“Yesu wakati kwa iyo: “Ine ndine nthowa, unenesko, na umoyo. Palije uyo wakwiza kwa Adada kwambura kwizira mwa ine.”—Yohane 14:6, Mang’anamuliro gha Charu Chiphya.

 “Yesu wakanena nayo, Ine ndine Ntowa, na Unenesko, na Umoyo: palive muntu wakwiza ku Ŵadada, kweni mwa Ine pera.”—Yohane 14:6, Tumbuka Bible.

 Munthu uyo wakukhumba kusopa Adada, Yehova a Chiuta, wakwenera kumanya udindo wakuzirwa uwo Yesu wali nawo.

 “Ine ndine nthowa.” Yesu ndiyo ni “nthowa” yakuzomerezgeka yakufikira kwa Chiuta. Mwachiyelezgero, awo ŵakulomba kwa Chiuta ŵakwenera kuchita nthena kwizira mu zina la Yesu. (Yohane 16:23, 24) Nyifwa ya Yesu yikutovwira kuti tiphemane na Chiuta panji kuti Chiuta wambeso kutitemwa. (Ŵaroma 5:8-11) Yesu wakatilongora chiyelezgero chiwemi icho ŵanthu awo ŵakukhumba kukondweska Chiuta ŵakwenera kulondezga.—Yohane 13:15.

 “Ine ndine . . . unenesko.” Nyengo zose Yesu wakayowoyanga na kuchita vinthu mwaunenesko. (1 Petrosi 2:22) Para munthu wamutegherezga, wakasambiranga unenesko wakukhwaskana na Chiuta. (Yohane 8:31, 32) Yesu wakaŵaso “unenesko” chifukwa wakafiska uchimi wa mu Baibolo. Ntheura wakawovwira kuti ivyo Chiuta wakalayizga vifiskike.—Yohane 1:17; 2 Ŵakorinte 1:19, 20; Ŵakolose 2:16, 17.

 “Ine ndine . . . umoyo.” Yesu wakapeleka umoyo wake mwakuti awo ŵali na chipulikano mwa iyo ŵazakasange umoyo wamuyirayira. (Yohane 3:16, 36) Nakutiso Yesu ni “umoyo” kwa wose awo ŵali kufwa, chifukwa wazamuŵawuska ku ŵakufwa.—Yohane 5:28, 29; 11:25.

 “Palije uyo wakwiza kwa Adada kwambura kwizira mwa ine.” Wose awo ŵakukhumba kuŵa paubwezi na Chiuta ŵakwenera kuzomerezga udindo wapadera uwo Yesu wali nawo. Ŵakuchita nthena para ŵakulomba kwa Chiuta kwizira mu zina la Yesu, chifukwa ndipo ŵakulongora kuti ŵakumanya mazaza agho Khristu wali nagho. (Yohane 15:16) Iwo ŵakumanyaso kuti chiponosko chikwizira mwa Yesu pera.—Milimo 4:12; Ŵafilipi 2:8-11.

 Mu Yohane chaputara 13 m’paka 17 muli ulongozgi uwo Yesu wakapeleka ku ŵapositole ŵake ŵakugomezgeka 11 mu usiku wakuti machero ghake wafwenge. Mu chaputara 14, Yesu wakachiska ŵasambiri ŵake kuti ŵaŵe na chipulikano mwa iyo na Adada ŵake kweniso ŵakwenera kuŵatemwa na kuŵapulikira. (Yohane 14:1, 12, 15-17, 21, 23, 24) Wakavumbura ubwezi wapadera uwo uli pakati pa iyo na adada ŵake. (Yohane 14:10, 20, 28, 31) Nangauli wakakhala pachoko kuwelera kuchanya, Yesu wakasimikizgira ŵasambiri ŵake kuti waŵalekenge ŵekha yayi. (Yohane 14:18) Iyo wakaŵalayizgaso kuti waŵapenge “movwiri” ndipo wakati ni “mzimu utuŵa uwo Adada ŵazamutuma mu zina lane.” (Yohane 14:25-27) Mu nthowa iyi kweniso zinyake, Yesu wakaŵawovwira ŵasambiri ŵake kuti ŵanozgekere masuzgo agho ghakaŵa kunthazi.