Kuandu ema neʼebé ita hadomi mate, ida-neʼe halo ita tanis tanba ita hanoin tebes ema neʼe. Maski Jesus hadomi Lázaro, maibé nia tanis laʼós tanba Lázaro mate. Jesus matan-been tun tanba nia hanoin tebetebes Lázaro nia família no belun sira neʼebé sai triste tanba sira foin lakon Lázaro. Bíblia konta kona-ba neʼe iha livru Joao.—Joao 11:36.

Bainhira Jesus foin rona katak Lázaro mak moras, nia la ansi atu bá kedas Lázaro nia uma hodi kura nia. Livru Joao hatete: “Rona tiha katak Lázaro moras, [Jesus] hela loron rua tan iha neʼebá.” (Joao 11:6) Tanbasá mak Jesus demora? Nia dehan: “Moras neʼe laʼós atu lori ba mate, maibé ba Maromak nia glória, atu nuneʼe Maromak nia Oan hetan glória liuhusi ida-neʼe.” (Joao 11:4, MF) Jesus husik Lázaro mate atu fó sai “Maromak nia glória”. Oinsá? Nia sei halo milagre ida neʼebé furak hodi fó moris-hiʼas ba ninia belun diʼak.

Jesus uza oportunidade neʼe atu esplika ba ninia dixípulu sira, katak mate nia kondisaun hanesan toba-dukur. Tan neʼe, Jesus hatete katak nia sei bá neʼebá hodi “fanu nia”. (Joao 11:11) Hanesan la susar ba inan-aman atu fanu sira-nia oan, nuneʼe mós la susar ba Jesus atu halo Lázaro moris hiʼas fali. Klaru katak Jesus la iha razaun atu sente laran-tun tebes kona-ba Lázaro nia mate.

Entaun, tanbasá mak Jesus tanis? Versíkulu iha livru Joao hatutan tan. Jesus bá hasoru Lázaro nia biin Maria, no kuandu Jesus haree katak Maria no ema seluk tanis, nia sai “laran taridu tebetebes” no “neon-susar”. Sin, Jesus nia belun sira-nia matan-been mak book Jesus atu sente triste hanesan neʼe toʼo “tanis”.—Joao 11:33, 35.

Istória neʼe hatudu katak Jesus iha kbiit atu halo ema neʼebé ita hadomi moris hiʼas fali ho isin-diʼak iha mundu foun neʼebé besik ona atu mai. Istória neʼe mós ajuda ita atu fiar katak Jesus hanoin tebes sira neʼebé laran-tun tanba família ka belun ida mate. No ikusmai ita aprende katak ita mós presiza hatudu laran-diʼak no hanoin ema hanesan Jesus.

Maski Jesus hatene katak nia sei halo Lázaro moris hiʼas fali, maibé nia tanis tanba nia hanoin no hadomi tebes ninia belun sira. Hanesan ho Jesus, ita mós hakarak hanoin ema hodi “tanis ho sira neʼebé tanis”. (Roma 12:15) Se ita sente triste kona-ba mate, ida-neʼe laʼós katak ita la iha fiar ba esperansa kona-ba moris-hiʼas. Tuir loloos, Jesus hatudu ezemplu diʼak hodi hanoin Lázaro nia família no tanis maski Jesus atu fó moris-hiʼas ba nia.