KAPAU kuó ke hao moʻui atu mei ha fakatamaki fakanatula, te ke mahinoʻi nai ʻa e meʻa kuo aʻusia ʻe he faʻahinga kehe kuo nau haó: ʻohovale, ʻikai tui ʻoku hoko moʻoni ia, puputuʻu, hohaʻatuʻu, pea mo ilifia. Ko e faʻahinga loto-siʻi mo ongosia tokolahi mei he fakatamakí ʻoku nau foʻi ʻi he moʻuí.

Kapau kuo uesia hoʻo moʻuí ʻe ha fakatamaki fakanatula, te ke ongoʻi nai ʻoku mei ʻosi ʻa hoʻo kātakí. Te ke ongoʻi nai ʻoku ʻikai ha toe ʻaonga ke kei moʻui. Kae kehe, ʻoku fakamatala ʻa e Tohi Tapú ko hoʻo moʻuí ʻoku tuha ke hoko atu pea ʻe lava ke ke maʻu ha makatuʻunga pau ki he ʻamanaki ki ha kahaʻu lelei ange.

ʻI he Tangata Malanga 7:8 ʻoku pehē: “ʻOku lelei ange ʻa e ikuʻanga ʻo ha meʻa ʻi hono kamataʻangá.” ʻI hoʻo kamata fakaakeake mei ha fakatamaki, ʻoku hā ngali ʻikai ha toe ʻamanaki ia ke toe moʻui. Ka ʻi hoʻo anga-kātaki ʻi hoʻo langalanga hake hoʻo moʻuí, ʻe lelei ange ai ʻa e ngaahi meʻá.

ʻOku tomuʻa tala ʻe he Tohi Tapú ʻa e taimi “ʻe ʻikai ke toe ongona . . . ha leʻo ʻo e tangi pe ko ha tangi ʻi he mamahi.” (ʻAisea 65:19) ʻE hoko ʻo moʻoni eni ʻi he taimi ʻe liliu ai ʻa e foʻi māmaní ki he palataisi ʻi he malumalu ʻo e Puleʻanga ʻo e ʻOtuá. (Saame 37:11, 29) Ko e fakatamaki fakanatulá ʻe hoko ko e meʻa ia ʻo e kuohilí. Ko ha faʻahinga manatu fakamamahi fakaesino pe fakaeongo ʻe toʻo ʻosi atu ia ʻo taʻengata, koeʻuhí ko e ʻOtua Māfimafi-Aoniú ʻokú ne talaʻofa: “ʻE ʻikai toe manatua ʻa e ngaahi meʻa muʻá, pea ʻe ʻikai ke ʻalu hake ia ʻi he lotó.”​—ʻAisea 65:17.

Fakakaukau angé: Kuo fokotuʻutuʻu ʻe he Tokotaha-Fakatupú “ke ʻoatu kiate kimoutolu ha kahaʻu pea mo ha ʻamanaki”​—ha moʻui melino ʻi he founga-pule haohaoa ʻa e ʻOtuá. (Selemaia 29:11) ʻE lava ʻe he ʻilo ko eni mei he Tohi Tapú ʻo tokoniʻi koe ke ke ʻiloʻi ʻoku kei tuha hoʻo moʻuí ke hoko atu? Ko Sally, naʻe lave ki ai ʻetau kupu ki muʻá, ʻokú ne pehē: “Ko hono fakamanatu ʻa e ngaahi meʻa fakaofo kotoa pē ʻe fai ʻe he Puleʻanga ʻo e ʻOtuá maʻa kitautolu ʻi he kahaʻú ʻoku lava ke ne tokoniʻi kita ke ʻoua ʻe toe fakakaukau ki he ngaahi meʻa fakamamahi kotoa pē kuo hokó kae kātakiʻi ʻa e tuʻunga lolotongá.”

ʻIkai ʻoku lelei ke ako ʻo fekauʻaki mo e meʻa ʻe vavé ni ke fai ʻe he Puleʻanga ʻo e ʻOtuá ki he faʻahinga ʻo e tangatá? ʻI he fai peheé ʻe lava ke ke maʻu ai ʻa e tuipau neongo hoʻo faingataʻaʻia ʻi he fakatamaki fakanatulá, ʻoku tuha ke hoko atu hoʻo moʻuí ʻi he taimí ni fakataha mo hoʻo tatali vēkeveke atu ki ha kahaʻu ʻoku ʻatā mei he fakatamaki fakanatulá. Ka ʻi he taimi ní, ʻoku ʻomai ʻe he Tohi Tapú ha tataki ʻaonga ʻe lava ke ne tokoniʻi koe ke fekuki ai mo e haʻahaʻa ʻo e fakatamaki fakanatulá. Sio angé ki ha fakatātā ʻe niʻihi.