HI NKARHI wa xidzedze, u nga ha twa ku dzindza lokukulu. Xana ku ku chavisile?— * Kutani, Yesu u vitane valandzeri vakwe vambirhi leswaku i “Vana Va Dzindza-tilo.” A hi voneni leswaku ha yini a vule tano.

Valandzeri lavambirhi va Yesu a ku ri Yakobo na Yohane. I vamakwavo, vana va Zebediya ni nsati wakwe, Salome. Swi nga ha endleka Salome a ri sesi wa Mariya, mana wa Yesu. Kutani swi nga ha endleka Yesu, Yakobo na Yohane a va ri vamuzala naswona a va ri vanghana lavakulu tanihi leswi va kuleke swin’we.

Zebediya a a ri muphasi wa tinhlampfi ku katsa na Yakobo na Yohane. Ha vumbirhi bya vona i van’wana vo sungula lava Yesu a va hlawuleke leswaku va va valandzeri vakwe. Loko a va rhamba, hi ku hatlisa va tshike ntirho wa vona wo phasa kutani va n’wi landzela. Endzhakunyana Yesu u hlawule valandzeri vakwe va 12 leswaku va va vaapostola. Yakobo na Yohane a va ri van’wana va vona.

Eka tin’hweti ti nga ri tingani emahlweni ko va Yesu a dlayiwa, yena ni vaapostola vakwe a va ri karhi va famba entshaveni ya Samariya. A ri ya ri pela naswona hinkwavo a va karhele swinene. Kambe Vasamariya va vule leswaku a va swi lavi leswaku Yesu ni vaapostola vakwe va etlela emutini wa vona. Xana wa swi tiva leswaku ha yini?— A hi voneni.

Yesu ni vaapostola vakwe a va ri Vayuda naswona Vayuda vo tala a va nga okelani ndzilo ni Vasamariya. Kambe Yesu a nga ri tano. U va khome hi musa, hilaha Yakobo na Yohane a va fanele va endla hakona. Kambe vadyondzisiwa lavambirhi va hlundzukele Vasamariya lava nga va amukelangiki  naswona va vutise Yesu va ku: ‘Xana u lava hi byela ndzilo wu xika kutani wu va lovisa?’ Xana u anakanya leswaku Yesu u te yini?— U va byele leswaku a hi swinene leswi va swi vuleke! Yakobo na Yohane a va fanele va dyondza swo tala malunghana ni tintswalo.

Xiphiqo xin’wana lexikulu lexi Yakobo na Yohane a va ri na xona a va lava ku va vo sungula, leswi vulaka leswaku a va lava ku va va nkoka swinene. Emahlweninyana ko va Yesu a fa, va rhume mana wa vona eka yena leswaku a ya n’wi byela marito lawa: “Vula rito ra leswaku vana va mina lava vambirhi va tshama emfun’weni wa wena, un’wana evokweni ra wena ra xinene un’wanyana eka lera ximatsi.” Kutani, loko vaapostola lavan’wana va khume va twa leswi Yakobo na Yohane va swi endleke, va hlundzukile. Xana na wena a wu ta hlundzuka?—

Swi nga ha endleka leswaku a wu ta hlundzuka. A hi swi tsakeli loko vanhu van’wana va lava ku va vo sungula ni ku ringeta ku va va nkoka swinene. Endzhakunyana, Yakobo na Yohane va dyondze ndlela leyi va endleke xihoxo ha yona ni ku ka va nga vanga ni musa naswona va hundzukile. Va ve vaapostola lava nga ni rirhandzu ni musa. Xana hi nga dyondza yini eka leswi?—

Dyondzo leyi hi faneleke hi yi dyondza eka Yesu i ya leswaku na hina hi fanele hi kombana musa. Yesu u khome vanhu hi ndlela leyinene, ku katsa vavanuna, vavasati ni vana. Xana minkarhi hinkwayo u ta ringeta hi matimba ku tsundzuka xikombiso xakwe ni ku xi landzela?—