Arali zwi songo ralo, khamusi no no vhona hu tshi khou vhengwa muṅwe. Kha mafhungo ri pfa nga ha vhathu vhane vha vhengiwa nga nṱhani ha uri vha bva kha ḽiṅwe shango, ndi vha luṅwe lushaka kana ngauri vha ita zwa vhudzekani na vhathu vha mbeu i fanaho na yavho. Zwenezwo zwo ita uri mivhuso minzhi i vhee milayo ya uri hu pfiswe vhuṱungu vhathu vhane vha ita zwa dzikhakhathi vha tshi itiswa nga u vhenga vhaṅwe. Vha vha vhenga nga nṱhani ha uri vha bva kha ḽiṅwe shango, ndi vha luṅwe lushaka kana ngauri vha ita zwa vhudzekani na vhathu vha mbeu i fanaho na yavho.

Kanzhi vhathu vhane vha vhengiwa, vha vhenga vhaṅwe. Vhane vha vhengiwa na vhone vha ṱoḓa u lifhedza vhane vha vha vhenga, zwa tou ṋaṋisa vengo.

Khamusi no no vhuya na sumbedzwa tshiṱalula na goḓiwa kana u shushedzwa. Fhedzi muthu ane a vhenga vhaṅwe u ita zwi fhiraho zwenezwo. U na tshiṱuhu nahone a nga tambudza vhaṅwe, u tshinyadza zwithu zwa vhaṅwe, u tzhipa kana a vhulaya vhane a vha vhenga.

Hoyu magazini u ḓo fhindula mbudziso dzi re afho fhasi na u sumbedza zwine ra nga zwi ita uri ri si tsha vhenga vhaṅwe:

• Ndi ngani vhathu vha tshi vhengana nga u rali?

• Ri nga ita mini uri ri si tsha vhenga vhaṅwe?

• Naa hu ḓo vhuya ha vha na tshifhinga tshine vhathu vha si tsha ḓo vhengana?