“Geeshsha Maxaafaa nabbabanawu malaas, shin daro wodiyaa wurssiyo gishshawu yayyaas!”—Briyana, 15.

 Neeyyookka hegaadan siyettii? Ha huuphe yohoy nena maaddana!

•  Geeshsha Maxaafaa nabbabana koshshiyoy aybissee?

•  Taani Geeshsha Maxaafaa waata nabbabana koshshii?

•  Ne laggeti giyoobaa

 Geeshsha Maxaafaa nabbabiyoogee nena salettana gaada qoppay? Yaatikko, hegee oorattaba gidenna. Geeshsha Maxaafay televizhiniyadaaninne biiduwaadan ufayssenna, guutta pitaliyan xaafettida shaˈan qoodettiya sinttay deˈiyoonne misilee baynna maxaafa gaada qoppennan aggakka!

 SHin ane hagaadan qoppa: Alˈˈobay deˈiyo, wogga saaxiniyaa demmiyaakko, hegaa giddon deˈiyaabay aybakko beˈanawu koyikkii?

 Geeshsha Maxaafay alˈˈobay deˈiyo he saaxiniyaa mala. Geeshsha Maxaafan deˈiya alˈˈo gidida daro aadhdhida eratettay neeni

•   loˈˈobaa kuuyanaadan

•   yelidaageetuura maayettada deˈanaadan

•   loˈˈo laggeta demmanaadan

•   hirggissiyaabay gakkishin genccanaadan nena maaddana

 Hegaa mala beni xaafettida maxaafay ha wodiyan waati maaddana danddayii? “Xoossaa maxaafa ubban Xoossaa Ayyaanai” deˈiyo gishshataassa. (2 Ximootiyoosa 3:16) Hegee Geeshsha Maxaafan deˈiya zoree ooppenne aadhdhiya urappe yiis giyoogaa.

 Issi ogee Geeshsha Maxaafaa doomettaappe wurssettaa gakkanawu nabbabiyoogaa. Yaatiyoogee, neeni Geeshsha Maxaafan deˈiya qofaa guuttaa eranawu maaddees. Geeshsha Maxaafaa nabbabiyo daro ogee deˈees. Naaˈˈu leemisota beˈa:

•    Geeshsha Maxaafan deˈiya 66 maxaafata Doomettaabaa maxaafaappe Ajjuutaa gakkanawu maaraara nabbabana danddayaasa.

•    Geeshsha Maxaafan kasetidi hanidaban doommada appe kaallidi kayan kayan hanidabaa nabbabana danddayaasa.

 Maaddiya qofaa: Saˈan Yesuusa deˈuwan hanettidaban kasetiyaaban doommidi appe kaalliyaagee kayan kayan, “Saˈan Yesuusa Deˈuwaara Gayttida Waannabata” giya huuphe yohotun Xoossaa Qaalaa Xannaˈanawu Maaddiyaabaa giya xuufiyan deˈees

 Geeshsha Maxaafaa nabbabiyo naaˈˈantto ogee nena metidabaara gayttida taarikiyaa dooriyoogaa. Leemisuwawu:

•   Ammanettiya laggeta demmana koyay? Yonaataanabaanne Daawitabaa yootiya taarikiyaa nabbaba. (1 Sameela, shemppo 18-20) Yaatada, ha taarikiyaappe maaddiyaabaa tamaaranawu “Ammanettiya Laggeta Demmiyo Ogiyaa” giya meezetiyoobaa oottanawu mala.

•   Paaciyaa loytta eqettanawu koyay? Yooseefi paaciyaa waati eqettidaakko yootiya taarikiyaa nabbaba. (Doomettaabaa, shemppo 39) Yaatada, ha taarikiyaappe maaddiyaabaa tamaaranawu “Paaciyaa Eqettiyo Ogiyaa . . . Yooseefa—SHaaho 1” qassi “Wordduwan Mootidosona! Yooseefa—SHaaho 2” giya meezetiyoobaa oottanawu mala.

•   Woosay nena waati maaddiyaakko eranawu koyay? Nahimiyaa gakkidabaa nabbaba. (Nahimiyaa, shemppo 2) Yaatada, ha qofaappe maaddiyaabaa tamaaranawu “Xoossay A Woosaa Zaariis” giya meezetiyoobaa oottanawu mala.

 Maaddiya qofaa: Geeshsha Maxaafaa nabbabiyo wode, ne qofay wora beennaadan, hara cenggurssay siyettenna sohuwan nabbaba.

 Nabbabiyo heezzantto ogee issi qofaa woy mazamuriyaa doora nabbaba simmada hegee nena waati maaddiyaakko qoppa. Nabbaba simmada, kaallidi deˈiya oyshata nena oychcha:

•    Yihooway ha qofaa Geeshsha Maxaafan xaafissidoy aybissee?

•    Hagee Yihoowa eeshshaa woy I ubbabaa oottiyo ogiyaa xeelliyaagan ay qonccissii?

•    Hagaa ta deˈuwan waatada oosuwan peeshshana danddayiyaanaa?

 Maaddiya qofaa: Halchchuwaa kessa! Geeshsha Maxaafaa nibaabiyaa doommana gallassaa xaafa.