Dyondza Eka Rito Ra Xikwembu

Hi Nga Va Hlawula Njhani Vanghana Lavanene?

Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. Ha yini hi fanele hi hlawula vanghana hi vutlhari?

Vanhu vo tala va lava ku amukeriwa hi van’wana. Hakanyingi ku navela loku ku hi endla hi tekelela lava hi tshamaka na vona. Kutani vanghana va hina va ni nkucetelo lowukulu eka langutelo leri nga etimbilwini ta hina. Xisweswo, ndlela leyi hi hlawulaka ha yona vanghana yi nga khumba leswi hi nga ta va xiswona.—Hlaya Swivuriso 4:23; 13:20.

Davhida mutsari wa Bibele la huhuteriweke u hlawule vanghana hi vutlhari. U tihlanganise ni vanhu lava n’wi pfuneke leswaku a hlayisa vutshembeki byakwe tanihi nandza wa Xikwembu. (Pisalema 26:4, 5, 11, 12) Hi xikombiso, Davhida u tsakele vunghana bya Yonathani hikuva Yonathani u n’wi khutaze leswaku a tshemba Yehovha.—Hlaya 1 Samuwele 23:16-18.

2. U nga va munghana wa Xikwembu hi ndlela yihi?

Hambileswi Yehovha a nga ni matimba hinkwawo, entiyisweni hi nga va vanghana vakwe. Hi xikombiso, Abrahama u ve munghana wa Xikwembu. Abrahama a tshemba Yehovha a tlhela a n’wi yingisa, kutani Yehovha a a n’wi languta tanihi munghana. (Genesa 22:2, 9-12; Yakobo 2:21-23) Loko hi tshemba Yehovha naswona hi endla leswi a hi byelaka leswaku hi swi endla, na hina hi nga va vanghana vakwe.—Hlaya Pisalema 15:1, 2.

  3. Xana vanghana lavanene va nga ku vuyerisa njhani?

Vanghana va ntiyiso va tshembeka naswona va ku pfuna leswaku u endla swilo leswinene. (Swivuriso 17:17; 18:24) Hi xikombiso, hambileswi Yonathani a hundza Davhida hi malembe ya 30 naswona hi ntolovelo a ta va mudyandzhaka exiluvelweni xa Israyele, u seketele Davhida hi ku tshembeka tanihi loyi a hlawuriwe hi Xikwembu leswaku a va hosi. Nakambe vanghana va ntiyiso va ni xivindzi xa ku ku lulamisa loko va vona leswaku u endla swiendlo swa vuphukuphuku. (Pisalema 141:5) Vanghana lava rhandzaka Xikwembu va ta ku pfuna leswaku u hlakulela mikhuva leyinene.—Hlaya 1 Vakorinto 15:33.

U nga hlangana ni vanhu lava rhandzaka leswi nga swinene ku fana na wena eHolweni ya Mfumo ya Timbhoni ta Yehovha. Kwalaho u ta kuma vanghana lava nga ta ku khutaza eka matshalatshala ya wena yo tsakisa Xikwembu.—Hlaya Vaheveru 10:24, 25.

Hambiswiritano, hambi ku ri vanghana lava rhandzaka Xikwembu minkarhi yin’wana va nga hi khomisa tingana. U nga khunguvanyeki hi ku olova hikwalaho ka swihoxo swa vona. (Eklesiasta 7:9, 20-22) Tsundzuka, ku hava munghana loyi a hetisekeke naswona vanghana lava rhandzaka Xikwembu i va nkoka eka hina. Rito ra Xikwembu ri hi khutaza ku honisa swihoxo swa Vakreste-kulorhi.—Hlaya Vakolosa 3:13.

4. Ku vuriwa yini loko vanhu lava tivulaka vanghana va wena va ku kaneta?

Vanhu vo tala loko va sungula ku kuma mpfuno wo twisisa Rito ra Xikwembu, van’wana va vanghana va vona va khale va va kaneta. Kumbexana vanghana vo tano a va yi twisisi ndzayo leyi pfunaka kumbe ntshembo wa xiviri lowu u wu kumeke eBibeleni. Kumbexana u nga va pfuna.—Hlaya Vakolosa 4:6.

Minkarhi yin’wana, vanhu lava tiendlaka vanghana va wena va nga ha sandza mahungu lamanene lama tsariweke eRitweni ra Xikwembu. (2 Petro 3:3, 4) Van’wana va nga ha sandza matshalatshala ya wena yo endla leswi nga swinene. (1 Petro 4:4) Loko sweswo swi humelela eka wena, u nga ha hlawula exikarhi ka ku va munghana wa vona ni ku va munghana wa Xikwembu. Loko u hlawula ku va munghana wa Xikwembu, u ta va u hlawule munghana wa nkoka loyi un’wana ni un’wana a nga n’wi hlawulaka.—Hlaya Yakobo 4:4, 8.

Leswaku u kuma rungula leri engetelekeke, vona ndzima 12 na 19 ta buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.