Ylham kitabynda agzalýan Beýik Wawilon Hudaýdan ýüz öwren ähli ýalan dinleri aňladýar a (Ylham 14:8; 17:5; 18:21). Bu dinler bir-birinden tapawutlansa-da, olaryň ählisi hak Hudaý Ýehowa edilýän seždeden daşlaşdyrýar (5 Musa 4:35).

Beýik Wawilony anyklamagyň ýollary

1.   Beýik Wawilon — nyşan. Mukaddes Kitapda Beýik Wawilon «aýal» we «bozuk aýal» hökmünde suratlandyrylyp, onuň «Beýik Wawilon» diýen «syrly ady» göterýändigi aýdylýar (Ylham 17:1, 3, 5). Ylham kitabyndaky görnüşler göçme manyda berlendigi üçin, bu aýal hem göni manyda ulanylmaýar (Ylham 1:1). Şeýle-de onuň «halklary, märekäni, milletleri we dilleri aňladýan» «suwlaryň üstünde oturandygy» aýdylýar (Ylham 17:1, 15). Hakyky aýal muny edip bilmezdi.

2.   Beýik Wawilon ähli ýalan dinleri aňladýar. Oňa «ýer ýüzüniň patyşalarynyň üstünden höküm sürýän beýik şäher» diýilýär (Ylham 17:18). Görşümiz ýaly, ol bütin dünýä täsirini ýetirýär.

3.   Beýik Wawilon syýasy we täjirçilik däl-de, dini guramany aňladýar. Gadymy Wawilon «jadygöýlik» we «gözbagçylyk» bilen meşgullanýan dini şäher hökmünde tanalýardy (Işaýa 47:1, 12, 13; Ýermeýa 50:1, 2, 38). Ol ýerde ýalan din giňden ýaýrandy we onuň tarapdarlary hak Hudaý Ýehowa garşy çykýardylar (1 Musa 10:8, 9; 11:2—4, 8). Wawilonyň hökümdarlary özlerini Ýehowadan we oňa edilýän seždeden ýokary tutup, tekepbirlik edýärdiler (Işaýa 14:4, 13, 14; Danyýar 5:2—4, 23). Beýik Wawilon hem «jadygöýligi» bilen tanalýar. Bu bolsa onuň dini guramadygyny subut edýär (Ylham 18:23).

    Beýik Wawilonyň syýasy gurama bolmagy mümkin däl, sebäbi ol ýok edilende, «ýer ýüzüniň patyşalary» onuň ýasyny tutarlar (Ylham 17:1, 2; 18:9). Oňa täjirçilik guramasy hem diýip bolmaýar. Sebäbi Mukaddes Kitapda ol söwdagärlerden aýratyn agzalýar (Ylham 18:11, 15).

4.   Beýik Wawilona ýalan din diýilmegi ýerlikli. Ýalan dinler adamlary hak Hudaý Ýehowa ýakynlaşdyrmagyň deregine, olary ýalan taňrylara sežde etdirýär. Mukaddes Kitapda muňa «biwepalyk» diýilýär (3 Musa 20:6; 2 Musa 34:15, 16). «Üç ýüzli taňry (Troisa)», «ölmeýän jan» ýaly taglymatlaryň hem-de heýkellere sežde etmek ýaly däp-dessurlaryň aňyrsy gadymy Wawilondan gaýdýar. Bu zatlar häzirem ýalan dinleriň esasy bölegi bolup durýar. Şeýle-de ýalan dinler bu dünýäniň işlerine goşulýarlar. Mukaddes Kitapda olara «zynahorlar» diýilýär (Ýakup 4:4, çykgyt).

    Ýalan dinleriň baýlygyna magtanýandygy Mukaddes Kitapdaky Beýik Wawilonyň suratlandyrylyşyna gabat gelýär. Ýazgylarda onuň «goýy gyzyl we gyrmyzy reňkli eşige geýnip, altyn, gymmatbaha daşlar hem-de dürdäneler bilen bezenendigi» aýdylýar (Ylham 17:4). Beýik Wawilon —«ýigrenji zatlaryň», ýagny Hudaýy masgaralaýan taglymatlaryň we işleriň gözbaşy (Ylham 17:5). Ýalan dinlere uýýan adamlar Beýik Wawilony goldaýan «halklar, märeke, milletler we dillerdir» (Ylham 17:15).

 Beýik Wawilon «ýer ýüzünde öldürilenleriň gany» üçin jogapkärdir (Ylham 18:24). Bütin taryhyň dowamynda ýalan din uruş oduny tutaşdyryp, terrorçylygy öjükdirdi. Galyberse-de, ol söýgüden doly Ýehowa Hudaý baradaky hakykaty öwretmedi (1 Ýahýa 4:8). Şol zerarly ençeme adamlaryň gany döküldi. Ine, şunuň üçin hem Hudaýy begendirmek isleýän adamlar Beýik Wawilondan çykmaly, ýagny ýalan din bilen hiç hili aragatnaşyk etmeli däl (Ylham 18:4; 2 Korinfliler 6:14—17).