Aôndo soo ér ior ve ember uma sha tar. Yange gba tar man hanma kwagh u a lu sha u cii, sha ci u uumace doo un ishima. Ica a gba ga tsô, una er kwagh u a kpe ior mba ken ityar kposo kposo cii iyol yô. Una kar a hanma kwagh u a ve uumace a ican i yan cii kera.—Ôr Yeremia 29:11.

Gomoti môm tsô ngu a fatyô u been a ipila man angev shin ku ga. Kpa loho u dedoo ngu sha ci wase. Ica a gba ga tsô, Aôndo una kar a ugomoti mba uumace kera, una gema a ver gomoti na. Ior mba vea lu sha ikyev i gomoti na la vea lu ken bem, shi vea lu gbong gbong kpaa.—Ôr Yesaia 25:8; 33:24; Daniel 2:44.

Ka shighe u Aôndo una tim aferaior shin tar ne kera la ican i yan ia bee ye. (Sefania 2:3) Kwagh ne una er hanma shighee? Mkaanem ma Aôndo tsengaôron kwagh u akaa a a lu anger uumace hegen ne. Akaa a bo a a lu eren ne tese ér shighe u Aôndo una tim mbaaferev la zurum.—Ôr 2 Timoteu 3:1-5.

Gba u se hen kwagh u Aôndo ken Mkaanem nam, ka Bibilo je la. Ngi er ka washika u ma ter u ônov mba nan ve doo nan ishima nan nger hen a ve nahan. i tese se kwagh u se er ve uma wase una doo hegen yô, man kwagh u se er ve se zua a uma u tsôron ken hemen la kpaa. Mimi yô, alaghga mbagenev vea nenge er i lu wasen we u fan Bibilo nahan, a doo ve ga. Kpa er Aôndo a tende zwa u va eren akaa a van se a mkpeyol yô, mayange je se lumun ser mbagenev ve yange se u henen kwagh u uityendezwa mban ga.—Ôr Anzaakaa 29:25; Mpase 14:6, 7.