1. (a) Jehova i helpim yumi long bilip na wet long wanem samting? (b) Wanem mining bilong dispela tok “bilip na wetim Jehova”? (Lukim “Mining Bilong Tok.”)

 JEHOVA i helpim ol man i laikim em long wetim gutpela samting bai kamap bihain. Klostu nau, em bai pinisim sik, bel hevi, na dai. (Rev. 21:3, 4) Em bai helpim “ol man i gat pasin daun” em ol i bilip na wet long em long mekim graun i kamap wanpela paradais. (Sng. 37:9-11) Na em bai opim rot long yumi olgeta wan wan long pas gut moa wantaim em winim pasin bilong yumi long pas gut wantaim em long nau. Dispela em gutpela samting tru yumi ken bilip na wet long en! Tasol wanem samting i stap olsem as na yumi bilip olsem ol tok promis bilong God bai kamap tru? Oltaim Jehova i save truim tok promis bilong em. Olsem na i gat gutpela risen long yumi “bilip na wetim Jehova.” * (Sng. 27:14) Yumi kamapim klia dispela taim yumi amamas na yumi no les kwik long wet long God bilong yumi i truim ol tok promis bilong em.​—Ais. 55:10, 11.

2. Jehova i kamapim klia pinis wanem samting?

² Jehova i bin kamapim klia pinis olsem em i save truim ol tok promis bilong em. Skelim wanpela eksampel. Long Buk Revelesen, Jehova i promis olsem long taim bilong yumi, em bai bringim ol manmeri bilong olgeta kantri na traib na tokples, na bungim ol wantaim long mekim lotu i tru. Long nau, Baibel i kolim dispela lain olsem “bikpela lain manmeri.” (Rev. 7:9, 10) Insait long dispela lain, i gat ol man, ol meri, na ol pikinini bilong kain kain skin kala, tokples, na bekgraun, em ol i stap bel isi na wanbel olsem wanpela lain brata long olgeta hap bilong graun. (Sng. 133:1; Jon 10:16) Na tu, dispela bikpela lain manmeri i givim bel tru long autim tok. Oltaim ol i redi long tokaut long bilip bilong  ol long ol man husat i laik harim tok olsem bai i gat gutpela sindaun long bihain. (Mat. 28:19, 20; Rev. 14:6, 7; 22:17) Sapos yu insait long dispela bikpela lain manmeri, orait tru tumas bilip bilong yu long ol gutpela samting bai kamap bihain i dia tumas long yu.

3. Satan i laik mekim wanem?

³ Satan i laik bagarapim pasin bilong yu long bilip na wet. Em i laik bai yu ting olsem Jehova i no save tingim yu na Em i no inap truim ol tok promis bilong em. Sapos Satan i bagarapim pasin bilong yumi long bilip na wet, orait yumi bai pret, na tu, yumi inap stop long mekim wok bilong Jehova. Olsem bai yumi stori long dispela atikol, Satan i bin traim long bagarapim pasin bilong Jop long bilip na wet, na tu, em i bin traim long stopim Jop long mekim wok bilong Jehova.

4. Yumi bai stori long wanem samting long dispela atikol? (Jop 1:9-12)

⁴ Long dispela atikol, yumi bai stori long ol trik Satan i bin yusim bilong fosim Jop long lusim pasin bilong stap gut long God. (Ritim Jop 1:9-12.) Na tu, yumi bai stori long samting yumi inap lainim long eksampel bilong Jop na risen na yumi mas tingim olsem God i laikim yumi na Em bai inapim ol tok promis bilong em.   

5-6. Insait long sotpela haptaim tasol, wanem samting i painim Jop?

⁵ Jop i gat gutpela sindaun tru. Em i pas gut wantaim Jehova. Em i gat bikpela famili em ol i stap wanbel wantaim, na em i gat planti mani kago. (Jop 1:1-5) Tasol insait long wanpela de tasol, Jop i lusim olgeta samting. Pastaim, ol animal bilong em i dai. (Jop 1:13-17) Bihain, ol pikinini bilong em i dai. Tingim bikpela bel hevi Jop i karim. Ol papamama i save bel hevi tru taim wanpela pikinini bilong ol i dai. So tingim, ating Jop na meri bilong em i kirap nogut tru, na ol i bel hevi tru na krai sori taim ol i painimaut olsem olgeta 10-pela pikinini bilong ol i dai. Olsem na Jop i bin brukim klos bilong em na em i krai nogut tru na pundaun long graun!​—Jop 1:18-20.

⁶ Bihain Satan i kamapim wanpela sik nogut tru long Jop na semim em. (Jop 2:6-8; 7:5) Paslain long dispela hevi i kamap, ol man long komiuniti bilong Jop i save rispektim em tru. Ol i save go long em bilong kisim helpim. (Jop 31:18) Tasol nau ol i sakim em. Ol i no laikim em; ol brata bilong em, ol wanblut bilong em, na tu, ol wokman bilong em, olgeta i sakim em!​—Jop 19:13, 14, 16.

7. (a) Jop i ting olsem husat i as bilong pen na hevi em i karim, tasol em i no laik mekim wanem? (b) Olsem wanem wanpela Kristen inap karim wankain hevi olsem piksa i soim?

⁷ Satan i laik bai Jop i ting olsem em i karim pen na hevi bikos Jehova i no orait moa long em. Olsem, em i yusim bikpela win long bagarapim haus em 10-pela pikinini bilong Jop i bung na kaikai i stap long en. (Jop 1:18, 19) Na tu, em i mekim paia i lusim heven na kam daun na bagarapim ol animal bilong Jop na ol wokman em ol i lukautim ol dispela animal. (Jop 1:16) Dispela win na paia i kam long heven, olsem na Jop i ting olsem Jehova God em i as bilong ol dispela hevi. Jop i ting olsem em i mekim Jehova i bel hevi. Maski i olsem, em i no laik mekim tok nogut long Papa bilong em long heven. Jop i tokaut olsem long ol yia i go pinis em i kisim planti gutpela samting i kam long Jehova. Olsem na em i tingting olsem sapos em i bin amamas long kisim ol dispela gutpela samting, orait em i mas amamas tu long karim hevi long ol samting nogut i painim em. Em i tok: “Bai mi wok yet long litimapim nem bilong Jehova.” (Jop 1:20, 21; 2:10) Maski Jop i lusim mani bilong em, ol pikinini bilong em i dai, na helt bilong em i bagarap, em i wok yet long stap gut  long God. Tasol Satan i no lusim Jop, em i traim narapela rot.

8. Wanem narapela rot Satan i yusim bilong traim Jop?

⁸ Satan i yusim narapela rot gen long traim Jop; em i yusim 3-pela man em ol i giaman olsem ol i pren bilong Jop long mekim Jop i pilim olsem em i samting nating. Ol dispela man i tok Jop i karim pen na hevi bikos em i mekim planti rong. (Jop 22:5-9) Na tu, ol i laik mekim Jop i ting olsem maski em i no man nogut, olgeta samting em i mekim bilong amamasim God ol i samting nating. (Jop 4:18; 22:2, 3; 25:4) Ol i laik mekim Jop i ting olsem God i no laikim em, na God i no inap lukautim em, na i no gat wok long em i lotuim Em. Ol toktok bilong ol inap mekim Jop i pilim olsem i no gat gutpela samting inap painim em.

9. Wanem samting i helpim Jop long strongim bel na sanap strong?

⁹ Piksaim ol samting i kamap. Jop i sindaun antap long ol sit bilong paia, em i karim bikpela pen tru. (Jop 2:8) Ol pren bilong em i wok yet long sutim tok long pasin bilong em na ol i traim long bagarapim gutnem bilong em. Ol hevi em i karim i olsem ol hevipela ston, na bel hevi em i pilim long ol pikinini bilong em i dai i brukim tru lewa bilong em. Pastaim, Jop i no mekim wanpela tok. (Jop 2:13–3:1) Sapos ol giaman pren bilong Jop i ting olsem as na em i no mekim wanpela tok i makim olsem em bai givim baksait long Krieta bilong em, orait ol i popaia tru. Taim ol i toktok yet i stap, ating Jop i apim het bilong em na lukluk stret long ol giaman pren bilong em na em i tok: “I go inap long taim mi dai, mi no inap lusim pasin bilong mi long i stap gut long God!” (Jop 27:5) Wanem samting i helpim Jop long strongim bel tru na sanap strong maski em i karim pen na hevi? Maski bel bilong em i bagarap tru, em i no lusim pasin bilong bilip na wet olsem gutpela God bilong em bai pinisim pen na hevi bilong em. Em i save olsem maski sapos em i dai, Jehova bai kirapim bek em.​—Jop 14:13-15.

10. Stori bilong Jop i lainim yumi long wanem samting?

¹⁰ Stori bilong Jop i lainim yumi olsem Satan i no inap fosim yumi long lusim Jehova na yumi lainim tu olsem Jehova i save long olgeta samting i painim yumi. Na tu, stori bilong Jop inap lainim yumi long sampela moa bikpela skul. Skelim sampela skul em yumi inap kisim long Jop.

11. Sapos yumi wok yet long trastim Jehova, orait yumi ken bilip tru long wanem samting? (Jems 4:7)

¹¹ Jop i soim olsem sapos yumi wok yet long trastim Jehova, orait yumi ken bilip tru olsem yumi inap sanap strong na karim ol hevi i painim yumi na sakim Satan. Wanem samting bai kamap taim yumi mekim olsem? Baibel i helpim yumi long bilip tru olsem Devil bai lusim yumi na ranawe.​—Ritim Jems 4:7.

12. Olsem wanem bilip bilong kirap bek i strongim Jop?

¹² Yumi mas holimpas bilip bilong kirap bek. Olsem yumi stori long atikol i go pinis, planti taim Satan i save yusim pasin long pret long dai long mekim yumi lusim pasin bilong stap gut long God. Olsem stori bilong Jop i kamapim, Satan i sutim tok long Jop olsem em bai lusim olgeta samting em i gat—dispela i makim tu pasin bilong em long stap gut long God—bilong seivim laip bilong em yet. Satan i popaia tru. Maski long taim Jop i ting olsem em bai dai, em i wok yet long stap gut long Jehova. Em i trastim tru gutpela pasin bilong Jehova na em i bilip na wet long Jehova bai stretim bek olgeta samting, na dispela i helpim em long sanap strong na karim ol hevi. Jop i bilip olsem maski sapos Jehova i no helpim em long nau na em i lusim laip bilong em, orait Em bai kirapim em bek long bihain. Jop i bilip tru long kirap bek. Sapos yumi bilip tru long kirap bek, orait maski ol man i mekim wanem samting bilong pretim yumi long dai, yumi no inap lusim pasin bilong stap gut long God.

13. Bilong wanem yumi mas luksave gut long ol trik Satan i yusim bilong traim Jop?

¹³ Yumi mas luksave gut long ol trik Satan i yusim bilong traim Jop bikos em i save yusim ol wankain trik long traim yumi long nau. Lukim tok Satan i sutim, em i tok: “Sapos wanpela man [i no Jop tasol] i laik i dai, em bai givim olgeta samting bilong em bilong seivim laip bilong em yet.” (Jop 2:4, 5) I olsem Satan i tok, tru tru yumi no laikim Jehova God na yumi bai givim baksait long em bilong seivim laip bilong yumi yet. Na tu, Satan i tok moa olsem God i no laikim yumi na Em i no inap luksave long ol hatwok bilong yumi long amamasim Em. Yumi save pinis long tingting tru bilong Satan, olsem na yumi ol lain i bilip na wet long Jehova i no inap larim Satan i giamanim yumi.

14. Ol hevi inap helpim yumi long luksave long wanem samting long yumi yet? Stori long dispela.

¹⁴ Yumi mas tingim olsem ol hevi i painim yumi i opim rot long yumi inap luksave long sampela pasin bilong yumi em yumi mas stretim. Ol hevi Jop i karim i helpim em long luksave long sampela pasin we em i mas stretim. Olsem, em i luksave olsem em i mas kisim pasin bilong daunim tru em yet. (Jop 42:3) Yumi tu inap luksave long sampela pasin bilong yumi em yumi mas stretim taim hevi i painim yumi. Wanpela brata em nem bilong em Nikolay, * em i bin stap long kalabus, na tu, em i karim ol bikpela hevi long sait bilong helt, em i tok: “Haus kalabus em i olsem wanpela eksre, em inap soim ol pasin tru bilong wanpela Kristen.” Taim yumi luksave long ol pasin we yumi mas stretim, dispela bai helpim yumi long mekim ol samting bilong stretim ol dispela pasin.

15. Yumi mas putim yau long tok bilong husat, na bilong wanem?

¹⁵ Yumi mas putim yau long tok bilong Jehova, na i no long tok bilong ol birua bilong yumi. Jop i putim gut yau taim Jehova i toktok long  em. God i mekim ol tok bilong helpim Jop long wokim tingting, i olsem em i tok: ‘Yu lukim bikpela strong bilong mi long ol samting mi wokim? Mi save long olgeta samting i painim yu. Yu ting mi no inap long lukautim yu?’ Long pasin daun na long pasin i soim olsem em i pilim tru gutpela pasin bilong Jehova, Jop i tok: “Yau bilong mi i harim tok long yu, tasol nau, mi lukim yu stret long ai bilong mi yet.” (Jop 42:5) Ating Jop i sindaun i stap yet long ol sit bilong paia, bodi bilong em i pulap long ol sua, na ol pikinini bilong em i slip long matmat taim em i mekim ol dispela tok. Maski i olsem, Jehova i helpim Jop long luksave olsem Em i laikim em tru na Em i orait long em.​—Jop 42:7, 8.

16. Olsem Aisaia 49:15, 16 i kamapim, yumi mas tingim wanem samting taim yumi karim ol hevi?

¹⁶ Long nau tu, ol man inap mekim ol tok i daunim yumi na mekim ol pasin we i mekim yumi pilim olsem yumi samting nating. Ol inap traim long bagarapim gutnem bilong yumi wan wan o olsem wanpela oganaisesen, na mekim ol tok “giaman na sutim kain kain tok nogut” long yumi. (Mat. 5:11) Long stori bilong Jop, yumi lainim olsem Jehova i bilip tru olsem yumi bai stap gut long em taim yumi karim ol hevi. Jehova i laikim yumi na em i no inap lusim ol man i bilip na wet long em. (Ritim Aisaia 49:15, 16.) No ken putim yau long ol tok giaman em ol birua bilong God i mekim! James em wanpela brata long Teki na famili bilong em i bin bungim ol bikpela hevi, em i tok: “Mipela i luksave olsem pasin bilong putim yau long ol tok giaman ol man i mekim long lain bilong God inap bagarapim bel bilong mipela. So mipela i putim tingting long ol gutpela blesing em Kingdom bai kamapim long bihain na mipela i wok yet long  mekim wok bilong Jehova. Long dispela rot, mipela i holimpas amamas bilong mipela.” Olsem Jop, yumi laik putim yau long tok bilong Jehova! Ol tok giaman bilong ol birua bilong yumi i no inap bagarapim pasin bilong yumi long bilip na wet.

17. Yu lainim wanem samting long eksampel bilong ol bilipman na bilipmeri em Hibru 11 i stori long ol?

¹⁷ Jop em wanpela bilong ol wokman bilong Jehova husat i strongim bel na sanap strong long taim bilong ol bikpela hevi. Long pas aposel Pol i raitim i go long ol Kristen long Hibru, em i kolim nem bilong planti arapela wokman bilong Jehova na em i tok ol i “bikpela lain manmeri i olsem bikpela klaut.” (Hib. 12:1) Ol i bin karim ol bikpela hevi; tasol long laip olgeta bilong ol, ol i stap gut long Jehova. (Hib. 11:36-40) Yu ting pasin bilong ol long sanap strong na ol hatwok bilong ol i lus nating? Nogat tru! Maski long haptaim ol i stap laip yet ol i no lukim God i truim ol tok promis bilong em, ol i wok yet long bilip na wetim Jehova. Na ol i save tru olsem Jehova i orait long ol, olsem na ol i bilip tru olsem ol bai lukim ol tok promis bilong em i kamap tru. (Hib. 11:4, 5) Ol eksampel bilong ol i ken strongim tingting bilong yumi long wok yet long bilip na wetim Jehova.

18. Yu tingting strong long mekim wanem? (Hibru 11:6)

¹⁸ Long nau yumi stap long haptaim we ol pasin bilong graun i wok long i go nogut moa. (2 Tim. 3:13) Satan i no pinisim yet wok bilong em long mekim ol samting bilong traim ol wokman bilong God. Maski wanem ol hevi bai painim yumi long bihain, yumi ken tingting strong long givim bel tru long mekim ol wok bilong Jehova, na yumi ken save tru olsem “yumi bilip long God i gat laip.” (1 Tim. 4:10) Tingim, ol blesing God i givim long Jop i soim olsem “Jehova i gat pasin bilong sori tru na marimari.” (Jems 5:11) Yumi tu i ken wok yet long stap gut long Jehova, na yumi ken save tru olsem em bai givim gutpela pe long “ol man i wok strong long painim em.”​—Ritim Hibru 11:6.