1. Wanem sampela samting i save pretim ol man?

 SKELIM ol dispela ekspiriens. Nestor na meri bilong em María i laik i go autim tok long hap i sot long ol pablisa. * Tasol bilong inapim dispela mak, ol i mas senisim sampela samting long sindaun bilong ol. Maski i olsem, ol i pret na tingting planti olsem ol i no inap stap amamas sapos ol i gat liklik mani. Taim Biniam i kamap wanpela Witnes Bilong Jehova long kantri we ol i birua long wok bilong yumi, em i luksave olsem ol man inap mekim nogut long em bikos em i wanpela wokman bilong God. Dispela i pretim em. Tasol em i pret moa long famili bilong em bai ting wanem long em taim ol i painimaut long nupela lotu bilong em. Valérie i kisim wanpela sik kensa i nogut tru, na em i wok hat tru long painim wanpela dokta husat inap rispektim bilip bilong em we Baibel i as bilong en long sait bilong blut. Em i pret olsem em inap dai.

2. Wai na yumi mas wok strong long daunim pasin bilong pret?

² Yu bin pilim kain pret olsem? Planti bilong yumi i bin pilim olsem. Sapos yumi no lain long kontrolim pasin bilong yumi long pret, yumi inap mekim ol rong disisen na dispela inap bagarapim pasin pren bilong yumi wantaim Jehova. Dispela em samting Satan i laik yumi mas mekim. Na tu, em i laik yusim dispela pret yumi gat long mekim na bai yumi sakim ol lo bilong Jehova, dispela i makim tu wok em i givim long yumi long autim tok. (Rev. 12:17) Satan em i man nogut, em i no gat pasin marimari, na em i gat strong. Tasol yu inap lukautim yu yet na em i no ken bagarapim yu. Hau yu ken mekim olsem?

3. Wanem samting bai helpim yumi long daunim pret?

 ³ Taim yumi bilip tru olsem Jehova i laikim yumi—olsem em i stap long sait bilong yumi—yumi ken daunim ol samting Satan i mekim bilong pretim yumi. (Sng. 118:6) Olsem, man bilong raitim Buk Song 118 i bungim sampela bikpela hevi we i mekim em i bel hevi tru. Em i gat planti birua, sampela bilong ol em ol hetman (ves 9, 10). Sampela taim, em i karim bikpela presa tru (ves 13). Na Jehova i bin mekim save tru long em bilong stretim em (ves 18). Maski i olsem, em i tok: “Mi no inap pret.” Wanem samting i helpim em long pilim seif na em i no pret? Em i save olsem maski Jehova i stretim em, Papa bilong em long heven i laikim em tru. Em i bilip tru olsem maski wanem hevi em i karim, oltaim God i gat pasin laikim bai redi long helpim em.​—Sng. 118:29.

4. Sapos yumi bilip tru olsem God i laikim yumi, yumi inap daunim wanem kain pasin bilong pret?

⁴ Yumi mas bilip tru olsem Jehova i laikim yumi wan wan. Dispela bai helpim yumi long daunim 3-pela kain pasin bilong pret, (1) pret olsem yumi bai hatwok long lukautim famili long ol samting ol i nidim, (2) pret long man, na (3) pret long dai. Ol bratasista em yumi stori long ol long fes paragraf, ol i daunim ol samting i pretim ol bikos ol i bilip tru olsem God i laikim ol.

5. Wanem ol samting inap mekim wanpela het bilong famili i tingting planti? (Lukim fran pes piksa.)

⁵ Wanpela het bilong famili i gat bikpela wok tru long lukautim famili bilong em long ol samting bilong skin. (1 Tim. 5:8) Sapos yu het bilong famili, ating long haptaim bilong dispela pendemik, yu bin tingting planti olsem bos inap pinisim yu long wok. Ating yu wari olsem yu no inap baim kaikai samting em famili i nidim o peim rent bilong haus. Na tu, ating yu pret olsem sapos bos i pinisim yu long wok, yu no inap painim narapela wok mani. O wankain olsem Nestor na María em yumi stori pinis long ol, ating yu surik long senisim wok bilong yu na kisim wanpela wok i gat liklik pe. Satan i bin stopim planti lain long mekim wok bilong Jehova bikos ol i pret long kain ol samting olsem.

6. Satan i laik bai yumi holim wanem tingting?

⁶ Satan i laik bai yumi ting olsem Jehova i no tingim yumi wan wan na yumi yet i mas wok strong bilong lukautim famili bilong yumi. Olsem na yumi inap wok strong tru long mekim olgeta samting yumi inap mekim bilong holim gut wok mani bilong yumi, maski dispela i makim olsem yumi mas sakim sampela stiatok bilong Baibel.

7. Jisas i kirapim yumi long bilip long wanem samting?

⁷ Jisas i save gut long Papa winim olgeta narapela, na em i kirapim yumi long bilip olsem God “i save long ol samting [yumi] nidim paslain long [yumi] askim em.” (Mat. 6:8) Na Jisas i save tu olsem Jehova i redi long givim ol samting yumi nidim. Olsem ol Kristen, yumi insait long famili bilong God. Jehova em i Het bilong famili, na yumi ken bilip tru olsem em bai bihainim stiatok em i givim long olgeta het bilong famili long 1 Timoti 5:8.

8. (a) Wanem samting bai helpim yumi long daunim pret olsem yumi no inap lukautim famili bilong yumi? (Matyu 6:31-33) (b) Hau yumi ken bihainim pasin bilong tupela marit long piksa em ol i givim kaikai long wanpela sista?

⁸ Taim yumi bilip tru olsem Jehova i laikim yumi na em i laikim famili bilong yumi, yumi no inap i gat tupela tingting long bilip olsem yumi bai gat ol samting yumi nidim. (Ritim Matyu 6:31-33.) Jehova i laik lukautim yumi, na em i Man Bilong Givim samting! Taim em i wokim graun, em i givim ol samting yumi bai nidim bilong i stap laip, na tu, em i givim yumi planti samting moa. Em i wokim planti samting long graun bilong yumi ken kisim amamas long  en. (Stt. 2:9) Maski sampela taim yumi gat liklik samting tasol em yumi nidim, i gutpela long yumi tingim olsem ol dispela samting em inap stret long yumi. Oltaim Jehova i givim yumi ol samting yumi nidim. (Mat. 6:11) Yumi mas tingim olsem wanem ol samting bilong skin yumi lusim long nau, ol i no bikpela samting taim yumi skelim wantaim ol samting em gutpela God bilong yumi bai givim long yumi long nau na long bihain tu. Dispela em samting Nestor na María i luksave long en.​—Ais. 65:21, 22.

9. Yu kisim wanem skul long eksampel bilong Nestor na María?

⁹ Nestor na María i gat gutpela sindaun long Kolambia. Ol i tok: “Mipela i tingting long holim liklik samting na mekim bikpela wok moa bilong autim tok. Tasol mitupela i pret olsem mipela i no inap stap amamas sapos mipela i gat liklik mani.” Wanem samting i helpim ol long daunim pret? Ol i tingim planti rot em Jehova i soim olsem em i laikim ol. Ol i bilip tru olsem oltaim em bai lukautim ol, olsem na tupela i lusim wok mani bilong ol i gat bikpela pe. Ol i salim haus bilong ol na muv i go long hap bilong kantri we i gat bikpela nid bilong ol pablisa bilong Kingdom. Tupela i pilim olsem wanem long disisen bilong ol? Nestor i tok: “Mitupela i lukim truim bilong Matyu 6:33. Mipela i no bin sot long wanpela samting bilong skin. Nau mipela i stap amamas tru.”

10. Wai na yumi no kirap nogut olsem i gat pasin bilong pret long man?

¹⁰ Kirap long taim Adam na Iv i bikhet long Jehova, ol man i bringim hevi tasol long ol yet. (Ekl. 8:9) Olsem, ol man i mekim wok nogut long namba ol i gat, ol raskol i pait na bagarapim man, ol pikinini i buli na pretim ol wanskul bilong ol, na tu, sampela insait long famili i birua nogut tru long ol wanfamili bilong ol. So yumi no kirap nogut olsem i gat pasin bilong pret long man! Olsem wanem Satan inap yusim pasin bilong pret long man long daunim yumi?

11-12. Olsem wanem Satan i yusim pasin bilong pret long man long daunim yumi?

¹¹ Satan i save yusim pasin bilong pret long man long traim long fosim yumi long orait long sampela samting em Jehova i no orait long en, na long stopim yumi long autim tok. Satan i stiaim ol gavman na ol i tambuim wok bilong yumi na mekim nogut long yumi. (Luk 21:12; Rev. 2:10) Long dispela graun em Satan i bosim, em i yusim planti samting long kamapim ol infomesen i no stret na ol tok giaman long ol  Witnes Bilong Jehova. Ol man em ol i bilip long ol dispela tok giaman inap tok bilas long yumi o paitim yumi. (Mat. 10:36) Olsem wanem? Yumi kirap nogut long ol trik bilong Satan? Nogat tru. Long taim bilong ol aposel, em i bin yusim ol dispela trik.​—Apo. 5:27, 28, 40.

¹² Satan i save yusim pasin bilong pret long ol gavman, na tu, ol narapela samting bilong pretim yumi. Long sampela, pasin bilong pret long wanfamili bai ting wanem long ol taim ol i kamap Witnes, dispela i winim pasin bilong pret long ol narapela i paitim ol o mekim nogut long ol. Ol i laikim tru wanfamili bilong ol na ol i laik bai ol i save long Jehova na laikim em. Olsem na ol i save bel hevi tru taim ol i harim ol wanfamili bilong ol i toktok long pasin i no soim rispek long God tru na ol wokman bilong em. Tasol sampela taim, ol wanfamili em pastaim ol i birua long ol, bihain ol i kam long tok i tru. Tasol olsem wanem sapos ol wanfamili bilong yumi i no laik toktok moa wantaim yumi bikos long ol nupela bilip bilong yumi? Yumi bai mekim wanem?

13. Taim yumi bilip tru olsem God i laikim yumi, hau dispela i helpim yumi taim ol wanfamili i birua long yumi? (Buk Song 27:10)

¹³ Yumi ken kisim bel isi long naispela tok i stap long Buk Song 27:10. (Ritim.) Taim yumi tingim olsem Jehova i laikim tru yumi, dispela i mekim isi bel bilong yumi taim ol narapela i birua long yumi. Na yumi bilip tru olsem em bai blesim pasin bilong yumi long sanap strong. Jehova bai lukautim yumi long ol samting bilong skin, bel na tingting, na long sait bilong bilip winim tru ol narapela man! Dispela em samting Biniam, em yumi bin stori pinis long em, i luksave long en.

14. Yu lainim wanem samting long eksampel bilong Biniam?

¹⁴ Biniam i kamap wanpela Witnes Bilong Jehova maski em i save olsem gavman bai mekim nogut long em. Biniam i save olsem Jehova i laikim em. Lukim olsem wanem dispela i helpim em long daunim pasin bilong pret long man. Biniam i tok: “Gavman i mekim nogut tru long mi, em samting mi no bin ting long en. Tasol samting mi pret moa long en winim pasin birua bilong gavman em pasin birua bilong famili bilong mi. Mi pret olsem disisen bilong mi long kamap Witnes Bilong Jehova bai mekim papa bilong mi i bel hevi na famili bilong mi i no inap rispektim mi moa.” Maski i olsem, Biniam i bilip tru olsem oltaim Jehova i save lukautim ol lain Em i laikim. Biniam i tok: “Mi tingim tingim hau Jehova i bin helpim ol  narapela long sanap strong na karim hevi bilong mani, pasin birua, na hevi bilong ol narapela i pait long ol. Mi save olsem sapos mi stap gut long Jehova, em bai blesim mi. Taim ol i arestim mi planti taim na paitim mi, mi yet i luksave long olsem wanem Jehova i save helpim yumi sapos yumi stap gut long em.” Jehova i kamap Papa tru bilong Biniam, na lain bilong Em i kamap famili tru bilong em.

15. Wai na em nomol long yumi pret long dai?

¹⁵ Baibel i tokaut olsem dai em i wanpela birua. (1 Kor. 15:25, 26) Yumi inap pret taim yumi tingim dai, moa yet taim yumi yet o wanpela yumi laikim tru i sik nogut tru. Wai na yumi save pret long dai? Bikos Jehova i wokim yumi wantaim laik bilong stap laip oltaim. (Ekl. 3:11) Tasol taim i gat gutpela risen na yumi pret long dai, dispela inap lukautim laip bilong yumi. Olsem, em inap kirapim yumi long makim gut ol kaikai yumi kisim na long mekim ol eksasais, kisim helpim long ol dokta na kisim marasin taim yumi mas mekim olsem, na yumi abrusim ol samting we inap bagarapim laip bilong yumi.

16. Olsem wanem Satan inap yusim pasin bilong pret long daunim yumi?

¹⁶ Satan i save olsem yumi tingim tru laip bilong yumi. Na em i ting olsem yumi bai lusim olgeta samting yumi gat—na pasin pren bilong yumi wantaim Jehova tu—long lukautim laip bilong yumi. (Jop 2:4, 5) Tasol Satan i popaia tru! Maski i olsem, em “i gat strong bilong kamapim dai,” olsem na em inap yusim pasin bilong pret long dai long mekim na bai yumi lusim Jehova. (Hib. 2:14, 15) Sampela taim, ol man em Satan i stiaim ol, ol i save pretim yumi olsem ol bai kilim yumi dai sapos yumi no lusim bilip. Na long ol narapela taim, Satan inap lukim olsem yumi nidim tru helpim long wanpela bikpela sik yumi gat na em inap yusim dispela long mekim na bai yumi lusim bilip. Ol dokta o ol wanfamili em ol i no Witnes, ol inap putim presa long yumi long kisim blut, na dispela inap brukim lo bilong God. O ating wanpela inap kirapim yumi long kisim wanpela tritmen we i sakim ol stiatok bilong Baibel.

17. Olsem Rom 8:37-39 i kamapim, wai na yumi no ken pret long dai?

¹⁷ Yumi no laik dai, tasol sapos yumi dai, yumi save olsem Jehova bai wok yet long laikim yumi. (Ritim Rom 8:37-39.) Taim ol pren bilong Jehova i dai, em i save tingim ol, i olsem ol i stap laip yet. (Luk 20:37, 38) Em i gat bikpela laik tru long kirapim ol bek. (Jop 14:15) Jehova i bin givim bikpela pe tru so yumi “inap . . . kisim laip oltaim.” (Jon 3:16) Yumi save olsem Jehova i laikim tru yumi na em i tingim yumi. So yumi no laik lusim Jehova taim yumi sik o klostu yumi inap lusim laip bilong yumi, nogat. Yumi laik go long em bilong kisim bel isi, savetingting, na strong. Dispela em samting Valérie na man bilong em i bin mekim.​—Sng. 41:3.

18. Yu kisim wanem skul long eksampel bilong Valérie?

¹⁸ Taim Valérie i gat 35 krismas, em i kisim wanpela kain kensa i nogut tru. Skelim olsem wanem pasin laikim i helpim em long daunim pasin bilong pret long dai. Em i tok: “Dispela sik i senisim tru laip bilong mipela. Mi mas kisim bikpela operesen tru bilong i stap laip. Mi lukim planti dokta, tasol olgeta i no laik mekim operesen sapos mi no laik kisim blut. Mi pret, tasol mi tingim lo bilong God, na mi no laik tru long kisim blut! Long laip olgeta bilong mi, Jehova i soim mi olsem em i laikim mi tru. Nau rot i op long mi mas soim Em olsem mi laikim em. Long olgeta taim mi kisim nius nogut, mi save tingting strong moa long mekim Jehova i amamas na no ken larim Satan i win. Bihain mi kisim operesen na mi no kisim blut. Maski  hevi bilong helt i stap yet, oltaim Jehova i givim mipela ol samting mipela i nidim. Olsem, long miting bilong kongrigesen long wiken—paslain long mi painimaut long sik bilong mi—mipela i skelim atikol ‘Strongim Bel na Karim Hevi Long Nau.’ * Dispela atikol i helpim tru mipela. Mipela i ritim planti taim. Ol kain atikol olsem na gutpela sediul bilong mekim ol samting bilong lotu i helpim mi na man bilong mi long kisim bel isi, na tu, dispela i helpim mipela long holim stretpela tingting na mekim ol gutpela disisen.”

19. Klostu nau wanem samting bai kamap?

¹⁹ Jehova i helpim ol Kristen long olgeta hap bilong graun long ol bikpela hevi ol i karim, na ol i bin sanap strong na sakim Devil. (1 Pita 5:8, 9) Yu tu i ken mekim olsem. Klostu nau, Jehova bai stiaim Jisas na ol wanwok bilong em long “bagarapim ol samting Devil i kamapim.” (1 Jon 3:8) Bihain long dispela, ol manmeri bilong God em ol i lotuim em hia long graun ol i “no inap pret long wanpela samting na i no gat wanpela samting bai pretim” ol. (Ais. 54:14; Mai. 4:4) Tasol long nau, yumi mas wok strong long daunim pasin bilong yumi long pret.

20. Wanem samting bai helpim yumi long daunim pasin bilong pret?

²⁰ Yumi mas wok yet long strongim pasin bilong yumi long bilip olsem Jehova i laikim ol wokman bilong em na em i save lukautim ol. Yumi bai kisim helpim bilong mekim olsem taim yumi tingim tingim na stori long ol narapela long hau Jehova i bin helpim ol wokman bilong em long bipo. Na yumi ken tingim hau Jehova i bin helpim yumi wan wan long karim ol hevi i painim yumi. Wantaim helpim bilong Jehova, yumi ken daunim pasin bilong pret!​—Sng. 34:4.