Jeová dook husi ema neʼebé terus iha mundu ka nia hanoin ita hotu? Bíblia fó resposta ba pergunta neʼe hodi halo ita sente kmaan. Tuir loloos, Maromak hanoin tebes ita hotu, no nia hakarak ita atu goza moris. Loroloron nia husik ema atu simu nia laran-diʼak maski barak la hatudu agradese ba nia. Mai ita hanoin kona-ba apóstolu Paulo nia liafuan.—Lee Apostolu 14:16, 17.

Paulo koʼalia ba ema iha sidade Listra neʼebé la adora Maromak hodi hatete: “Iha otas uluk, [Maromak] husik nasaun sira hotu laʼo tuir ida-ida nia dalan, maibé Nia iha sasin nafatin basá wainhira Nia haraik Nia laran-luak no Nia fó ba imi udan husi lalehan no tempu diʼak atu imi hetan ai-fuan barak, no fó han no halo imi haksolok iha imi-nia moris.” Paulo nia liafuan katak sá ba ema neʼebé rona nia?

Ema iha Listra bele komprende lalais deʼit katak Paulo nia liafuan mak loos. Sira iha neʼebá mak toos-naʼin no hela iha fatin neʼebé buras tanba bee barak. Maibé Paulo fó-hanoin sira katak Maromak mak ida neʼebé fó udan no tempu diʼak ba sira. Tan neʼe kuandu sira koʼa toos neʼebé buras no han ai-han neʼebé gostu, sira hetan buat hirak-neʼe hotu tanba Maromak nia laran-diʼak.

Apóstolu Paulo nia liafuan ba ema iha Listra hanorin ita lisaun balu neʼebé importante kona-ba Maromak Jeová.

Jeová fó mai ita liberdade atu hili. Porezemplu, Jeová husik nasaun sira hotu “laʼo tuir ida-ida nia dalan”. Livru ida kona-ba Bíblia dehan liafuan neʼe katak “sira bele halo tuir sira-nia hakarak” ka “sira bele halo buat neʼebé sira hanoin mak diʼak”. Jeová sei nunka obriga ema atu adora nia. Nia fó ita liberdade atu hili ka halo desizaun kona-ba dalan neʼebé ita sei halaʼo ita-nia moris.—Deuteronômio (Ulangan) 30:19.

Jeová hakarak ita atu hatene nia. Paulo esplika katak Maromak “iha sasin nafatin”. Livru neʼebé temi ona dehan katak ita bele tradús liafuan neʼe nuʼudar Maromak “hatudu ba ema ho klaru nia mak Maromak sé”. Ninia kriasaun hatudu sai ninia “kbiit rohan-laek no kmanek Maromak nian” hanesan ninia laran-diʼak, matenek, kbiit, no domin. (Roma 1:20) Jeová mós hatudu buat barak liután kona-ba nia an iha Bíblia laran. (2 Timoteo 3:16, 17) Sin, klaru katak Maromak hakarak ita atu hatene nia.

Jeová hakarak ita atu sente kontente. Paulo hatete katak Maromak halo ita-nia laran nakonu ho ‘haksolok iha ita-nia moris.’ Ema sala-naʼin neʼebé la simu Maromak sei bele han toʼo bosu no sai kontente uitoan iha sira-nia moris. Maibé Maromak hakarak ita atu hetan ksolok neʼebé loos no ba nafatin. Ita bele sai hanesan neʼe só deʼit ita aprende lia-loos kona-ba nia no halo tuir ida-neʼe iha ita-nia moris rasik.—Salmo (Mazmur) 144:15; Mateus 5:3.

Ita hotu simu Jeová nia laran-diʼak loroloron. Tan neʼe, ita hakarak aprende nafatin kona-ba oinsá mak ita bele hatudu agradese ba Maromak neʼebé halo ita-nia laran nakonu ho ‘haksolok iha ita-nia moris’.