Ema barak neʼebé besik atu mate no depois sai diʼak fali hatete katak iha tempu neʼebá sira-nia neon sai ketak husi sira-nia isin, ka sira haree naroman nabilan ka fatin neʼebé kapás loos. Livru Recollections of Death dehan: ‘Ema balu hanoin esperiénsia neʼe nuʼudar oportunidade espesiál ida atu haree moris iha mundu seluk.’ Maski Bíblia la temi kona-ba esperiénsia kuandu ema besik atu mate, maibé Bíblia fó sai lia-loos importante neʼebé hatudu katak esperiénsia sira-neʼe laʼós vizaun kona-ba moris tuirmai.

 Ema mate la hatene buat ida.

Bíblia hatete katak ema neʼebé mate ona “la hatene buat ida”. (Eclesiastes 9:5) Kuandu ita mate, ita la bá fatin espesiál seluk, maibé ita la eziste tan. Bíblia la hanorin katak ema iha klamar neʼebé bele haketak an husi isin. (Ezequiel 18:4) Tan neʼe, se ema besik atu mate no haree buat ruma, neʼe laʼós lalehan, infernu, ka moris seluk depois mate.

 Lázaro konta buat ruma kona-ba ninia moris depois mate ka lae?

Bíblia nia istória kona-ba Lázaro ajuda ita komprende kona-ba ema mate nia kondisaun: Jesus halo Lázaro moris fali maski nia mate ona ba loron haat. (João 11:38-44) Se Lázaro goza moris diʼak iha mundu seluk, entaun la diʼak se Jesus halo nia moris fali iha mundu neʼe. Maibé tuir Bíblia, Lázaro la konta buat ida kona-ba moris depois mate. Se Lázaro moris duni iha fatin seluk depois mate, nia sei konta ninia esperiénsia. Tuir loloos, bainhira Lázaro mate Jesus esplika ninia kondisaun mak hanesan toba, neʼe katak Lázaro la hatene buat ida.​—João 11:11-14.