IA AU I TE BIBILIA
Paradaiso
Eaha te paradaiso?
TA TE TAATA E PARAU RA
E aai noa te paradaiso. Aore ra e moemoeâ noa i reira te taata maitatai e fanaˈo ai i te ora mure ore a oaoa noa ˈi i ta ratou e rave.
TA TE BIBILIA E PARAU RA
Ua faahitihia te taˈo “paradaiso” no te faataa i te ô i Edene te nohoraa o na taata matamua. (Genese 2:7-15) Ia au i te Bibilia ua parahi raua i roto i te hoê aua aita e maˈi e e pohe i reira. (Genese 1:27, 28) No to raua râ faaroo ore i te Atua i ere ai raua i te paradaiso. Te tohu nei râ te Bibilia e e oaoa noa te taata i roto i te hoê paradaiso a muri aˈe.
FAUFAARAA IA ITE OE
No te mea e aroha te Atua, e haamaitai iho â oia i te feia e haamori ra ia ˈna ma te taiva ore i te hoê oraraa maitai i roto i te paradaiso. E faaite iho â oia i te taata eaha te rave ia mauruuru oia, ia noaa ïa te ite no nia ia ˈna e ia faaohipa i ta ˈna mau faaueraa. Ia na reira oe, e mauruuru oia ia oe. Ta te Bibilia ïa e parau ra.—Ioane 17:3; Ioane 1, 5:3.
“Ua ô hoi te Atua ra o Iehova i te ô . . . i Edene ra, e ua tuu ihora oia i te taata ta ˈna i hamani ra i reira.”—Genese 2:8.
Ihea te paradaiso e vai ai?
TA TE TAATA E PARAU RA
Tei te raˈi te paradaiso. Aore ra e haamauhia te reira i te fenua a muri aˈe.
TA TE BIBILIA E PARAU RA
Tei te fenua te paradaiso i te matamua ra. Ua haapapu te Atua e e noho te taata i te fenua nei e a muri noa ˈtu. Te parau ra te Bibilia e ua hamani oia i te fenua ia vai e a tau a hiti noa ˈtu. (Salamo 104:5) Te na ô atoa ra te Salamo 115:16: “Te mau raˈi ra, na Iehova ïa . . . area te fenua nei, ua horoa mai oia i te reira na te tamarii a te taata.”
No reira te Bibilia e faaite ai i te hoê parau fafau o te paradaiso i te fenua. I reira te Atua e haamaitai ai i te huitaata i te ora mure ore. E rahi te hau e te auhoêraa i reira. E mou roa te oto e te mauiui. I reira ïa te taata e fanaˈo roa ˈi i te mau mea nehenehe e te rau o te fenua.—Isaia 65:21-23.
“Inaha tei ǒ te taata ra te sekene o te Atua, . . . e e ore roa te pohe, e te oto, e te mihi, e te mauiui.”—Apokalupo 21:3, 4.
O vai te ora i roto i te paradaiso?
TA TE TAATA E PARAU RA
O te feia maitatai anaˈe te parahi i te paradaiso. Mea rahi te haapaoraa e haapii ra i te reira. Aita e rave rahi e taa ra eaha te rave ia fariihia ratou ei taata maitatai. No vetahi, e navai noa ia haere i te mau oroa faaroo e ia pure.
TA TE BIBILIA E PARAU RA
Te haapii ra te Bibilia e o “te feia parau-tia” te ora i roto i te paradaiso. O vai te feia parau-tia i te aro o te Atua? E ere te taata haere pure aita e rave ra i to ˈna hinaaro. Te na ô ra te Bibilia: “Tei te tusia taauahi e te mau tusia atoa to Iehova mauruuru, mai tei te faaroo i te parau a Iehova ra? inaha, e maitai rahi tei te haapao i tei te tusia.” (Samuela 1, 15:22) O te feia ïa e haapao i te mau faaueraa a te Atua i roto i te Bibilia “te feia parau-tia” e ora e a muri noa ˈtu i roto i te paradaiso.
TA OE E RAVE
Te haapaoraa i te mau faaueraa a te Atua, e ere i te haere-noa-raa i te pureraa. Ua taaihia râ i to oe haerea i te mau mahana atoa. Tei te huru o to oe haerea e mauruuru ai te Atua ia oe aore ra eita. A haapii maite i te Bibilia e ite ai oe eaha ta te Atua e farii. E ere i te mea fifi. Te na ô ra te Bibilia: “E ere hoi ta ˈna parau i te mea teimaha.” (Ioane 1, 5:3) Te tiai ru nei te Atua i te haamaitai ia oe no to oe faaroo ia ˈna i te oraraa i roto i te paradaiso.
“E parahi te feia parau-tia i nia i te fenua, e parahi tamau â ratou i reira.”—Salamo 37:29.
E au atoa outou . . .
TE PARE TIAIRAA
Te paradaiso i nia i te fenua, e moemoeâ anei?
Te taa-maitai-hia ra ua riro te paradaiso i nia i te fenua ei tumu parau feruri-noa-hia e te taata mai te tau mai â. E riro faahou anei te fenua ei paradaiso mai na mua ˈˈe?
