MAVESI GHA MU BAIBOLO GHALONGOSOREKA
Mateyu 6:33—“Penjani Nanga Ufumu Wake”
“Ipo lutilirani kupenja dankha Ufumu na urunji wake, ndipo vinthu vinyake vyose ivi visazgikirengeko kwa imwe.”—Mateyu 6:33, Mang’anamuliro gha Charu Chiphya.
“Kweni penjani nanga Ufumu wake, na urunji wake; ndipo vyose vyeneivi viti visazgikirengeko kwa imwe.”—Mateyu 6:33, Tumbuka Bible.
Ivyo Lemba la Mateyu 6:33 Likung’anamura
Ufumu wa Chiuta ni boma lakuchanya ilo lizamufiska khumbo la Chiuta pano pasi. (Mateyu 6:9, 10) Munthu wakulongora kuti wakupenja Ufumu wa Chiuta para wakuwuwona kuti ndicho ntchinthu chakuzirwa chomene pa umoyo wake. a Ivi vikung’anamura kuti padera pa kuŵa wakukhumbisiska kusambira vya Ufumu wa Chiuta, wakwenera kuphalirakoso ŵanyake vinthu viwemi ivyo Ufumu uwu uzamufiska. (Mateyu 24:14) Munthu uyo wakupenja Ufumu wakweneraso kulomba kuti Ufumu uwu wize.—Luka 11:2.
Urunji wa Chiuta ukusazgaposo fundo zake pa nkhani ya chiwemi na chiheni. (Salimo 119:172) Ntheura munthu uyo wakupenja urunji wa Chiuta wakwenera kulondezga fundo zaurunji za Chiuta pa nkhani ya chiwemi na chiheni, ndipo fundo izi ni zakovwira nyengo zose.—Yesaya 48:17.
Mazgu ghakuti vinthu vinyake vyose ivi visazgikirengeko kwa imwe ni layizgo ilo Chiuta wakupeleka kuti waŵapenge vyakukhumbikwa wose awo ŵakudangizga Ufumu wake kweniso kulondezga fundo zake pa umoyo wawo.—Mateyu 6:31, 32.
Fundo za pa Mateyu 6:33
Yesu wakayowoya mazgu agha mu Upharazgi wake wa pa Phiri, uwo ukusangika mu Mateyu chaputara 5-7. Tikukayika yayi kuti ŵanandi awo ŵakategherezganga kwa Yesu ŵakaŵa ŵakavu. Ŵanthu aŵa ŵakwenera kuti ŵakaŵa na maghanoghano ghakuti ŵaŵike mtima wawo pakusanga vinthu vyakuthupi na kuŵa na nyengo yichoko waka yakupenjera Ufumu. Kweni Yesu wakaŵachiska kuti ŵawone umo Chiuta wakupwelelera vyakumera na vinyama. Chiuta wakulayizga kuti wachitenge mwakuyana waka ku ŵanthu awo ŵakupenja dankha Ufumu wake.—Mateyu 6:25-30.
Mautesi Pakuyowoya vya Lemba la Mateyu 6:33
Utesi: Munthu uyo wakupenja dankha Ufumu wasambazgenge.
Unenesko: Yesu wakati awo ŵakudangizga Ufumu wa Chiuta ŵaŵenge na vyakukhumbikwa pa umoyo wawo, nga ntchakurya na vyakuvwara. (Mateyu 6:25, 31, 32) Ndipouli, iyo wakalayizgapo yayi za vinthu vinandi vyakuthupi, panji kuti vitumbiko vya Chiuta vizamuwoneka kwizira mu usambazi wakuthupi. Nakuti Yesu wakachenjezga ŵalondezgi ŵake kuti ŵaleke kupenjisiska usambazi, chifukwa ungaŵapangiska kuti chiŵe chakusuzga kupenja dankha Ufumu wa Chiuta. (Mateyu 6:19, 20, 24) Mpositole Paulosi wakaŵikapo mtima kupenja dankha Ufumu wa Chiuta, kweni nyengo zinyake wakasoŵekeranga vinthu vyakuthupi. Nga ni Yesu, nayo wakachenjezga ŵanyake vya uheni wa kuŵikapo mtima kupenja usambazi.—Ŵafilipi 4:11, 12; 1 Timote 6:6-10.
Utesi: Ŵakhristu ŵakwenera yayi kugwira ntchito kuti ŵasange ivyo vikukhumbikwa.
Unenesko: Baibolo likuti Ŵakhristu ŵakwenera kugwira ntchito kuti ŵasange vyakukhumbikwa vyawo na vya mbumba zawo. (1 Ŵatesalonika 4:11, 12; 2 Ŵatesalonika 3:10; 1 Timote 5:8) Yesu wakayowoyapo yayi kuti ŵalondezgi ŵake ŵakwenera kupenja Ufumu pera; kweni wakati ŵakwenera kupenja dankha Ufumu.
Awo ŵakupenja dankha Ufumu wa Chiuta ndipo mbakukhumbisiska kugwira ntchito kuti ŵasange vyakukhumbikwa pa umoyo wawo, ŵakwenera kuŵa na chigomezgo chose kuti Chiuta waŵawovwirenge kusanga ivyo ŵakukhumbikwira nadi.—1 Timote 6:17-19.
a Mazgu ghakuti “lutilirani. . . kupenja” ghali kung’anamurika kufuma ku verebu la Chigiriki, ndipo ghakulongora chinthu icho chikulutilira kuchitika, ndipo mazgu agha ghangalembekaso kuti “lutizgani kupenja.” Ntheura Ufumu ndiwo chikwenera kuŵa chinthu chakwamba pa umoyo withu, ndipo tingawuwonanga mwakupepuka yayi panji kuwuŵika kuumaliro pa vyakuchita vithu.
Panji Mungatemwa Kuŵerengaso Nkhani Izi
VISAMBIZGO VYAKUZIRWA VYA MU BAIBOLO
Kasi Ufumu wa Chiuta Ni Vichi?
Pa uteŵeti wake wa pa charu chapasi, Yesu wakapharazga chomene vya Ufumu wa Chiuta. Kwa vyaka vinandi, ŵalondezgi ŵake ŵalutilira kulomba kuti Ufumu uwu wize.
MAFUMBO AGHO BAIBOLO LIKUZGORA
Kasi Ufumu wa Chiuta Uzamuchita Vichi?
Manyani ivyo Ufumu wa Chiuta uzamuchita pa charu chapasi.
MAVESI GHA MU BAIBOLO GHALONGOSOREKA
Lemba la Ŵafilipi 4:6, 7, Lalongosoreka—“Mureke Kwenjerwa . . . mu Vyose Ivyo Mukukavuka”
Kasi ni malurombo wuli agho ghangawovwira ŵateŵeti ŵa Chiuta kuti ŵaleke kwenjerwa na kuŵa na mtende wa mu mtima?
MAFUMBO AGHO BAIBOLO LIKUZGORA
Umo Tingalombera—Kasi Lurombo lwa Fumu Pera Ndilo Ndwakuzomerezgeka?
Kasi Chiuta wakupulika lurombo lwa Adada Ŵithu pera?
IVYO BAIBOLO LIKUSAMBIZGA
Yezgani Kusambira Nase Baibolo
Sangani mwaŵi wakusambira Baibolo munthowa yakudumbiskana na munthu.
