1, 2. (a) Ko e hā naʻe leaʻaki ʻe Sihova ʻe hoko ʻi hotau taimí? (e) Ko e hā ʻa e ngaahi fehuʻi ʻe tali ʻi he kupu ko ení? (Sio ki he ʻuluaki fakatātā ʻi he kupú ni.)

 NAʻE tala ʻe Sihova ʻe hoko ʻi hotau taimí, “ʻe puke ʻe ha tuʻunga tangata ʻe toko hongofulu, mei he ngaahi lea kehekehe ʻo e ngaahi puleʻangá, ʻio te nau puke ki he kapaʻi kofu ʻo ha tangata Siu, heʻenau pehē, Te tau ō mo koe; he kuo mau fanongo ʻoku ʻiate kimoutolu ʻa e ʻOtuá.” (Sāk. 8:23, NW) ʻOku fakafofongaʻi ʻe he tangata Siú ʻa e faʻahinga kuo pani ʻe he ʻOtuá ʻaki ʻa e laumālie māʻoniʻoní. ʻOku toe ui kinautolu ko e “ʻIsileli ʻa e ʻOtuá.” (Kal. 6:16) ʻOku fakafofongaʻi ʻe he kau tangata ʻe toko hongofulú ʻa e faʻahinga ko ia ʻoku nau maʻu ʻa e ʻamanaki ke moʻui taʻengata ʻi he māmaní. ʻOku nau ʻiloʻi kuo tāpuakiʻi ʻe Sihova ʻa e kulupu ko eni ʻo e kau paní pea ongoʻi ko honau monū ia ke lotu fakataha mo kinautolu kiate ia.

² Hangē ko e palōfita ko Sākalaiá, naʻe pehē ʻe Sīsū ʻe fāʻūtaha ʻa e kakai ʻa e ʻOtuá. Naʻá ne fakamatalaʻi ʻa e faʻahinga ko ia ʻoku fakatuʻotuʻa atu ke moʻui ʻi hēvaní ko e “fanga sipi tokosiʻi” pea ko e faʻahinga ʻoku fakatuʻotuʻa atu ke moʻui ʻi he māmaní ko e “fanga sipi kehe.” Ka naʻe pehē ʻe Sīsū te nau hoko kotoa ko e “tākanga ʻe taha” pea te nau muimui ʻiate ia, ko honau “tauhi-sipi pē ʻe taha.” (Luke 12:32; Sione 10:16) Koeʻuhi ʻoku ʻi ai ʻa e kulupu ʻe ua, ʻoku fifili nai ʻa e niʻihi: (1) ʻOku fiemaʻu ke ʻiloʻi ʻe he fanga sipi kehé ʻa e hingoa  kotoa ʻo e kau pani he ʻaho ní? (2) ʻOku totonu ke fēfē ʻa e fakakaukau ʻa e kau paní kiate kinautolú? (3) Kapau ʻoku ʻi ai ha taha ʻi heʻeku fakatahaʻangá ʻoku kamata ke ne kai ʻa e maá mo inu ʻa e uainé ʻi he Fakamanatú, ʻoku totonu ke fēfē ʻeku fakafeangai kiate iá? (4) ʻOku fiemaʻu ke u hohaʻa ʻi he taimi ʻoku ou sio ai ki he ʻalu ki ʻolunga ʻa e tokolahi ʻo e faʻahinga ʻoku nau kai ʻa e maá mo inu ʻa e uainé ʻi he Fakamanatú? ʻE tali ʻi he kupu ko ení ʻa e ngaahi fehuʻi ko iá.

3. Ko e hā ʻoku ʻikai malava ai ke tau ʻiloʻi pau ʻa e faʻahinga te nau hoko ko e konga ʻo e toko 144,000?

³ ʻOku fiemaʻu ke ʻiloʻi ʻe he fanga sipi kehé ʻa e hingoa kotoa ʻo e kau pani ʻoku kei toe ʻi he māmaní he ʻaho ní? ʻIkai. Ko e hā hono ʻuhingá? Koeʻuhí ʻoku ʻikai malava ke ʻiloʻi pau ʻe ha taha ko e faʻahinga ko ení te nau maʻu honau palé. ^[1] Neongo kuo fakaafeʻi kinautolu ʻe he ʻOtuá ke nau ʻalu ki hēvani, te nau maʻu honau palé ʻo kapau pē te nau nofoʻaki faitōnunga ai pē. ʻOku ʻiloʻi eni ʻe Sētane, pea ʻokú ne ngāueʻaki ʻa e “kau palōfita loi” ʻi he feinga “ke takihalaʻi” kinautolu. (Māt. 24:24) ʻOku ʻikai malava ke fakapapauʻi ʻe he kau Kalisitiane paní te nau maʻu honau palé kae ʻoua kuo ʻai ʻe Sihova ke māʻalaʻala kia kinautolu kuó ne fakamāuʻi kuo nau hoko ʻo faitōnunga. ʻOku fai ʻe Sihova ʻa e aofangatuku ko ení pe silaʻi fakaʻosí, ki muʻa ke nau maté pe ki muʻa ke kamata ʻa e “fuʻu mamahi lahí.”​—Fkh. 2:10; 7:3, 14.

4. Kapau ʻoku ʻikai malava ke ʻiloʻi ʻa e hingoa kotoa ʻo e kau pani ʻi māmani he ʻaho ní, ʻe lava fēfē ke tau “ō” mo kinautolú?

⁴ Kapau ʻoku ʻikai malava ke ʻiloʻi ʻa e hingoa kotoa ʻo e kau pani ʻi māmani he ʻaho ní, ʻe lava fēfē ke “ō” mo kinautolu ʻa e fanga sipi kehé? ʻOku pehē ʻe he Tohi Tapú ko e kau tangata ʻe toko hongofulú “te nau puke ki he kapaʻi kofu ʻo ha tangata Siu, heʻenau pehē, Te tau ō mo koe; he kuo mau fanongo ʻoku ʻiate kimoutolu ʻa e ʻOtuá.” ʻOku lave ʻa e veesi Tohi Tapú ki he tangata Siu ʻe taha. Ka ʻi he taimi ʻoku lave ai ki he “koe” mo e “kimoutolu,” ʻoku ʻuhinga ki he tokolahi ange kae ʻikai ki ha tokotaha pē. ʻOku ʻuhinga eni ko e tangata Siú ʻoku ʻikai ko ha tokotaha pē ka ʻokú ne fakafofongaʻi ʻa e kulupu kotoa ʻo e kau paní. ʻOku ʻiloʻi eni ʻe he fanga sipi kehé, pea ʻoku nau tauhi kia Sihova fakataha mo e kulupu ko iá. ʻOku ʻikai fiemaʻu ke nau ʻiloʻi ʻa e hingoa ʻo e mēmipa kotoa pē ʻo e kulupu ko iá pea muimui ki he tokotaha taki taha ʻo kinautolu. Ko Sīsū hotau Takí, pea ʻoku tala mai ʻe he Tohi Tapú kuo pau ke tau muimui pē kiate ia.​—Māt. 23:10.

5. Ko e hā ʻa e fakatokanga ʻoku totonu ke fakakaukau fakamātoato ki ai ʻa e kau paní, pea ko e hā hono ʻuhingá?

⁵ ʻOku totonu ke fakakaukau fakamātoato ʻa e kau paní ki he fakatokanga ʻi he 1 Kolinitō 11:27-29. (Lau.) Ko e hā ʻe hoko ki ha tokotaha pani ʻi heʻene kai ʻa e maá mo inu ʻa e uainé ʻi he Fakamanatú ka ʻoku “ʻikai te ne taau”? Kapau heʻikai te ne tauhi ha vahaʻangatae lelei mo Sihova pea taʻefaitōnunga kiate ia, ʻi he taimi leva ʻokú ne kai ai ʻa e maá mo inu ʻa e uainé, ʻokú ne hoko ai ʻo taʻefakaʻapaʻapa. (Hep. 6:4-6; 10:26-29) Ko e fakatokanga mālohi ko ení ʻoku fakamanatu mai ai ki he kau paní kuo pau ke nau nofoʻaki faitōnunga ai pē kapau te nau loto ke maʻu ʻa e “pale ʻo e ui ki ʻolunga ʻa e ʻOtuá ʻa ia ʻoku fakafou ʻia Kalaisi Sīsuú.”​—Fil. 3:13-16.

6. ʻOku anga-fēfē ongoʻi ʻa e kau Kalisitiane paní kiate kinautolú?

⁶ Naʻe tala ʻe Paula ki he kau Kalisitiane paní: “Ko au, ko e pōpula ʻi he ʻEikí, ʻoku ou kōlenga atu kiate kimoutolu ke mou ʻaʻeva ʻo taau mo e ui ʻa ia naʻe ui ai kimoutolú.” ʻOku totonu ke fēfē ʻenau fai ení? Naʻe fakamatalaʻi ʻe Paula: “ʻI he anga-fakatōkilalo mo e anga-malū kakato, ʻi he kātaki, ʻo fekātakiʻaki ʻi he ʻofa, ʻo feinga tōtōivi ke tauhi maʻu ʻa e laumālie taha ʻi he haʻi fāʻūtaha ko e melinó.” (ʻEf. 4:1-3) ʻOku tokoniʻi  ʻe he laumālie māʻoniʻoni ʻo Sihová ʻene kau sevānití ke nau anga-fakatōkilalo, kae ʻikai ke hīkisia. (Kol. 3:12) Ko ia ʻoku ʻikai ke fakakaukau ʻa e kau paní ʻoku nau lelei ange ʻi he niʻihi kehé. ʻOku nau ʻiloʻi ʻoku ʻikai ke lahi ange ʻa e laumālie māʻoniʻoni ʻoku ʻoange ʻe Sihova ki he kau paní ʻi heʻene kau sevāniti kehé. Pea ʻoku ʻikai ke nau ongoʻi ʻoku lava ke nau mahinoʻi ʻa e ngaahi moʻoni Fakatohitapú ʻo loloto ange ia ʻi ha toe taha kehe. Heʻikai ʻaupito te nau tala ki ha taha kehe kuo pani foki mo ia pea totonu ke ne kamata kai ʻa e maá mo inu ʻa e uainé ʻi he Fakamanatú. ʻI hono kehé, ʻoku nau anga-fakatōkilalo ʻo ʻiloʻi ko Sihova pē ʻoku lava ke ne fakaafeʻi ʻa e kakaí ke nau ʻalu ki hēvaní.

7, 8. Ko e hā heʻikai ke ʻamanekina ʻe he kau Kalisitiane paní, pea ko e hā hono ʻuhingá?

⁷ Neongo ʻoku ongoʻi ʻe he kau paní ko honau monū ia ke fakaafeʻi ke nau ʻalu ki hēvani, ʻoku ʻikai ke nau ʻamanekina ʻa e niʻihi kehé ke nau fakafeangai ange ʻi ha founga makehe. (ʻEf. 1:18, 19; lau ʻa e Filipai 2:2, 3.) ʻOku nau toe ʻiloʻi ʻi he taimi naʻe pani ai kinautolu ʻe Sihová, naʻe ʻikai ke ne ʻai ke ʻiloʻi ia ʻe ha taha kehe. Ko ia ʻoku ʻikai ke ʻohovale ʻa e tokotaha paní kapau heʻikai ke tui atu leva ha niʻihi kuo pani ia. ʻOkú ne ʻiloʻi ʻoku tala mai ʻe he Tohi Tapú kia kitautolu ke ʻoua te tau tui leva ki he pehē ʻe ha taha kuo ʻoange ʻe he ʻOtuá kiate ia ha fatongia makehe. (Fkh. 2:2) Koeʻuhí ʻoku ʻikai ke ʻamanekina ʻe he tokotaha paní ke tokanga tōtuʻa ange ʻa e niʻihi kehé, heʻikai ke ne tala ki he faʻahinga ʻoku nau ʻuluaki fetaulakí ʻoku pani ia. Ko hono moʻoní, heʻikai nai ke ne tala ange eni ki ha taha pē. Heʻikai foki ke ne pōlepole fekauʻaki mo e ngaahi meʻa fakaofo te ne fai ʻi hēvaní.​—1 Kol. 1:28, 29; lau ʻa e 1 Kolinitō 4:6-8.

⁸ ʻOku ʻikai ke ongoʻi ʻe he kau Kalisitiane paní ʻoku totonu ke nau feohi pē mo e kau pani kehé, ʻo hangē ko e kau mēmipa ʻo ha kalapu. ʻOku ʻikai ke nau feinga ke kumi ki he kau pani kehé ke talanoa ki ai fekauʻaki mo e paní pe ko e fakataha fakakulupu ke ako ʻa e Tohi Tapú. (Kal. 1:15-17) Heʻikai ke fāʻūtaha ʻa e fakatahaʻangá kapau ʻe fai pehē ʻa e kau paní. Te nau ngāue ai ʻo fakafepaki ki he laumālie māʻoniʻoní, ʻa ia ʻokú ne tokoniʻi ʻa e kakai ʻa e ʻOtuá ke nau melino mo fāʻūtahá.​—Lau ʻa e Loma 16:17, 18.

9. Ko e hā ʻoku fiemaʻu ai ke ke tokanga fekauʻaki mo e founga ʻokú ke fakafeangai ai ki he faʻahinga ʻoku nau kai ʻa e maá mo inu ʻa e uainé ʻi he Fakamanatú? (Sio ki he puha “ Ko e ʻOfá ‘ʻOku ʻIkai Te Ne Fai ha Tōʻonga Taʻefeʻunga.’”)

⁹ ʻOku totonu ke fēfē hoʻo fakafeangai ki he fanga tokoua mo e fanga tuofāfine kuo paní? Naʻe tala ʻe Sīsū ki heʻene kau ākongá: “Ko kimoutolu kotoa pē ko e fanga tokoua.” ʻOkú ne hoko atu: “ʻIlonga ʻa ia ʻokú ne hakeakiʻi iá ʻe fakatōkilaloʻi, pea ʻilonga ʻa ia ʻokú ne fakatōkilaloʻi iá ʻe hakeakiʻi.” (Māt. 23:8-12) Ko ia ʻe hala ke fakaʻapaʻapaʻi tōtuʻa ha taha, neongo ko e tokoua pani ia ʻo Kalaisi. ʻI he taimi ʻoku lave ai ʻa e Tohi Tapú ki he kau mātuʻá, ʻoku fakalototoʻaʻi ai kitautolu ke faʻifaʻitaki ki heʻenau tuí, ka ʻoku ʻikai tala mai ai ʻoku lava ke tau ʻai ha tangata ko hotau taki. (Hep. 13:7) Ko e moʻoni ʻoku pehē ʻe he Tohi Tapú ko e niʻihi “ʻoku nau tuha mo e fakaʻapaʻapaʻiaʻi lahi ange.” Ka ʻoku hoko ení koeʻuhí “ʻoku nau fai ʻa e tataki leleí” pea “ʻoku nau ngāue mālohi ʻi he leá mo e faiakó,” kae ʻikai koeʻuhí ʻoku pani kinautolu. (1 Tīm. 5:17) Kapau te tau fakahīkihikiʻi mo tokanga tōtuʻa ki he kau paní, te tau fakamaaʻi ai kinautolu. Pe ko e toe kovi angé, ʻe lava ke tau ʻai ai ke nau hīkisia. (Loma 12:3) Heʻikai loto ha taha ʻo kitautolu ke fai ha faʻahinga meʻa ʻe ʻai nai ai ha taha ʻo e fanga tokoua pani ʻo Kalaisí ke ne fai ha fehālaaki mafatukituki pehē!​—Luke 17:2.

10. ʻE lava fēfē ke ke fakahāhā ʻokú ke fakaʻapaʻapaʻi ʻa e kau Kalisitiane paní?

¹⁰ ʻE lava fēfē ke tau fakahāhā ʻa e fakaʻapaʻapa ki he faʻahinga ʻoku pani ʻe Sihová? Heʻikai ke tau ʻeke ange ʻa e founga naʻe pani ai kinautolú. Ko e meʻa fakafoʻituitui pē eni ia, ʻa ia ʻoku ʻikai ke  ʻi ai haʻatau totonu ke ʻilo ki ai. (1 Tes. 4:11; 2 Tes. 3:11) Pea ʻoku ʻikai totonu ke tau fakakaukau ko honau husepānití pe uaifí, ko ʻenau ngaahi mātuʻá, pe ko ha mēmipa kehe ʻi he fāmilí ʻoku pani mo kinautolu foki. ʻOku ʻikai ke maʻu tukufakaholo ʻe ha taha ʻa e ʻamanaki ko ení mei hono fāmilí. (1 Tes. 2:12) ʻOku totonu ke tau fakaʻehiʻehi foki mei hono ʻeke ha fehuʻi ʻe lava ke fakalotomamahiʻi ai ʻa e niʻihi kehé. Ko e fakatātaá, heʻikai ke tau ʻeke ki he uaifi ʻo ha tokoua pani ʻa e anga ʻo ʻene ongoʻi fekauʻaki mo e moʻui taʻengata ʻi he māmaní ʻo ʻikai ʻi ai hono husepānití. Ko hono moʻoní, ʻe lava ke tau mātuʻaki fakapapauʻi ʻi he māmani foʻoú, ʻe hanga ʻe Sihova ʻo “fakamakona ʻa e holi ʻa e meʻa moʻui kotoa.”​—Saame 145:16.

11. Kapau te tau fakaʻehiʻehi mei hono “fakahekehekeʻi ʻa e niʻihi kehé,” ʻe anga-fēfē hono maluʻi ai kitautolú?

¹¹ Kapau te tau fakafeangai totonu ki he kau paní ʻoku toe maluʻi ai kitautolu. Anga-fēfē? ʻOku tala mai ʻe he Tohi Tapú ʻe ʻi ai nai ʻa e “fanga tokoua loi” ʻi he fakatahaʻangá te nau pehē ʻoku pani kinautolu. (Kal. 2:4, 5; 1 Sio. 2:19) Pehē foki, heʻikai nai ke nofoʻaki faitōnunga ai pē ʻa e niʻihi ʻo e kau paní. (Māt. 25:10-12; 2 Pita 2:20, 21) Kapau te tau fakaʻehiʻehi mei hono “fakahekehekeʻi ʻa e niʻihi kehé,” heʻikai ʻaupito ke tau muimui ai kia kinautolu, naʻa mo e faʻahinga ʻoku pani pe ʻiloá pe ko e faʻahinga kuo nau tauhi kia Sihova ʻi ha taimi fuoloa. Pea kapau te nau hoko ʻo taʻefaitōnunga pe mavahe mei he fakatahaʻangá, heʻikai mole ai ʻetau tui kia Sihová pe tuku ʻetau tauhi kiate iá.​—Sute 16.

12, 13. Ko e hā ʻoku ʻikai totonu ai ke tau hohaʻa fekauʻaki mo e tokolahi ʻo e faʻahinga ʻoku nau kai ʻa e maá mo inu ʻa e uainé ʻi he Fakamanatú?

¹² ʻI he ngaahi taʻu lahi, naʻe ʻalu ke tokosiʻi ange ʻa e faʻahinga ʻoku nau kai ʻa e maá mo inu ʻa e uainé ʻi he Fakamanatú. Ka ki muí ni mai, ʻoku ʻalu ke tokolahi ange ʻi he taʻu kotoa pē. ʻOku fiemaʻu ke tau hohaʻa ki he meʻá ni? ʻIkai. Tau sio angé ki he ʻuhingá.

¹³ “ʻOku ʻafioʻi ʻe Sihova ʻa e faʻahinga ʻoku haʻaná.” (2 Tīm. 2:19) ʻI he ʻikai hangē ko Sihová, ko e fanga tokoua ʻoku nau lau ʻa e tokolahi ʻo e kakai ʻoku kai ʻi he maá mo inu ʻa e uainé ʻi he Fakamanatú ʻoku ʻikai ke nau ʻiloʻi ʻa e faʻahinga ʻoku pani moʻoní. Ko ia ʻoku kau ʻi he tokolahí ʻa e faʻahinga ʻoku nau fakakaukau ʻoku pani kinautolu ka ʻoku ʻikai. Ko e fakatātaá, ko e niʻihi naʻa nau faʻa kai ʻa e maá mo inu ʻa e uainé kuo nau tuku ia ki muí ni mai. ʻOku maʻu nai ʻe he niʻihi ʻa e ngaahi palopalema fakaeʻatamai pe fakaeongo pea nau tui te nau pule fakataha mo  Kalaisi ʻi hēvani. ʻOku hā mahino, ʻoku ʻikai ke tau ʻiloʻi tofu pē ʻa e tokolahi ʻo e kau pani ʻoku kei toe ʻi he māmaní.

14. Ko e hā ʻoku leaʻaki ʻe he Tohi Tapú fekauʻaki mo e tokolahi ʻo e kau pani te nau ʻi he māmaní ʻi he taimi ʻe kamata ai ʻa e fuʻu mamahi lahí?

¹⁴ ʻE ʻi ai ʻa e kau pani ʻi he ngaahi feituʻu lahi ʻo e māmaní ʻi he taimi ʻe haʻu ai ʻa Sīsū ʻo ʻave kinautolu ki hēvaní. ʻOku pehē ʻe he Tohi Tapú ʻe hanga ʻe Sīsū ʻo “fekauʻi atu ʻene kau ʻāngeló mo ha ifi talupite leʻo-lahi, pea te nau tānaki fakataha mai ʻa ʻene faʻahinga kuo filí mei he ngaahi matangi ʻe faá, mei he ngataʻanga ʻe taha ʻo e ngaahi langí ʻo aʻu ki he ngataʻanga ʻe tahá.” (Māt. 24:31) ʻOku toe fakahaaʻi mai ʻe he Tohi Tapú ʻi he lolotonga ʻa e ngaahi ʻaho fakaʻosí, ko e tokosiʻi ʻo e kau paní te nau kei toe ʻi he māmaní. (Fkh. 12:17) Ka ʻoku ʻikai ke tala mai ai ʻa e tokolahi ʻo kinautolu ʻe toé ʻi he taimi ʻe kamata ai ʻa e fuʻu mamahi lahí.

15, 16. Ko e hā ʻoku fiemaʻu ke tau mahinoʻi fekauʻaki mo hono fili ʻe Sihova ʻa e toko 144,000?

¹⁵ ʻOku fakapapauʻi ʻe Sihova ʻa e taimi te ne fili ai ʻa e kau paní. (Loma 8:28-30) Naʻe kamata ke fili ʻe Sihova ʻa e kau paní hili ʻa e toetuʻu ʻa Sīsuú. ʻOku hā ngali naʻe pani ʻa e kau Kalisitiane moʻoni kotoa pē ʻi he ʻuluaki senitulí. ʻI he hili ʻa e taʻu ʻe lauingeau mei ai, ko e tokolahi taha ʻo e faʻahinga naʻe lau ko e Kalisitiané naʻe ʻikai ke nau muimui moʻoni kia Kalaisi. Naʻa mo ia, lolotonga ʻa e ngaahi taʻu ko iá, naʻe pani ʻe Sihova ʻa e kiʻi tokosiʻi ʻo e kau Kalisitiane moʻoní. Naʻa nau hangē ko e uite ko ia naʻe lave ki ai ʻa Sīsū ʻe tupu ʻi he lotolotonga ʻo e teá. (Māt. 13:24-30) Lolotonga ʻa e ngaahi ʻaho fakaʻosí, kuo hokohoko atu hono fili ʻe Sihova ʻa e kakai ke nau hoko ko e konga ʻo e toko 144,000. ^[2] Ko ia, kapau ʻoku fakapapauʻi ʻe he ʻOtuá ke fili ʻa e niʻihi ko ení ki muʻa pē ʻi he ngataʻangá, ko e moʻoni heʻikai haʻatau veiveiua ʻokú ne fai ʻa e meʻa ʻoku totonú. (ʻAi. 45:9; Tan. 4:35; lau ʻa e Loma 9:11, 16.) ^[3] Kuo pau ke tau tokanga ke ʻoua te tau fakafeangai hangē ko e kau ngāue naʻa nau lāunga fekauʻaki mo e fakafeangai ʻa e pulé ki he faʻahinga naʻa nau ngāue he houa fakaʻosí.​—Lau ʻa e Mātiu 20:8-15.

¹⁶ ʻOku ʻikai ke hoko ʻa e faʻahinga kotoa ʻoku nau maʻu ʻa e ʻamanaki ke moʻui ʻi hēvaní ko e konga ʻo e “tamaioʻeiki anga-tonu mo potó.” (Māt. 24:45-47) Hangē pē ko ia ʻi he ʻuluaki senitulí, ʻoku ngāueʻaki ʻe Sihova mo Sīsū ha kiʻi tokosiʻi ke ne fafangaʻi pe akoʻi ʻa e tokolahi ʻi he ʻahó ni. Ko e kau Kalisitiane pani tokosiʻi pē ʻi he ʻuluaki senitulí naʻe ngāueʻaki ke nau hiki ʻa e Ngaahi Konga Tohi Tapu Faka-Kalisi Kalisitiané. Pea ʻi he ʻahó ni, ko e kau Kalisitiane pani tokosiʻi pē kuo nau maʻu ʻa e fatongia ke ʻoatu ki he kakai ʻa e ʻOtuá ʻa e “meʻakaí ʻi he taimi totonu.”

17. Ko e hā kuó ke ako mei he kupu ko ení?

¹⁷ Ko e hā kuo tau ako mei he kupu ko ení? Kuo fili ʻe Sihova ke ʻoange ʻa e moʻui taʻengata ʻi he māmaní ki he tokolahi taha ʻo hono kakaí pea ko e moʻui ʻi hēvaní ki he faʻahinga te nau pule fakataha mo Sīsuú. ʻOku fakapaleʻi ʻe Sihova ʻa e kotoa ʻo ʻene kau sevānití, ʻa e “tangata Siu” mo e “tuʻunga tangata ʻe toko hongofulu,” pea ʻokú ne fiemaʻu ke nau talangofua ki he ngaahi lao tatau pea nofoʻaki faitōnunga ai pē. Kuo pau ke hanganaki anga-fakatōkilalo ʻa e tokotaha kotoa. Kuo pau ke nau tauhi fakataha kotoa kiate ia mo nau fāʻūtaha. Pea kuo pau ke nau tauhi kotoa ʻa e melinó ʻi he fakatahaʻangá. ʻI heʻetau ofi ange ki he ngataʻangá, ʻofa ke tau hanganaki tauhi kotoa kia Sihova pea muimui ʻia Kalaisi ko e tākanga pē tahá.