Ninnamukokhorela Muluku, mwaha woowera owo mpattuxa a itthu soothesene ni oonivaha ekumi. Owo khaanono epatxerero ni emalihero. (Nsalmu 90:2) Ohiya yeeyoru, owo nave, oonivaha mitthenka sooreera siri mBiblyani. (1 Timotheyo 1:11) Mwaha woowera Muluku oonivaha ekumi, nto ti vamiruku omukokhorela yooworu paahi. — Mmusome Apokalise 4:11.

Hiyo khaninwera omoona Muluku mwaha wooweera onkhala wirimu nave owo munepa. (Yohani 1:18; 4:24) Mene oweha itthu opattunxaawe, hiyo nnowera osuwela omutthu awe. Mwa ntakihero, owo opattuxa ithutu ni sowiima soosiva, seiyo sinnikhavihera osuwela nsivelo ni osuwela wawe. Nave-tho, naweha nsuwa ni etthaya ninnawera osuwela oweera okhalannaawe. — Mmusome Aroma 1:20.

Moota mukina woomusuwela Muluku ori omusoma Biblya. Koma owo onnahima ele emmusivela Muluku ni ele ehimmusivela ni moota onathokororaawe atthu. — Mmusome Nsalmu 103:7-10.

Aani, Muluku okhalano nsina. Yesu ahimme weera: “Tiithi, ori wirimu, nsina ná  nttelihiwe.” (Matheyo 6:9) Nulumo ti nulumo, nsina nno ninnavirikana maromoleliwo. Ni Emakhuwa nneriwa “Yehova,” koma atthu antxipale eneera “Yahvéh.” Masu oweera Muluku, Apwiya ni Mpattuxa, khehiyono masina. — Mmusome Nsalmu 83:19.

Emara Biblya alempwawe, naakhalamo nsina na Muluku ikwaha sookwana 7.000. Nsina na Muluku ti nootthuneya vantxipale, nakhala Yesu araawe elapo yavathi, owo annalela atthu nsina nno. Noovira ehuhu, nsina nno na Yehova, nookumihiwamo.  ABiblya antxipale aheliwe masu oweera Apwiya naari Muluku. — Mmusome Yohani 17:26.

Atthu antxipale annihaawa. Mwaha wa yeeyo, akina aneera Muluku khannipwattha ni onneerera nroromelo nahu, mene tiyeeyo anahiyaawe ohaawa otepaka. Mene eyo khehiyono ekhaikhai. — Mmusome Yakobe 1:13.

Muluku onivaha othanla moothaphuwa. Onnireerela opaka yoothanlahu. (Yehoxuwa 24:15) Yooripiha murima ti yoowera, atthu antxipale khenvarela nneene yoothanla eyo, awo annipaka itthu soonanara ehimaka weera nokhalano ehakhi yoopaka itthu sootheene. Mene tiyeyo ohaawa onitepaaya, ni Yehova onnaripiwa murima mwaha wa itthu sene seiya. — Mmusome Ephattuwelo 6:5, 6.

Yehova oonnanipwattha, nave owo ontthuna weera nikhalekeno ekumi yoohakalala. Yehova onomaliha ohaawa, ni ommwanyanya atthu anipaka itthu soonanara. Ahee, namwi vareene hiiho atthu annihaawa. Ohoolo wa yoosomahu ela, ninkela wiiwexexa heeni Muluku onahiyaawe ohaawa otepaka yoosoma ya 8. — Mmusome 2 Pedru 2:9; 3:7, 13.

Yehova oontthuna weera nikhalane onthamwene niyoowo. Mene weera Muluku akhale ntthamwenaahu, ontthuneya opaka mavekelo. Nave owo, ontthuna osuwela ele hiyo nnuupuwelahu. (Nsalmu 65:3; 145:18) Aani, etthu ekina nneerahu nipakeke ori wiilipihera opaka itthu sooreera mahiku oottheene. Mene atthu ootheene akhalano yoottheka. Naamwi vareene hiiho, nnoowera okhala nthamwene a Muluku mwaha woweera owo onnanlevelela. — Mmusome Nsalmu 103:12-14; Yakobe 4:8.

Nimusiveleke Yehova opwaha itthu soothesene. (Marko 12:30) Neereke nyuwo munimusivela Muluku? Weera mulipihe onthamwenaanyu ni Yehova, muxuttereke sa yoowo ni mpakeke anoovekelaaweni. — Mmusome 1 Timotheyo 2:4; 1 Yohani 5:3.