Upania mbagenev yange ve va kema uwegh sha hunda ugen ken tar u Kenya, maa i kaa a ve ér ve nyôr ker. Mba nyer yô, ve nenge a antiôn-or ugen yav sha gambe, nahan cier ve iyol. Lu ingyoroo shi lihe ave kera ga. Mba pasen un ityendezwa i Aôndo a er ér “orkeer nana gba tsuwen er ashim nahan” la yô, doo or shon se bugh anyi.—Yes. 35:6.

Upania mban va kav ér or shon u i yilan un ér Onesmus, u zurum anyom 40 ne, lu a bouange u sha akuhe. Akuhe a na yange taver ga kpishi, je yô ankwagh una bende a na cuku tseegh kpa a kever. Er angev mbun mbu lu a icigh shin gbenda u sôron mbu ga yô, lu u Onesmus una za hemen u lun ken mnyoon, shi una lu shin ikyekye i mbaawanev sha ayange a uma na cii.

Onesmus yange lumun ér i hen Bibilo a na. Nahan kpa, ngô na vende ér a de ze mbamkombo mba Mbakristu ga, lu henen ér alaghga una za vihi iyol shin iyol ia seer nyoon un. Nahan anmgbianev ve kura akaaôron a i ne ken mbamkombo la ken icer, ve za na Onesmus a ungwa hen ya. Onesmus henen kwagh iwer ngi kar itian yô, a tsua ér una zaan mbamkombo, shin er una fatyô u za seer nyôron ken mnyoon nahan kpaa.

Kpa mbamkombo mba zan seer van Onesmus a mnyoonoo? Ei, lu nahan ga. Onesmus kaa ér: “Yange me a za mkombo yô, mnyoonom ma m luun ker hanma shighe la ma pande.” A hen wener ka ishimaverenkeghen na i he la i ne un zough a guda ye. Ngô u Onesmus nengen er mlu u wan na a gem yô, doo un kpishi, nahan un kpa lumun ér i hen Bibilo a na. Yange a kaa ér, “Aôndo u civir hingir wan wam icigh.”

Ica gba ga je maa Onesmus hingir orpasenkwagh u i lu a er nan batisema ga yô. Shighe kar yô, i er un batisema, hegen ngu eren tom u diakon. Shin er Onesmus a eren kwagh uwegh môm tseegh shi a fetyô u zenden sha angahar a na ga nahan kpa, yange sar un u eren kwagh u un fetyô la cii ken tom u Yehova. Yange soo u eren ishuen pania, kpa taver un u ngeren apelekeshen. Sha ci u nyi? Sha ci u yange fa ér a gba u orgen nana tuur un shin ikyekye i mbaawanev nana zende a na sha, una pasen kwagh. Kpa pasen Mbakristu mbagenev mba ve civir Yehova vea na imôngo la awashima na ne yô, ve tôndo zwa u wasen un. Shi mimi je, ve wase un zan zan er ishuen pania la kar been.

Shighe u Onesmus soo u eren pania u keke la kpa, lu zayol u tagher a mi je ne. Nahan kpa, sha shighe ugen la, a ôr ivur i sha hanma iyange igen, nahan i na un ishimataver. Ivur la due ken Pasalmi 34:8. I kaa ér: “Bende, nenge nen, TER ka u doon je.” Onesmus gbidyen kwar sha ivur la been yô, a tsua u eren pania u keke la. Hegen ka a pase kwagh ayange anyiin ken kasua, shi ngu a mbahenen Bibilo kpishi, mba ve lu vesen ken jijingi tsembelee yô. Ken inyom i 2010 la, Onesmus za Makeranta u Henen Tom Pania la, nahan doo un kpishi er môm ken anmgbianev mbauhar mba yange ve za hii pasen un kwagh la, lu ortesen na ken makeranta ne yô!

Mbamaren mba Onesmus kera mba uma hegen ga, kpa anmgbianev mba nomso man mba kasev mba ken tiônnongo mba nengen sha mbamgbe nav mba ayange ayange. A wuese averen a un lu zuan a mi hegen la cii, shi ngu veren ashe a iyange i ‘ma or nana kera kaa ér: Kwagh nyoon mo, ga’ la.—Yes. 33:24.