بادشاہتی مُناد رپورٹ دیتے ہیں

الی‌جانڈرا کا ایک خط

خط لکھنا گواہی دینے کا ایک مؤثر ذریعہ ہے۔‏ بعض‌اوقات شاید اسکے فوری نتائج حاصل نہ ہوں تاہم جنہوں نے مستقل‌مزاجی سے خط لکھنا جاری رکھا ہے اُنہیں بہت زیادہ برکات حاصل ہوئی ہیں۔‏ وہ بائبل کی اس دانشمندانہ مشورت کو یاد رکھتے ہیں:‏ ”‏صبح کو اپنا بیج بو اور شام کو بھی اپنا ہاتھ ڈھیلا نہ ہونے دے کیونکہ تُو نہیں جانتا کہ اُن میں سے کون سا بارور ہوگا۔‏ یہ یا وہ یا دونوں کے دونوں برابر برومند ہونگے۔‏“‏—‏واعظ ۱۱:‏۶‏۔‏

الی‌جانڈرا جو گزشتہ دس سال سے میکسیکو میں یہوواہ کے گواہوں کے برانچ آفس میں خدمت کرتی رہی تھی اب کینسر کیلئے کیموتھراپی کروا رہی تھی۔‏ اُسکی حالت مزید خراب ہو گئی اور وہ اتنی کمزور ہو گئی کہ اُس کیلئے اپنے معمول کے کام انجام دینا مشکل ہو گیا۔‏ تاہم،‏ الی‌جانڈرا اپنی خدمتگزاری سے غفلت برتنا نہیں چاہتی تھی لہٰذا اُس نے خطوط لکھنے کا فیصلہ کِیا۔‏ وہ اپنے خط میں مُفت گھریلو بائبل مطالعے کے بندوبست کا ذکر کرتی تھی اور اس میں اپنی والدہ کا ٹیلی‌فون نمبر بھی لکھ دیتی تھی۔‏ پھر وہ یہ خط اپنی ماں کو دے دیتی تاکہ گھرباگھر کی خدمتگزاری کے دوران جو لوگ گھروں پر نہیں ملتے وہ اُنکے ہاں یہ خط چھوڑ دے۔‏

اسی دوران،‏ گواٹیمالا سے ایک نوعمر لڑکی ڈیوجانی،‏ میکسیکو کے شہر کانکم میں کسی کے گھر کام کرنے کیلئے آئی تھی۔‏ وہاں اُسکی ملاقات یہوواہ کے گواہوں سے ہوئی اور وہ اُنکے ساتھ بائبل سے بات‌چیت کرکے بڑی خوش تھی۔‏ کچھ عرصہ بعد جنکے پاس وہ کام کرتی تھی اُنہوں نے میکسیکو شہر منتقل ہونے کا فیصلہ کِیا اور وہ چاہتے تھے کہ ڈیوجانی بھی اُنکے ساتھ چلے۔‏ مگر ڈیوجانی ڈرتی تھی کہ کہیں اُسکا یہوواہ کے گواہوں کیساتھ رابطہ ختم نہ ہو جائے۔‏

اُن دونوں میاں‌بیوی نے اُسے یقین دلایا کہ ”‏وہاں بھی بہت سے یہوواہ کے گواہ ہیں۔‏ ہم تمہارے لئے اُنہیں تلاش کرینگے۔‏“‏ اس وعدے کیساتھ ڈیوجانی اُنکے ساتھ جانے کو تیار ہو گئی۔‏ میکسیکو شہر پہنچ کر اُن دونوں نے گواہوں کو بہت تلاش کِیا مگر کسی وجہ سے وہ اپنی کوشش میں ناکام رہے حالانکہ اُس شہر میں ۰۰۰،‏ ۴۱ سے زائد گواہ اور ۷۳۰ کلیسیائیں ہیں۔‏

جلد ہی ڈیوجانی گواہوں کو تلاش کرنے میں ناکامی کے باعث بےحوصلہ ہونے لگی کیونکہ اُسکے بائبل مطالعے کا حرج ہو رہا تھا۔‏ ایک دن اُسکی مالکن نے کہا:‏ ”‏تمہارے لئے ایک خوشخبری ہے!‏ تمہارے خدا نے تمہاری دُعائیں سُن لی ہیں۔‏“‏ ڈیوجانی کو ایک خط دیکر اُس نے کہا:‏ ”‏گواہ تمہارے لئے یہ خط چھوڑ گئے ہیں۔‏“‏ یہ خط الی‌جانڈرا کی طرف سے آیا تھا۔‏

ڈیوجانی نے الی‌جانڈرا کی ماں اور اُسکی بہن بلانکا سے ملاقات کی اور بائبل مطالعہ شروع ہو گیا۔‏ کچھ ہفتوں بعد،‏ اُسکی ملاقات الی‌جانڈرا سے ہوئی۔‏ اُس نے ڈیوجانی کی حوصلہ‌افزائی کی کہ وہ بائبل مطالعہ کرتی رہے تاکہ روحانی طور پر ترقی کر سکے۔‏

چند مہینوں بعد،‏ جولائی ۲۰۰۳ میں الی‌جانڈرا کی وفات ہو گئی۔‏ اُس نے اپنے ساتھی ایمانداروں کیلئے ایمان اور حوصلے کا اچھا نمونہ چھوڑا۔‏ اُسکی تدفین کے وقت بہت سے لوگوں کی ڈیوجانی سے ملاقات ہوئی اور وہ اُسکی اس بات سے بڑے متاثر ہوئے:‏ ”‏الی‌جانڈرا اور اُسکا خاندان میرے لئے ایک شاندار نمونہ رہے ہیں۔‏ مَیں جلد ہی بپتسمہ لینے اور یہوواہ کی خدمت کرنے کا عزم رکھتی ہوں۔‏ مَیں آنے والے فردوس میں الی‌جانڈرا سے ملنے کی متمنی ہوں!‏“‏

سچ ہے کہ ایک خط شاید بظاہر معمولی سی چیز دکھائی دے مگر اسکے نتائج کتنے عمدہ اور دائمی ہو سکتے ہیں!‏