VANHU vo tala va yi tiva kahle mhaka ya Yesu loko a beleriwe exikarhi ka swigevenga swimbirhi ni ku dlayiwa emhandzini. (Mat. 27:35-38) Hambiswiritano, vanhu van’wana va tshemba leswaku Bibele ya hoxisa loko yi vula leswaku ntsumbu wa Yesu wu lunghiseleriwile ni ku tlhela wu lahliwa esirheni.—Mar. 15:42-46.

Vaxopaxopi van’wana va Tievhangeli va kanakana mhaka ya leswaku munhu loyi a dlayiweke a nga pfumeleriwa ku lahliwa esirheni hi ndlela ya ntolovelo. Va ehleketa leswaku a a nga lahliwi hi ndlela ya ntolovelo. Mutsari wa mahungu Ariel Sabar u tsale eka magazini wa Smithsonian a hlamusela xivangelo lexi endlaka van’wana va ehleketa tano, u te: “Ku vamba munhu exihambanweni a ku ri xigwevo lexi a xi nyikiwa xigevenga lexi chaviwaka ngopfu naswona vativi van’wana va vona yi nga twali mhaka ya leswaku Varhoma va nga xixima xigevenga xo tano hi ku xi pfumelela leswaku xi lahliwa hi ndlela yo xiximeka.” Varhoma a va lava ku nyumisa swigevenga leswi hi ndlela leyikulu ngopfu, kutani mitsumbu ya swona kumbexana a yi tshikiwa emhandzini leswaku yi dyiwa hi swiharhi swa nhova. Endzhaku ka sweswo, leswi nga sala a swi lahliwa esirheni.

Vayimburi va kume leswi hambaneke, va kume marhambu ya Vayuda van’wana lava dlayiweke. Hi 1968, ku kumeke marhambu ya wanuna loyi a nga dlayiwa hi nkarhi lowu Yesu a ha ri emisaveni. Ma kumiwe emasirheni ya ndyangu wa Vayuda ekusuhi ni le Yerusalema. A ma ri endzeni ka bokisi. Exikarhi ka wona a ku ri ni rhambu ra xirhendze. A ri beleriwe emhandzini hi xipikiri lexi leheke tisentimitara ta 11,5. Sabar u ri: “Xirhendze lexi kumiweke i xa wanuna la vuriwaka Yehochanan naswona xi swi veke erivaleni leswaku leswi Tievhangeli ti swi vulaka hi ku lahliwa ka Yesu esirheni ku nga va ku ri ntiyiso.” Kutani “xirhendze xa Yehochanan i xikombiso xa wanuna loyi a vambiweke exihambanweni enkarhini wa Yesu loyi Varhoma va n’wi pfumeleleke leswaku a lahliwa esirheni hi ndlela leyi Vayuda a va lahla hayona.”

Kambe vanhu van’wana va ha ri ni mavonelo lama nga faniki loko swi ta eka ndlela leyi Yesu a hayekiweke hayona emhandzini hikwalaho ka leswi va swi voneke eka xirhendze xa Yehochanan. Kambe mhaka leyi nga erivaleni i ku swigevenga swin’wana leswi dlayiweke a swi lahliwa esirheni ku fana na mani na mani. Swi le rivaleni leswaku leswi Bibele yi swi vulaka hi ku lahliwa ka Yesu esirheni i ntiyiso. Vumbhoni byi seketela leswi Bibele yi swi vulaka.

Xa nkoka swinene i ku Yehovha u swi vurile ka ha ri emahlweni leswaku Yesu a a ta lahliwa esirheni ra xifumi naswona a nga kona loyi a nga sivelaka rito ra Xikwembu ku hetiseka.—Esa. 53:9; 55:11.