Ee koshshees; ayssi giikko, asay issippe shiiqidi goynnanaadan Xoossay koyees. Geeshsha Maxaafay hagaadan gees: “Issoi issuwaara waani siiqettanaakkonne qassi lo77o oosuwaa waati oottanaakko, issoi issuwau qoppoos. . . . Issippe shiiqiyoogaa aggokko.”—Ibraawe 10:24, 25.

 Yesuusi bana kaalliyaageetussi, “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagido wode, eti issippetettan goynnanaagaa qonccissiis. (Yohaannisa 13:35) Kiristtoosa kaalliyaageeti issoy issuwaassi he siiquwaa bessiyo waanna ogee eti issippe shiiqiyoogaa. Eti goynuwawu ubbatoo issippe shiiqiya gubaaˈetun issippetettan goynnana. (1 Qoronttoosa 16:19) Hegeeti ubbay issippe kumetta saˈan deˈiya ishanttu maabara gidoosona.—1 PHeexiroosa 2:17.

Haratuura issippe goynniyoogaa xallay gidenna

 Asay Xoossawu goynnanawu issippe shiiqana bessiyoogaa Geeshsha Maxaafay yootikkokka, issi uri issi haymaanoote kaalliyoogaa xallan Xoossaa ufayssana danddayees geenna. Issi ura haymaanootee Xoossaa ufayssiyaagaa gidanawu, A deˈo ubban maaddiyaagaa gidana bessees. Leemisuwawu, Geeshsha Maxaafay hagaadan gees: “Xoossaa Aawaa sinttan pokkoi bainna geeshsha ammanoi hagaa; hegee augee giikko, aaya aawi bainna naatanne waayettiya am77eta maaddanaagaanne sa7aa nagaraa qitaappe ba huuphiyaa naaganaagaa.”—Yaaqooba 1:27.