Eci ulume lukãi waye va likuatisa, ovo va kala ndukuakuendisa ombalãu loñuatisi yaye okuti, va kuama esokiyo limuamue lioku linga ungende. Poku liyaka lovitangi, omunu lomunu ka li sokolola “eye muẽle,” pole, o sokolola “kukuavo.”

CECI EMBIMBILIYA LI POPIA: “Ovo ka va lingi vali vavali, pole, va linga etimba limuamue.”—Mateo 19:6.

“Ulume lukãi waye va sukila oku li kuatisa pokati oco va kuate esanju volohuela.”—Christopher.

Nda peya oku lihoya, olohueli vina ka vi li kuatisa, vi tiamisila utima koku li kapa eko okuti, ka vi seteka oku tetulula ocitangi. Kuenje ovitangi vitito vi linga vinene.

“Oku li kuatisa pokati, ci kuete esilivilo volohuela. Ame lulume wange nda ka tu likuatisa, tu kala ño ndomanu va kasi vohondo yimuamue okuti, halohueliko. Tu kala ño ndomanu vavali va kasi kumosi, pole, ka va likuete omunga poku nõla olonjila vi kuete esilivilo.” —Alexandra.

TALAMA KUENDA SOKOLOLA

• Ndi sima hẽ okuti “olombongo viosi” ndi nganyãla viange?

• Anga hẽ ndi tẽla lika oku tula utima eci ndi kasi ocipãla lulume wange ale lukãi wange?

• Ndaño nda kũlĩha okuti, ulume wange ale ukãi wange wa kakatela calua kepata liaye, ndi yuvula hẽ oku kuata lavo ukamba?

SAPELI POKATI

• Kolonepa vipi violohuela vietu tua siata oku likuatisa ciwa?

• Kolonepa vipi tu sukila oku mioñoloha?

• Ananga api tu sukila oku eca oco tu mioñolohe?

OLONUMBI

• Sokolola ndu okuti olohuela viene vi kasi ndomapalo yimue okuti, ove lulume wove ale ukãi wove, vu kasi oku imbila kolonele via litepa. Sandiliyi eci vu sukila oku linga oco vu imbili konele yimuamue.

• Yuvula oku sima ndoco: ‘Ndi yula ndati?’ Pole sokolola ndoco: ‘Etu, tu yula ndati?’

“Yuvuli oku sanda u o kuete esunga lu ka kuete. Ocina ca velapo vu sukila oku linga, oku sanda ombembua kuenda oku likuata omunga volohuela.”—Ethan.

CECI EMBIMBILIYA LI POPIA: “Ko ka sokololi lika ovina viene muẽle, pole, sokololivo ovina via vakuene.”—Va Filipoi 2:3, 4.