Daroti wolqqaama metoy banttana gakkido gishshawu, he oyshaa zaaruwaa xalla gidennan minttettuwaakka koyoosona. Harati qassi, Jarmanen asaa buttidoogaa asay oottiyo meqetti baynna iita ooso ubbaappe aadhdhiyaabadan xeelliyo gishshawu, Xoossaa ammananawu metootoosona.

 Tumaa: Mino ammanoy deˈiyo asatikka, Xoossay iitabay deˈanaadan ayssi paqqadidee giidi oychchidosona. Leemisuwawu, hananabaa yootiya Imbbaaqoomi hagaadan giidi Xoossaa oychchiis: “Mooruwaa xeellaidda neeni aissi co77u gaada danddayai? Bashshainne makkalai ta sinttaana; waretainne ooshshai biitta ubban dariis.” (Imbbaaqooma 1:3) Xoossay Imbbaaqooma seeriyoogaappe, nuuni ubbay nabbabana mala A oyshati Geeshsha Maxaafan xaafettanaadan oottiis.

 Tumaa: Xoossay iitatettaanne iitatettay kaalettiyo waayiyaa ixxees. (Leemiso 6:16-19) Beni Nohe wode saˈan keehi darida makkalaa gaasuwan, Xoossay “ba wozanan keehippe seelettiis.” (Doomettaabaa 6:5, 6) Jarmanen asaa buttidoogeekka Xoossay seelettanaadan oottidoogee aynne sirissenna.—Milkkiyaasa 3:6.

 Tumaa: Koyro xeetu layttan Roomati Yerusalaame katamaa xayssanaadan Xoossay paqqadiis. (Maatiyoosa 23:37–24:2) SHin he wodeppe doommidi, Xoossay issi zariyaa dummayidi siiqenna woy qaxxayenna. Xoossaa xeelan, “Aihuda asaanne Aihuda gidenna asaa giddon dummatetti baawa.”—Roome 10:12.

 Tumaa: Xoossay asay waayettanaadan oottana xayikkonne, issi issitoo amarida wodiyawu waayettanaadan paqqadees.—Yaaqooba 1:13; 5:11.

 Xoossay asa ubbay waayettanaadan paqqadidoogaadankka Jarmanen asaa buttanaadan paqqadiis; hegawu gaasoy, daro wodiyaappe kase denddida oyshaa zaaranaassa. Ha saˈaa haariyay Xoossaa gidennan Dabloosa gidiyoogaa Geeshsha Maxaafay qonccissi yootees. (Luqaasa 4:1, 2, 6; Yohaannisa 12:31) Jarmanen asaa buttidoogaa Xoossay paqqadidoy aybissakko loytti akeekanawu, Geeshsha Maxaafan deˈiya kane gidida naaˈˈu tumati maaddoosona.

1.   Asay ba koyidobaa dooranaadan oottidi Xoossay medhdhiis. Xoossay etappe koyiyoobaa koyro asatussi, Adaamessinne Hewaanissi yootiis; gidoppe attin, eti bawu azazettanaadan wolqqanttibeenna. Eti iitaa kehaa banttawu kuuyanawu dooridosona; qassi etinne etappe simmin deˈiya asay iitabaa dooridoogee asa ubbay waayettanaadan oottiis. (Doomettaabaa 2:17; 3:6; Roome 5:12) Istetment ov Prinsipilis ov konservative Judayzim giyo maxaafay hagaadan gees: “Ha saˈan asaa gakkiya metuwaappe dariya baggawu gaasoy, koyidobaa dooriyo maataa nuuni bala ogiyan goˈettiyoogaa.” Xoossay nuuni dooriyo maataa diggiyoogaappe, asay an zemppennan ufayssiya deˈuwaa deˈanawu malanaadan wodiyaa immiis.

2.   Jarmanen asaa buttidoogee gattido qohuwaa Xoossay xayssana danddayees; qassi I xayssana. Jarmanen buttidoogeeta gujjin, hayqqida miilooniyan qoodettiyaageeta denttanawu Xoossay qaalaa geliis. Qassi, Jarmanen asaa buttishin attidaageeti hegaa hassayidi azzaniyaageetakka I woppissana. (Isiyaasa 65:17; Oosuwaa 24:15) Xoossay asaa siiqiyoogee I gelido he hidootaa polanaagawu waabe.—Yohaannisa 3:16.

 Jarmanen buttishin attida daro asati, iitabay gakkanaadan Xoossay paqqadidoy aybissakko, qassi he iitabaa gaasuwan gakkida qohuwaa I waati giigissanaakko erido gishshawu, bantta ammanuwaa naagidosonanne ufayssiya deˈuwaa deˈoosona.