BANTU BAYANDA KUTONDEZYEGWA LUYANDO. Kunyina cikwati, mukwasyi naa cilongwe cikonzya kuzwidilila kuti kakunyina luyando. Nkakaambo kaako kwaambwa kuti, luyando lulayandika kapati kutegwa muntu apone kaliibide mumizeezo akukkomana. Pele ino luyando ilwaambwa aawa ninzi?

Luyando ilwaambwa aawa taluli loolo iluba akati kamwaalumi amukaintu pe, nokuba kuti alwalo lulayandika. Muciindi caboobo, luyando ilwaambwa aawa lulisumpukide nkaambo lupa kuti muntu acite zintu ikugwasya bamwi, mane buya akubikka zintu nzyayanda musyule. Luyando luli boobu lweendelezyegwa anjiisyo zyabunaleza pele alimwi lulasangalizya.

Bupanduluzi bubotu kapati bwaluyando bwaamba kuti: “Luyando lulakkazika moyo alimwi lulaaluzyalo. Luyando talukwe munyono, talulidundi, talulisumpuli, talukwe cisapi, talubikkili buyo maano kuzintu nzyoluyanda, talunyemi-nyemi, talubikkilili. Talukkomanini kutalulama, pele lukkomanina kasimpe. Lulajatila zintu zyoonse, . . . lulalangila zintu zyoonse, lulaliyumya muzintu zyoonse. Luyando talumani.”—1 Bakorinto 13:4-8.

Luyando luli boobu “talumani” nkaambo lunooliko lyoonse. Mane buya lulakonzya kuyuma kapati mukuya kwaciindi. Mbwaanga lulakkazika moyo, lulaaluzyalo alimwi lulalekelela, nkokuti ‘ncaanzyo calukamantano cilondokede.’ (Bakolose 3:14) Akaambo kaceeci, zilongwe izyeendelezyegwa aluyando luli boobu nziyumu alimwi bantu ibajatikizyidwe inga balikkomene nokuba kuti tabalondokede. Mucikozyanyo, atulange-lange bubambe bwacikwati.

Jesu Kristo wakayiisya njiisyo ziyandika kapati kujatikizya cikwati. Mucikozyanyo wakaamba kuti: “‘Mwaalumi uyoosiya bausyi abanyina akukakatila kumukaintu wakwe, eelyo aaba bobilo bayooba mubili omwe’ . . . Aboobo aabo Leza mbaaswaanganya kutabi muntu uubaandaanya.” (Matayo 19:5, 6) Aawa kuli njiisyo zyobilo ziyandika kapati.

“AABA BOBILO BAYOOBA MUBILI OMWE.” Cikwati mbobubambe bwacilongwe cini-cini bantu ncobakonzya kuba ancico, alimwi luyando ndolukonzya kucikwabilila kukutasyomeka kuli koonse, nkokuti mulumi naa mukaintu ikuba “mubili omwe” amuntu ngobatakwetene limwi. (1 Bakorinto 6:16; Bahebrayo 13:4) Kutasyomeka kupa kuti bantu baleke kusyomana alimwi kulakonzya kumana cikwati. Ikuti kakuli bana, balakonzya kupenga kapati mumizeezo ambweni akubapa kulimvwa kutayandwa, kutakwabililwa mane buya akunyema.

“AABO LEZA MBAASWAANGANYA.” Kuyungizya waawo, cikwati cilisetekene. Banabukwetene ibabulemeka bubambe oobu balasolekesya kuyumya cikwati cabo. Tabalangauli nzila yakuzwa mucikwati ikuti naa basikilwa mapenzi. Luyando iluli akati kabo nduyumu alimwi taluzungaani pe. Luyando luli boobo “lulajatila zintu zyoonse,” lulagwasya kuzunda mapenzi akupa kuti kube lukamantano aluumuno mucikwati.

Ciindi bazyali nobatondezya luyando lwakulyaaba akati kabo, eeci cipa kuti bana mumukwasyi bakomene kabotu. Mukubusi wazina lya Jessica wakaamba kuti: “Bataata abamaama balamvwana kapati alimwi balalemekana. Ciindi nondibona bamaama kabatondezya bulemu kuli bataata, cindipa kuti andime ndiyande kuba mbuli mbabo.”

Luyando mbobube bupati bwa Leza. Mane buya Bbaibbele lyaamba kuti: “Leza nduyando.” (1 Johane 4:8) Nkakaambo kaako tacigambyi kuti Jehova waambwa kuti ngu “Leza uukkomene.” (1 Timoteyo 1:11) Andiswe tunookkomene ikuti naa twasolekesya kwiiya bube bwa Mulengi wesu—kwaambisya luyando. Lugwalo lwa Baefeso 5:1, 2 lwaamba kuti: “Amwiiye Leza, mbomuli bana bayandwa, alimwi amuzumanane kweenda muluyando.”