Akkay. Kushiyan xaafido beni xuufeta pilggidobay bessiyoogaadan, Geeshsha Maxaafay moorettiya miishshatun daro shaˈutoo zaari zaaridi duuqettidaba gidikkokka an deˈiya qofay laamettibeenna.

 Kushiyan beni xaafettida shaˈan qoodettiya Geeshsha Maxaafaa xuufeti beettidosona. He xuufetun issi issi dummatettay deˈees; shin hegee duuqqiyo wode merettidaba. He dummatettaappe daroy qofay laamettanaadan oottenna guutta bala. SHin qofaa laammiya amarida dummatettay deˈiyoogeekka erettiis; he qofaappe issoy issoy Geeshsha Maxaafaa qofaa laammanawu eriiddi gujjidoba. Naaˈˈu leemisota beˈa:

1.   Issi issi Geeshsha Maxaafaa beni birshshettatun, 1 Yohaannisa 5:7n, “saluwan Aaway, Qaalaynne Geeshsha Ayyaanay deˈoosona; eti heezzaykka issuwaa” yaagiya qofay deˈees. SHin he qofay beni xaafettidaagan deˈennaagaa hara suure xuufeti qonccissoosona. Hegee gujettida qofa. a Ha wodiyan deˈiya Geeshsha Maxaafaa suure birshshettatun he qofay deˈenna.

2.   Xoossaa buzo sunttay kushiyan xaafettida beni Geeshsha Maxaafaa xuufetun shaˈan qoodettiya sohuwan deˈees. SHin daro Geeshsha Maxaafaa birshshettatun he sunttay “Godaa” woy “Xoossaa” giyo bonchcho sunttatun laamettiis.

 Ha wodiyan, kushiyan xaafettida beni xuufeti daroy beettido gishshawu, bali deˈikko haˈˈi sohuwaara erana danddayettees. b He xuufeta geeddarssi xeellidobay, ha wodiyan deˈiya Geeshsha Maxaafaa tumatettaabaa ay qonccissii?

•   Eranchchaa Wiliyam H. Grini Ibraawetto Geeshsha Maxaafaa (darotoo “Galˈˈa Maachchaa” giyoogaa) xeelliyaagan hagaadan giis: “Beni xaafido ay xuufeenne wodiyaappe wodiyan hegaadan suure duuqetti uttibeenna gaana danddayettees.”

•   Geeshsha Maxaafaa eranchchaa F. F. Brusi Giriiketto Geeshsha Maxaafaa woy “Ooratta Maachchaa” xeelliyaagan hagaadan giidi xaafiis: “Ooratta Maachchaa xuufee tuma gidiyoogaa bessiya naqaashaa keenay beni xaafettida hara ay xuufiyawunne deˈenna; shin beni xaafettida he hara xuufeti tuma gidiyoogaa ooninne sirenna.”

•   Beni xaafettida Geeshsha Maxaafaa xuufeta xannaˈiyoogan erettida, Ser Frederik Keniyoni issi uri “kumetta Geeshsha Maxaafaa oyqqidi, hegee daro xeetu layttawu yeletaappe yeletaa gakkanawu daro bali baynnan ha wodiyawu gakkida Xoossaa Qaalaa gidiyoogaa yayyennan woy sirennan yootana danddayiyoogaa odiis.”

•   Xuufeta duuqqida Ayhudatikka Kiristtaanetikka Xoossaa asay oottido gita nagaraa yootiya taarikiyaa laammennan xaafidosona. c (Qoodaabaa 20:12; 2 Sameela 11:2-4; Galaatiyaa 2:11-14) Qassi Ayhuda deree azazettibeennaagaanne asa wogaa boriya taariketakka laammennan xaafidosona. (Hosee7a 4:2; Milkkiyaasa 2:8, 9; Maatiyoosa 23:8, 9; 1 Yohaannisa 5:21) Duuqqiyaageeti ha taariketa suure xaafiyoogan, ammanettiya asa gidiyoogaanne geeshsha gidida Xoossaa Qaalaa bonchchiyoogaa bessidosona.

•   Geeshsha Maxaafaa ba ayyaanan xaafissida Xoossay, he maxaafaa qofay laamettennan takkanaadan oottana giidi qoppiyoogee bessiyaaba gidennee? d (Isiyaasa 40:8; 1 PHeexiroosa 1:24, 25) Qassi I beni deˈida asa xallay gidennan, ha wodiyan deˈiya asaykka goˈettana mala halchchiis. (1 Qoronttoosa 10:11) Tumukka, “Xoossaa maxaafai nuuyyo immiyo genccaaninne minttettuwan nuuni demmana giidi ufaissan naagi uttidoogee de7ana mala, Xoossaa maxaafan xaafettida ubbabai nuna tamaarissanau xaafettiis.”—Roome 15:4.

•   Yesuusikka A kaalliyaageetikka beni duuqettida Ibraawetto Geeshsha Maxaafaa xuufiyaappe yootidosona; shin hegee tuma gidiyoogaa siri erokkona.—Luqaasa 4:16-21; Oosuwaa 17:1-3.