TA VATEKANI
1: Ku tinyiketela
LESWI SWI VULAKA SWONA
Nuna ni nsati lava tinyiketeleke evukatini bya vona, va byi teka byi ri bya nkoka naswona sweswo swi endla leswaku va tshembana handle ko chava leswaku va nga tshikana. Havambirhi va tiyiseka leswaku va ta namarhela xihlambanyo lexi va xi endleke hambiloko va langutana ni swiyimo swo tika.
Vatekani van’wana va titwa va boheka ku tshama swin’we hikwalaho ko lava ku tsakisa vanghana ni mindyangu ya vona. Kambe xa nkoka swinene, vatekani va fanele va rhandzana va tlhela va xiximana.
NSINYA WA NAWU WA LE BIBELENI: “Wanuna a nga fanelanga a tshika nsati wa yena.”—1 Vakorinto 7:11.
“Loko u tinyiketerile evukatini bya wena a wu fanelanga u khunguvanyeka hi ku hatlisa. U fanele u hatla u rivalela ni ku kombela ku rivaleriwa. A wu teki swiphiqo tanihi leswi nga tlhantlhekiki, leswi nga endlaka mi hetelela mi dlaye vukati.”—Micah.
LEXI ENDLAKA SWI VA SWA NKOKA
Loko vanhu lava nga tiyimiselangiki evukatini bya vona va langutana ni swiphiqo va tibyela leswi, ‘A hi fanelani’ kutani va lava tindlela to dlaya vukati.
“Vanhu van’wana va nghenela vukati va ri ni miehleketo yo byi dlaya loko swilo swi nga fambi kahle. Vanhu lava nghenelaka vukati va ri ni miehleketo ya ku byi dlaya loko va langutana ni swiphiqo, xihlambanyo xa vona xi va xi nga tiyanga ku sukela eku sunguleni.”—Jean.
LESWI U NGA SWI ENDLAKA
TIKAMBELE
Loko mi holova . . .
-
Xana wa tisola hileswi u tekaneke na yena?
-
Xana u titwa u lava ku tekana ni un’wana?
-
Xana u vula marito yo tanihi lama nge, “Ndza ku tshika” kumbe “Ndzi ta kuma un’wana wo antswa”?
Loko nhlamulo ya wena ku ri ina eka xin’wana xa swivutiso leswi nga laha henhla, sweswi i nkarhi wa leswaku u tiyisa vukati bya wena.
BURISANA NI NKATAKU
-
Xana ndlela leyi hi rhandzanaka ha yona ya ha fana ni le ku sunguleni? Loko swi nga ri tano, swi onhake kwihi?
-
I yini leswi hi nga swi endlaka sweswi leswaku hi tiyisa vukati bya hina?
SWIRINGANYETO
-
Mikarhi yin’wana tsalela murhandziwa wa wena rungula ra rirhandzu
-
Kombisa leswaku u rhandza nkataku hi ku veka swinepe swakwe etafuleni ra wena ra le ntirhweni
-
Fonela murhandziwa wa wena loko u ri entirhweni kumbe loko mi nga ri swin’we
NSINYA WA NAWU WA LE BIBELENI: “Leswi Xikwembu xi swi paneke swin’we, ku nga tshuki ku va ni munhu la swi hambanisaka.”—Matewu 19:6.
