A feruri na i te tahi metua tane e aparau ra e ta ˈna tamaiti e hitu matahiti. Te na ô atura to ˈna papa: “I tahito roa ra, ua hamani te Atua i te fenua e te mau mea atoa i nia iho. Ua poiete i te mahana, te avaˈe e te mau fetia.” Te feruri ra ta ˈna tamaiti i tera mau parau e i muri iho, ua ui, “Papa, na vai i hamani i te Atua?”

Ua pahono te metua tane, “E ere te Atua i te mea poietehia. I vai noa na te Atua mai tahito mai â.” Ua navai tera tamaiti i tera parau. A paari ai râ, ua tamau i te feruri i te reira. No te aha aita te tahi noa ˈˈe i poiete i te Atua, e mea hamanihia hoi te ao nui? E mea fifi no ˈna ia farii i tera manaˈo, ua uiui noa ïa, ‘na vai i hamani i te Atua?’

Eaha te pahonoraa a te Bibilia? Mai te metua tane i faahitihia, teie ta te Bibilia e faaite ra. Ua papai Mose: “E te fatu [e Iehova] . . . Aore te mau mouˈa nei i fanau, e aore hoi te fenua e te ao atoa nei i hamanihia e oe ra, te vai ra oe, e te Atua, mai tahito mai â e a muri noa ˈtu!” (Salamo 90:1, 2) Ua na ô atoa te peropheta Isaia: “Aitâ oe i ite, aitâ oe i faaroo, e e parahiraa mure ore to te Atua, to Iehova, o tei hamani i te fenua.” (Isaia 40:28) Te faaite atoa ra te rata a Iuda e vai noa te Atua “e a muri noa ˈtu.”—Iuda 25.

Te haapapu maira tera mau irava Bibilia i ta te aposetolo i parau no te Atua, o ˈna “te Arii hau mure ore.” (Timoteo 1, 1:17) Noa ˈtu ehia matahiti ta tatou e nehenehe e taio, i vai noa na te Atua mai tahito mai â e e vai noa atoa e a muri noa ˈtu. (Apokalupo 1:8) O ˈna ïa te Mana hope no te mea o oia te Atua mure ore.

No te aha e mea fifi no tatou ia farii i tera manaˈo? Mea taa ê roa to tatou manaˈo no nia i te tau i to Iehova, mea taotiahia hoi to tatou oraraa. Mea mure ore te Atua, hoê tausani matahiti, hoê ïa mahana no ˈna. (Petero 2, 3:8) No te taa, a feruri na i te vivi o te nehenehe noa hoi e ora e 50 mahana. E nehenehe anei teie manumanu e taa i te maoro o te oraraa o te taata, te nehenehe hoi e ora e 70 aore ra 80 matahiti? Mea fifi roa, e ere anei? Ia faaauhia i to tatou Atua poiete, te faataa ra te Bibilia e e au tatou i te vivi, e mea taotiahia hoi to tatou oraraa. (Isaia 40:22; 55:8, 9) E ere ïa i te mea maere ia ore te taata e taa roa i te huru o Iehova.

Noa ˈtu e mea fifi ia farii e i vai na te Atua mai tahito mai â, e nehenehe tatou e papu e tera te faataaraa tano. Ahiri e mea poietehia te Atua, o tei hamani ia ˈna te parauhia te Atua poiete. Te faataa ra râ te Bibilia e na Iehova i “hamani i te mau mea atoa.” (Apokalupo 4:11) Hau atu â, te ite ra tatou e aita e ao nui na mua ˈˈe. (Genese 1:1, 2) Na vai i hamani i te reira? Na te Atua poiete. I vai na ïa o ˈna na mua ˈtu i te ao nui e na mua ˈˈe i ta ˈna Tamaiti fanau tahi e te mau melahi. (Ioba 38:4, 7; Kolosa 1:15) O ˈna anaˈe ïa tei vai na na mua ˈˈe. E ere te Atua i te mea poietehia, na ˈna râ i hamani i te mau mea atoa.

Te haapapu ra te ao nui e te oraraa o te taata e i vai noa na iho â te Atua mure ore. Maoti o ˈna i hamanihia ˈi te ao nui, na ˈna atoa i haamau i te mau ture ia tere maite te reira. I vai noa na iho â ïa o ˈna. Maoti o ˈna anaˈe i hamanihia ˈi te mau mea atoa.—Ioba 33:4.