EMA kristaun sira iha apóstolu sira-nia tempu hakaʼas an atu haklaken “liafuan diʼak kona-ba Maromak nia Ukun” ba ema barak. (Mateus 24:14) Sira balu mós bá toʼo rai seluk. Porezemplu, apóstolu Paulo halo viajen nuʼudar misionáriu iha rai ida neʼebé agora ita bolu Turkia, atu bele haklaken ba ema sira iha neʼebá. * Maizumenus tinan 2.000 liutiha, iha tinan 2014, iha tan kampaña espesiál ida atu haklaken iha rai-Turkia. Objetivu ba kampaña neʼe mak saida? No sé mak hola parte?

Haklaken-naʼin iha rai-Turkia mak 2.800 liu maibé populasaun millaun 79. Neʼe katak iha haklaken-naʼin 1 ba ema naʼin–28.000. Testemuña sira iha Turkia konsege haklaken ona ba ema uitoan deʼit husi rai neʼe. Objetivu ba kampaña espesiál neʼe mak atu haklaken ba ema barak liu iha tempu badak nia laran. Irmaun-irmán sira maizumenus naʼin-550 neʼebé hatene koʼalia língua Turkia nian, mai husi rai seluk hodi haklaken hamutuk kongregasaun sira durante kampaña neʼe. Kampaña neʼe lori rezultadu saida?

Testemuña sira fó sasin ba ema barak. Kongregasaun ida iha sidade Istambúl hakerek dehan: “Bainhira ema haree ami, sira husu: ‘Imi atu halaʼo reuniaun boot iha neʼe ka? Tanba ami haree Testemuña ba Jeová iha fatin hotu-hotu!’” Kongregasaun ida iha sidade Izmir hakerek: “Mane ida neʼebé serbisu toma konta ba taksi hakbesik katuas kongregasaun ida no husu, ‘Saida mak akontese? Imi aumenta tan imi-nia haklaken ka?’” Sin, ema bele haree katak Testemuña sira iha neʼebá hakaʼas an duni atu haklaken ba ema barak.

Irmaun-irmán sira neʼebé mai husi rai seluk atu ajuda, gosta tebes hola parte iha kampaña neʼe. Steffen, husi rai-Dinamarka, hatete: “Loroloron haʼu haklaken ba ema neʼebé nunka rona kona-ba Jeová. Haʼu kontente atu hola parte hodi fó sai Jeová nia naran.” Jean-David, husi rai-Fransa hatete: “Ami haklaken iha área ida deʼit ba oras barak. Neʼe kapás loos! Ema barak la hatene sé mak Testemuña ba Jeová. Sira kontente atu koʼalia ho ami, haree ami-nia vídeo sira, no simu livru oioin neʼebé ami fahe.”

 Irmaun-irmán naʼin-550 neʼebé hola parte iha kampaña neʼe fahe livru no broxura hamutuk 60.000 iha semana rua nia laran. Loos duni, liuhusi kampaña neʼe ema barak rona kona-ba lia-loos.

Irmaun-irmán sira sai laran-manas liután. Kampaña espesiál neʼe book tebes irmaun-irmán barak nia laran toʼo sira barak halo planu atu foti pioneiru. Durante fulan 12 liutiha kampaña neʼe, ema naʼin-82 tan foti pioneiru regulár iha rai-Turkia.

Sira neʼebé mai husi rai seluk hatete katak kampaña neʼe ajuda tebes sira-nia serbisu haklaken bainhira sira fila fali ba sira-nia rai. Şirin, irmán ida husi rai-Alemaña, hakerek dehan: “Ba ita-nia maluk sira iha Turkia, haklaken iha dalan la formál mak la susar ba sira. Haʼu fali moe loos kona-ba haklaken la formál. Maibé tanba kampaña neʼe, irmaun-irmán sira-nia ezemplu, no mós liuhusi orasaun, agora haʼu bele halo buat neʼebé uluk haʼu la bele halo. Haʼu mós haklaken no fahe tratu sira iha komboiu fatin. Agora haʼu ladún moe hanesan uluk.”

Johannes, irmaun ida husi Alemaña hatete: “Haʼu aprende buat barak neʼebé haʼu bele halo tuir iha haʼu-nia serbisu haklaken rasik. Irmaun-irmán sira iha Turkia hakarak tebes fahe lia-loos ho ema hotu, tan neʼe sira uza oportunidade hotu atu fó sasin. Bainhira haʼu fila fali ba Alemaña, haʼu deside atu halo tuir sira-nia ezemplu. No agora haʼu hakaʼas an haklaken ba ema barak liu fali uluk.”

Zeynep, husi Fransa hatete: “Kampaña neʼe ajuda tebes haʼu iha serbisu haklaken. Haʼu aprende oinsá atu sai brani liután no atu tau fiar liután ba Jeová.”

Irmaun-irmán sira sai besik liután ba malu. Domin no unidade entre irmaun-irmán sira husi rai oioin mak buat ida neʼebé sira sei nunka haluha. Jean-David hatete katak maluk Testemuña sira hatudu laran-luak tebes. Nia dehan: “Sira haree ami nuʼudar belun no família. Sira loke sira-nia uma ba ami. Haʼu lee dala barak ona kona-ba domin neʼebé Jeová nia povu hatudu ba maluk sira iha mundu tomak, maibé agora haʼu bele sente rasik. Neʼe halo haʼu sente orgullu liután tanba haʼu mak  Testemuña ba Jeová, no haʼu fó agradese ba nia tanba priviléjiu espesiál neʼe.”

Claire, husi Fransa hatete: “Maski ami mai husi Dinamarka, Fransa, Alemaña ka Turkia, ami hotu hanesan família ida deʼit. Neʼe hanesan Jeová uza apagadór boot ida atu hamoos nasaun nia fronteira sira.”

Stéphanie, husi Fransa dehan: “Liuhusi kampaña neʼe ami aprende katak buat neʼebé halo ami iha unidade mak, laʼós kultura ka língua, maibé neʼe mak domin neʼebé ami hotu hatudu ba Jeová.”

Sira neʼebé mai husi rai seluk atu ajuda iha kampaña neʼe, irmaun-irmán barak komesa hanoin atu muda ba Turkia atu ajuda serbisu haklaken iha neʼebá, no barak muda ona. Kongregasaun sira hafolin tebes irmaun-irmán sira-neʼe.

Porezemplu, iha área ida, iha grupu Testemuña sira ho haklaken-naʼin 25 deʼit. Ba tinan barak, iha katuas kongregasaun ida deʼit iha fatin neʼe. Sira kontente tebes bainhira ema naʼin-neen muda husi Alemaña no Olanda iha tinan 2015 atu ajuda sira!

Sira neʼebé muda ba Turkia atu ajuda haklaken, hanoin oinsá kona-ba sira-nia moris iha neʼebá? Dala ruma sira hasoru duni susar oioin, maibé sira mós simu bensaun barak. Haree toʼok kona-ba saida mak sira hatete.

Federico, kaben-naʼin ida neʼebé tinan 40 liu, husi rai-España hatete: “Tanba haʼu la iha sasán barak neʼebé preokupa haʼu-nia tempu, haʼu sente livre no haʼu bele fó tempu ba buat neʼebé importante liu.” Federico mós hakarak ema seluk atu koko ajuda haklaken iha fatin seluk. Nia dehan: “Se ita muda ba fatin seluk ho objetivu atu ajuda ema koñese Jeová, ita entrega ita-nia an ba Jeová nia liman. Ita bele sente duni katak Jeová mak tau matan ba ita.”

Rudy, kaben-naʼin ida besik tinan 60 husi rai-Olanda. Nia hatete: “Serbí iha fatin neʼebé presiza tebes haklaken-naʼin sira, neʼe halo ami kontente,  tanba ami bele fahe lia-loos ba ema barak neʼebé seidauk rona kona-ba Jeová. Atu haree oinsá ema sente kontente bainhira sira simu lia-loos, neʼe lori ksolok ba ami.”

Sascha, irmaun kaben-naʼin ida tinan 40 liu neʼebé muda husi Alemaña, hatete: “Bainhira haʼu bá haklaken, haʼu sempre hasoru ema neʼebé seidauk hatene kona-ba lia-loos. Hodi fó oportunidade ba sira atu rona kona-ba Jeová halo haʼu sente kontente tebes.”

Atsuko, irmán kaben-naʼin ida tinan 30 liu husi Japaun, hatete: “Uluk, haʼu-nia hakarak mak Armajedón mai lalais. Maibé bainhira haʼu muda tiha ba Turkia, haʼu agradese ba Jeová tanba nia sei hatudu pasiénsia nafatin. Haʼu sente besik liután ba Jeová bainhira haʼu haree oinsá nia dirije serbisu haklaken iha mundu tomak.”

Alisa, irmán ida tinan 30 liu husi Rúsia, hatete: “Hodi serbí Jeová iha neʼe, haʼu bele koko Jeová nia laran-diʼak.” (Salmo [Mazmur] 34:8) Nia hatutan tan dehan: “Jeová laʼós deʼit haʼu-nia Aman, maibé nia mós haʼu-nia Belun diʼak, no haʼu bele koñese nia iha dalan diʼak liután bainhira haʼu hasoru situasaun oioin. Haʼu-nia moris nakonu ho esperiénsia neʼebé furak, tempu neʼebé kontente no bensaun barak!”

Liuhusi kampaña espesiál iha Turkia mak ema barak liután bele rona liafuan diʼak. Maibé, sei iha fatin barak neʼebé ema seidauk bá atu haklaken. Loroloron, irmaun-irmán sira neʼebé muda ba Turkia hasoru ema neʼebé nunka rona kona-ba Jeová. Ita hakarak serbí iha fatin hanesan neʼe ka lae? Se nuneʼe: “Foti imi-nia matan bá no haree toʼos sira-neʼe, sira hotu prontu ona atu koʼa.” (João 4:35) Ita bele bá ajuda iha rai ida neʼebé “prontu atu koʼa” ka lae? Se bele, komesa agora atu kumpre Ita-nia planu neʼe. Se Ita hola parte liután atu haklaken liafuan diʼak “toʼo rai nia rohan”, neʼe sei lori bensaun ba Ita neʼebé la bele kompara ho buat seluk!—Apóstolu 1:8.