Малаки 2:1–17
2 «Эй руҳонийлар, энди сизларга берадиган амрим шу+:
2 агар амримни тинглашдан ва исмимни улуғлаш учун уни қалбингизда сақлашдан бош тортсангиз, бошингизга қарғиш ёғдираман+, баракаларни лаънатга айлантираман+. Мен аллақачон баракаларни лаънатга айлантирдим, чунки сизлар амримни қалбингизда сақламадингиз»,— демоқда Қўшинлар Сарвари Яҳова.
3 «Сизларни деб экилган уруғингизни нобуд қиламан+, байрамларингизда қурбон қилинган ҳайвонлар гўнгини юзингизга сочиб ташлайман, ўзингиз эса ўша гўнгга улоқтириласиз*.
4 Шунда, Леви билан қилган аҳдим кучини йўқотмаслиги учун+, бу амрни берганимни билиб оласизлар»,— демоқда Қўшинлар Сарвари Яҳова.
5 «Бу аҳд унинг ҳаётини сақлаб қолиш учун хизмат қилиб, уни фаровон ҳаёт сари етаклаган. Бу баракалар туфайли у Мени қаттиқ ҳурмат қилган. Шу сабабли у исмимга ҳурмат-эҳтиром кўрсатиб, Мени ранжитадиган ишлардан нафратланган.
6 Ҳақиқат қонуни оғзидан тушмаган+, тилида ноҳақлик бўлмаган. У Мен билан тотув бўлиб, олдимда тўғри ишлар қилган+, кўпларни ёмон йўлдан қайтарган.
7 Руҳоний Қўшинлар Сарвари Яҳованинг хабарчиси бўлгани учун, Худо ҳақида таълим бериши керак+. Халқ ҳам қонун борасида ундан маслаҳат сўраб бориши лозим.
8 Бироқ, сизлар ўзингиз йўлдан оздингиз. Қонунга риоя қилиш борасида* кўпларни қоқинтирдингиз+. Леви билан қилинган аҳдни буздингиз»+,— демоқда Қўшинлар Сарвари Яҳова.
9 «Қонунга риоя қилиш масаласида Менинг йўлларимни тутмай, юзхотирчилик қилганингиз учун, бутун халқ олдида сизларни жирканч қиламан, хўрлайман»+.
10 «Ҳаммамизнинг отамиз бир эмасми?+ Бизни битта Худо яратган эмасми? Нега бир-биримизга хоинлик қилиб+, ота-боболаримиз аҳдини бузяпмиз?
11 Яҳудо хоинлик қилди, Исроил ва Қуддусда жирканч ишлар қилинди. Яҳова севадиган муқаддасликни*+ Яҳудо булғади. У бегона худонинг қизини ўзига хотинликка олди+.
12 Бу ишга қўл урган ҳар бир кишини — у ким бўлишидан қатъи назар, ҳатто у Қўшинлар Сарвари Яҳовага назр келтирган бўлса ҳам — Яҳова Ёқубнинг чодирларидан қириб ташлайди»+.
13 «Сизларнинг яна бир қилмишингиз бор. Унинг дастидан Яҳованинг қурбонгоҳи оҳу нола ва кўз ёшлар билан ювиляпти. Шу сабабли У назрларингиз томон юз бурмаяпти, келтирган ҳеч бир нарсангиздан мамнун бўлмаяпти+.
14 Сизлар: “Нима қилдик?” — дейсиз. Ёшликда уйланган хотинингиз билан сизнинг орангизда Яҳова шоҳид бўлган. Ўша аёл сизнинг умр йўлдошингиз, қонуний хотинингиз*. Сиз эса унга хиёнат қилдингиз+.
15 Аммо бундай ишга қўл урмаган инсон бор бўлиб, унда оз бўлса-да Тангрининг муқаддас руҳи бор эди. Унга нима керак эди? Худо яратган зурриёт* керак эди. Шундай экан, қандай руҳни намоён этаётганингизга диққат қилинглар, ёшликда уйланган хотинингизга хиёнат қилманглар.
16 Мен ажралишдан нафратланаман+,— демоқда Исроил Тангриси Яҳова. — Зўравонликда айбдор бўлган* одамдан жирканаман,— демоқда Қўшинлар Сарвари Яҳова. — Қандай руҳни намоён этаётганингизга диққат қилиб, хиёнат қилмаслигингиз керак+.
17 Сизлар гапларингиз билан Яҳовани чарчатдингиз+. Бироқ сизлар: “Қанақасига Уни чарчатдик?” — дейсиз. “Ёмонлик қиладиган ҳар қандай киши Яҳованинг назарида яхши ва бундай одам Унга маъқул”+ ёки “Адолат Худоси қаерда?” — деган гапларингиз билан Уни чарчатдингиз».
Изоҳлар
^ Яъни қурбон қилинган ҳайвонларнинг гўнги йиғиб қўйиладиган жой.
^ Бошқа вариант «Берган кўрсатмаларингиз билан».
^ Бошқа вариант «муқаддас масканни».
^ Сўзма-сўз «никоҳ аҳдингиздаги хотинингиз».
^ Сўзма-сўз «уруғ».
^ Сўзма-сўз «Кийимини зўравонлик билан қоплаган».
