apokalipse 7:9 neʼebé labele sura. Se ita dehan katak númeru neʼe mak simbóliku deʼit, entaun neʼe katak ita tenke haree númeru hotu iha livru neʼe nuʼudar simbóliku deʼit.”—Revelation 1-7: An Exegetical Commentary, pájina 474.