Hindi nagtatangi ang Diyos at gusto niyang pagpalain ang lahat ng tao.

Ipinangako ng Diyos sa propetang si Abraham: “Pagpapalain ang lahat ng pamilya sa lupa sa pamamagitan mo.”​—Genesis 12:3.

Aral: Mahal na mahal tayo ng Diyos at gusto niyang pagpalain ang lahat ng pamilya—mga lalaki, babae, at bata—na sumusunod sa kaniya.

Maawain ang Diyos at pinagpapala niya ang mga nagsisikap na makilala siya.

Binigyan ng Makapangyarihan-sa-Lahat ang propetang si Moises ng kapangyarihan na gumawa ng himala. Pero nanalangin pa rin si Moises: “Ipaalám mo sa akin ang iyong mga daan para makilala kita at patuloy kang malugod sa akin.” (Exodo 33:13) Ikinatuwa ng Diyos ang hiling ni Moises, kaya tinulungan niya ito na higit pang malaman at maunawaan ang kaniyang mga daan at katangian. Halimbawa, natutuhan ni Moises na ang Maylalang ay “isang Diyos na maawain at mapagmalasakit.”​—Exodo 34:6, 7.

Aral: Gusto ng Diyos na pagpalain tayong lahat—mga lalaki, babae, at bata—na nagsisikap na kilalanin pa siya. Gamit ang Banal na Kasulatan, itinuturo niya kung paano siya dapat sambahin at ipinapaalám niya na gustong-gusto niya tayong pagpalain.

Matatanggap natin ang walang-hanggang pagpapala ng Diyos kung pag-aaralan natin ang mga ginawa at itinuro ni Jesus.

Marami tayong matututuhan mula sa Salita ng Diyos tungkol sa buhay at mga turo ni Jesus. Binigyan ng Diyos si Jesus ng kapangyarihan para gumawa ng maraming himala, gaya ng pagpapagaling ng bulag, bingi, at pilay. Bumuhay pa nga siya ng mga patay. Sa paggawa nito, ipinakita ni Jesus ang mga pagpapala na ibibigay ng Diyos sa lahat ng tao sa hinaharap. Ipinaliwanag niya kung paano natin matatanggap ang mga pagpapalang iyon: “Para magkaroon sila ng buhay na walang hanggan, kailangan nilang makilala ka, ang tanging tunay na Diyos, at ang isinugo mo, si Jesu-Kristo.”​—Juan 17:3.

Si Jesus ay maawain, mapagmalasakit, at mabait. Lumapit sa kaniya ang mga lalaki, babae, bata, at matanda dahil inimbitahan niya sila: “Matuto kayo sa akin, dahil ako ay mahinahon at mapagpakumbaba, at magiginhawahan kayo.” (Mateo 11:29) Di-gaya ng iba noong panahon niya na walang paggalang sa mga babae, pinakitunguhan ni Jesus ang mga babae nang may kabaitan, dignidad, at paggalang.

Aral: Nagpakita ng pag-ibig si Jesus sa mga tao, at nag-iwan siya ng magandang halimbawa kung paano natin dapat pakitunguhan ang iba.

Sinasabi ng Banal na Kasulatan na “alam natin na iisa lang ang Diyos” at na si Jesu-Kristo ay mensahero ng Diyos. (1 Corinto 8:6) Sinabi ni Jesus na mas mataas ang Diyos sa kaniya at na ipinadala siya ng Diyos sa lupa.​—Juan 11:41, 42; 14:28. *