Yipi onjila ya velapo yoku liwekapo oku namulala? Catete, nõla ocitumãlo cimue ca sunguluka oco u sapele. Ocitumãlo ci pi?

Sokolola ndomo ove o yongola oku tatiwa. (Mateo 7:12) Wa yonguile okuti va ku sapuila ondaka yaco kovaso omanu vakuavo? Citava okuti sio.

Citava okuti ci lingiwa nda ekalo li ecelela, pole ka ca sungulukile oku vangula ondaka yaco yoku siapo oku namulala votelefone ale oku tumisa esapulo vo internet. Omo liaco, nõla owola kuenda ocitumãlo ca sunguluka oco u sapele ondaka yaco.

Nye o sukila oku popia eci elivala liaco li pitĩlapo? Upostolo Paulu wa vetiya Akristão oco va ‘popie ocili’ lavakuavo.—Va Efeso 4:25.

Omo liaco, onjila ya velapo yoku ci linga oku vangula lutate pole lutõi. Loku teta onimbu lekisa esunga lieci ove o simĩla okuti ka citava okuti wamamiko oku namulala.

Ka ci sukila oku tukula ovina viosi ka via sungulukile wa limbuka ale oku u pisa. Yuvula oku popia okuti “ove lalimue eteke wa lingile eci ale coco”, pole tukula olondaka vi situlula ovisimĩlo viove poku popia hati: “Ame ndi sukila omunu umue okuti ...” ale “Ame ndi sima okuti tu sukila oku liwekapo omo ...”

Eyi hatemboko yoku kala latãtahai ale oku tava kovisimĩlo viomunu ukuavo. Ivaluka okuti ove wa nõlapo oku liwekapo oku namulala omo liesunga limue li kuete esilivilo. Omo liaco, ku ka ecelele okuti omunu o namulala laye oku vetiya oku pongolola ovisimĩlo viove. Ufeko umue o tukuiwa hati Lori wa popia hati: “Noke yoku liwekapo oku namulala, ukuenje nda kala oku namulala laye, otembo yosi wa fetika oku lekisa okuti wa sumua. Ndi sima siti eye wa ci lingila oco ndu kuatele ohenda. Ocili okuti ndo kuatela ohenda. Pole sia ecelelele okuti ekalo liaye li pongolola ocisimĩlo cange.” Ndeci Lori a linga, kũlĩha eci o yongola oku linga. Kakatela konjila wa nõla. Ecelela okuti ondaka yove yokuti haicoko, yi lomboloke okuti, haicoko. —Tiago 5:12.