Pakani a ko va nchumu lowu u ngo wu lorha kumbe nchumu lowu u navelaka leswaku wu endleka. Ku fikelela tipakani swi lava ku hlela kahle, ku tinyika nkarhi ni ku tirha hi matimba.

Ku fikelela tipakani swi nga ha teka masiku kumbe mavhiki ma nga ri mangani, tin’hweti, lembe kumbe ku tlula. Swi ya hi leswaku u tivekele tipakani ta nkarhi wo tanihi kwihi. Leswaku u kota ku fikelela tipakani leti swi nga ku tekelaka nkarhi wo leha ku ti fikelela, swi lava u sungula hi ku tivekela tipakani leti u nga kotaka ku ti fikelela hi ku hatlisa.

Ku fikelela tipakani ta wena swi nga endla leswaku u ya u titshemba, u va ni ntsako ni ku tiyisa vuxaka bya wena ni vanghana va wena.

Ku titshemba: Loko u tivekela tipakani u tlhela u kota ku ti fikelela, swi ta ku nyika matimba yo kota ku tivekela tipakani leti swi nga tekaka nkarhi wo leha ku ti fikelela. U ta tlhela u kota ku langutana ni mitlhontlho ya siku ni siku yo tanihi ntshikilelo wa tintangha.

Ku endla vanghana: Vanhu va rhandza ku tshama ni vanhu lava nga ni tipakani to karhi naswona va tikarhatelaka ku ti fikelela. Ku engetelela kwalaho, vunghana bya tiya loko wena ni munghana wa wena mi ri ni tipakani leti fanaka naswona mi tikarhatela ku ti fikelela.

Ntsako: Loko u tivekela tipakani kutani u ti fikelela, swi endla leswaku u tsaka.

“Ndzi rhandza ku tivekela tipakani. Ti endla ndzi tiva leswi ndzi swi lavaka naswona ndzi tikarhatela ku swi fikelela. Endzhaku ka loko u fikelele pakani ya wena, swa tsakisa ku anakanyisisa hi leswi u swi fikeleleke ivi u ku, ‘Hi mina loyi! Ndzi swi kotile ku fikelela swilo leswi a ndzi lava ku swi endla.’”—Christopher.

NSINYA WA NAWU WA LE BIBELENI: “Loyi a langutaka mheho a nge byali mbewu; naswona loyi a langutaka mapapa a nge tshoveli.”—Eklesiasta 11:4.

Hi leswi swin’wana leswi nga ku pfunaka u kota ku fikelela tipakani ta wena.

Tiva tipakani ta wena. Tsala tipakani leti u lavaka ku ti fikelela hi ku ya hi nkoka wa tona, ivi u hlawula leti u lavaka ku rhanga ha tona ku kondza u ti fikelela hinkwato.

Hlela. Eka pakani ha yin’we, endla leswi landzelaka:

• Tivekele nkarhi lowu u lavaka ku fikelela pakani ya wena ha wona.

• Hlela hinkwaswo leswi u faneleke u swi endla.

• Anakanya hi swiphiqo leswi nga ha va ka kona ni ndlela leyi u nga swi hlulaka ha yona.

Teka goza. U nga yimeli ku hlengeleta swilo hinkwaswo ku ri kona u nga ta sungula. Tivutise, ‘I yini lexi ndzi faneleke ndzi xi endla ku sungula leswaku ndzi ta kota ku fikelela pakani ya mina?’ Kutani xi endle. Loko u heta goza ha rin’we, tsala ehansi.

NSINYA WA NAWU WA LE BIBELENI: “Makungu ya lava va gingiritekaka ma endla leswi pfunaka.”—Swivuriso 21:5.